سۋرەت: پەتر كوۆالەۆ/تاسس
استانا قالاسىندا جاھاندىق ينۆەستيتسيا بويىنشا وتكەن «KGIR-2024» دوڭگەلەك ۇستەل جيىنىندا ءوڭىر باسشىسى ناريمان تورەعاليەۆ ينۆەستيتسيا تارتۋ جانە بيزنەسكە قولايلى جاعداي جاساۋ مەملەكەت باسشىسى ايقىنداعان نەگىزگى باسىمدىق ەكەنىن اتاپ ءوتتى. سونىمەن بىرگە, بۇل باسقوسۋدىڭ الەۋەتتى ينۆەستورلارمەن تانىسۋعا, ولارعا ءوڭىردىڭ ينۆەستيتسيالىق مۇمكىندىگىن كورسەتۋگە جاعداي جاساپ وتىرعانىن ايتتى.
«باتىس قازاقستان وبلىسىندا ينۆەستورلارعا بارلىق قاجەتتى جاعدايدى – قولايلى كليمات, دامىعان ينفراقۇرىلىم مەن قۋاتتى ونەركاسىپتىك, لوگيستيكالىق الەۋەت جاساپ وتىرمىز. وڭىردە جوعارى تەحنولوگيالىق وندىرىستەر اشىلىپ جاتىر. بۇل بىزدەگى ناقتى ەكونوميكالىق الەۋەت پەن تۇراقتىلىقتى كورسەتەدى», دەدى ناريمان تورەعاليەۆ.
اكىمنىڭ ايتۋىنشا, كەيىنگى ءۇش جىلدا وبلىستىڭ نەگىزگى كاپيتالىنا 1,6 ترلن تەڭگە ينۆەستيتسيا قۇيىلعان. سونىڭ 645,6 ملرد تەڭگەسى 2023 جىلدىڭ ەنشىسىندە. بۇل الدىڭعى كورسەتكىشتەردەن 16,4 پايىزعا جوعارى.
«KGIR-2024» باسقوسۋىنىڭ ماڭىزدى وقيعاسى – بقو اكىمدىگى مەن وڭتۇستىك كورەيالىق «Hyundai Solar KZ 777» كومپانياسى اراسىندا مەموراندۋمعا قول قويۋ بولدى. كومپانيا وڭىردە ءتورت جوبانى جۇزەگە اسىرۋ ماقساتىندا 81,4 ملرد تەڭگە ينۆەستيتسيا اكەلۋدى جوسپارلاپ وتىر. بۇل 120 جاڭا جۇمىس ورنىن قۇرۋعا مۇمكىندىك بەرەدى. جوسپارلانعان جوبالار قاتارىندا قالدىقتاردى وڭدەۋ جانە ورتەۋ كەشەنى, جىلىجاي كەشەنى, كۇن پانەلدەرىنەن ەلەكتر قۋاتىن وندىرەتىن ستانسا قۇرىلىسى بار. باستامالار 2024-2026 جىلدارعا جوسپارلانعان.
باتىس قازاقستان وبلىسى
