پەتروپاۆل. 29 ءساۋىر. پرەزيدەنتتى ۇلىقتاۋ ءراسىمى قىزىلجار وڭىرىندە كەڭىنەن اتاپ ءوتىلدى. بۇل تۋرالى egemen.kz ءتىلشىسى حابارلادى.
م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنە جينالعان ەتنومادەني بىرلەستىكتەر, ستۋدەنت-جاستار, ۇكىمەتتىك ەمەس ۇيىمدار وكىلدەرى سالتاناتتى ءراسىمدى تىكەلەي ەفير ارقىلى تاماشالاعاننان كەيىن فلەشموب ۇيىمداستىردى.
شارا بارىسىندا شىڭعىس قۇربانوۆ, ماريا چەرنىشوۆا, الەكساندر پلوتكو جانە تاعى باسقا سپيكەرلەر ءسوز الىپ, قايتا سايلانعان قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ انت بەرۋى وسكەلەڭ ۇرپاقتىڭ بويىنا وتانشىلدىق سەزىمدەرىن قالىپتاستىرۋمەن قاتار ەرەن جاۋاپكەرشىلىك جۇكتەيتىنىن جەتكىزدى.
«جاستار! سىزدەر جاڭا عانا مەملەكەت باسشىسىنىڭ سوزدەرىن تەبىرەنە تىڭدادىڭىزدار. مەن ءبارىڭىزدى ەلباسىمىزداي حالىققا ادال قىزمەت ەتىپ, ەل مەن ۇلت مۇددەسىن الدىڭعى ورىنعا قويۋعا شاقىرامىن. بۇگىندە قازاقستاندى الەمدىك قاۋىمداستىق جاقسى تانيدى, دەموكراتيالىق ەل رەتىندە مويىندايدى», – دەدى سپيكەرلەردىڭ ءبىرى, جەرگىلىكتى كۇرد قوعامدىق ۇيىمىنىڭ جەتەكشىسى راشيد ناديروۆ.
«دوسلۋك» تاتار-باشقۇرت مادەني قوعامىنىڭ توراعاسى ءامىر بايازيتوۆتىڭ سوزدەرى دە جارقىن شىقتى. ول ەلباسىنىڭ ۇلىقتاۋ راسىمىندە بەلگىلەپ بەرگەن مىندەتتەرىنە توقتالىپ, تاريحتىڭ جاڭا بەتى اشىلعانىن مالىمدەدى.
سونداي-اق: «كەيىنگى ۇرپاققا قازاقستاندى تابىستاۋ بارشامىزعا ورتاق پارىز, حالىقتىڭ زور سەنىمىن ارقالاۋ ەڭ بيىك مارتەبە, جاڭا عاسىردىڭ سىن-قاتەرلەرىنە توتەپ بەرىپ, وركەنيەتتى ەلدەر قاتارىنا قوسىلۋ – باستى جاۋاپكەرشىلىك», – دەگەن ەلباسى تالاپتارى جينالعاندار تاراپىنان قىزۋ قولداۋ تاۋىپ, جىگەرلى ۇران سوزدەرمەن جاۋاپ بەرىلدى.
«تەك بەيبىتشىلىك, ىنتىماق, كەلىسىم ارقىلى عانا قۋاتتى مەملەكەت بولىپ قالىپتاسامىز, ول ءۇشىن قاجىماي ەڭبەك ەتۋ كەرەك», – دەگەن وي ءتۇيىلدى جيىن سوڭىندا.
ءومىر ەسقالي.
دەرەك, سۋرەت: egemen.kz.
