اقتوبە. 29 ءساۋىر. مارات وسپانوۆ اتىنداعى اقتوبە مەملەكەتتىك مەديتسينا ۋنيۆەرسيتەتىنىڭ اكت زالىندا قايتا سايلانعان قازاقستان پرەزيدەنتى نۇرسۇلتان نازارباەۆتى ۇلىقتاۋ راسىمىنە ارنالعان فلەشموب ۇيىمداستىرىلدى. بۇل تۋرالى egemen.kz ءتىلشىسى حابارلادى.
شاراعا اتالعان جوعارى وقۋ ورنىنىڭ 300-دەن استام ستۋدەنتى مەن پروفەسسورلىق-وقىتۋشىلىق قۇرامى قاتىستى.
قاتىسۋشىلار الدىمەن تەلەديداردان قازاقستان پرەزيدەنتى نۇرسۇلتان نازارباەۆتى ۇلىقتاۋ ءراسىمىن كورىپ, ءسوزىن تىڭدادى. پرەزيدەنتتىڭ انت بەرۋى, تۋدى ءسۇيۋى, قازاقستان رەسپۋبليكاسىنىڭ پرەزيدەنتى كۋالىگىن تاپسىرۋ سياقتى شىرايلى ساتتەردە بىردەي سارى سپورتتىق جەيدە كيگەن فلەشموبقا قاتىسۋشى جاستار قولدارىنداعى كوك جانە سارى جالاۋلاردى شالقىتا بۇلعاپ, ەلباسىنا دەگەن شىنايى نيەتتەرىن ءبىلدىردى.
سودان كەيىن, ۋنيۆنرسيتەتتىڭ تىلدەر كافەدراسىنىڭ مەڭگەرۋشىسى, «سلاۆيانە» ەتنومادەني بىرلەستىگىنىڭ مۇشەسى ەۆگەني اگاپوۆ ءسوز الىپ, ەلباسىن ۇلىقتاۋ راسىمىمەن شاراعا قاتىسۋشىلاردى قۇتتىقتادى. ەلىمىزدىڭ بارلىق بولاشاق ىلگەرىلەۋى «ماڭگىلىك ەل» ۇلتتىق يدەياسىن جۇزەگە اسىرۋدان تامىر تارتاتىنىن ايرىقشا اتاپ ءوتىپ, جاستاردى جاڭا ىستەرگە شاقىردى.
وسى جوعارى وقۋ ورنىنىڭ وقىتۋشىسى بەكزات مولدين مەن ستۋدەنتى ۆاديم مەدوۆششيكوۆ تا جينالعاندارعا قۇتتىقتاۋ ءسوز ارنادى. سونداي-اق, ەلباسى العا قويعان مىندەتتەردى ورىنداۋدا جاستار, سونىڭ ىشىندە بۇگىنگى ستۋدەنتەردىڭ الدىنا ۇلكەن مىندەتتەر قويىلاتىنىن جەتكىزدى. فلەشموبتىڭ سوڭىندا شاراعا قاتىسۋشىلار «اتامەكەن» ءانىن قوسىلا شىرقادى.
ساتىبالدى ءساۋىرباي.
دەرەك: egemen.kz.
سۋرەت: ماكسيم توكار.
