اتالعان ەلدىڭ قايعىسىنا ورتاقتاسىپ, مەملەكەت باسشىسى قاسىم-جومارت توقاەۆ يسپانيا كورولىنە كوڭىل ايتۋ جەدەلحاتىن جولداعان ەدى. «وسىنداي اۋىر ساتتە سىزگە, جاقىندارىنان ايىرىلعان وتباسىلارعا قازاقستان حالقىنىڭ جانە ءوزىمنىڭ اتىمنان كوڭىل ايتامىن. زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك بىلدىرەمىن», دەلىنگەن پرەزيدەنت جەدەلحاتىندا.
مۇنداي جويقىن سۋ تاسقىنى ەلدە كەيىنگى 50 جىلدا بولماعان. ءبىرىنشى كۇنى-اق 95 ادام قازا بولعان. لاي اعىنىنان كاستيليا-لا-مانچا جانە اندالۋسيا ايماقتارىنىڭ دا كوشەلەرى عيماراتتار مەن كولىكتەردىڭ ۇيىندىلەرىنە اينالعان. مىڭداعان ادام ەۆاكۋاتسيالاندى. ءالى دە قۇتقارۋشىلار جەتە الماعان اۋماقتار بار.
ىزدەۋ-قۇتقارۋ جۇمىستارىنا اسكەريلەر, اۆياتسيا مەن دروندار تارتىلعان. توسىننان كەلىپ, ەلدى توسىرقاتقان تاسقىننان زارداپ شەككەندەرگە پسيحولوگتەر كومەك كورسەتىپ جاتىر. مىڭداعان ۆولونتەر جەدەل ارەكەت ەتىپ, تۇرعىندارعا ازىق-ت ۇلىك, قاجەتتى زاتتاردى جەتكىزىپ, اۋماقتاعى قوقىستى تازالاۋعا كىرىسكەن. كەي تۇرعىندار, جەرگىلىكتى ساياساتكەرلەر بيلىك تاراپىنان ەسكەرتۋ مەن جەدەل شارالاردىڭ كەشىگىپ جاسالعانىن سىنعا الدى. ۆالەنسيا ايماعىنىڭ ۇكىمەتى تۇرعىنداردى سۋ تاسقىنى تۋرالى العاشقى حابارلامانى سەگىز ساعات وتكەن سوڭ, ەلدىڭ مەتەورولوگيالىق قىزمەتى ايماقتاعى «وتە قاۋىپتى» دەگەن ەسكەرتپەنى جاريالاعاننان كەيىن 10 ساعاتتان سوڭ SMS حابارلاما جىبەرگەنىن مويىندادى.
ەلدىڭ پرەمەر-ءمينيسترى پەدرو سانچەستىڭ حابارلاۋىنشا, قازىرگە دەيىن توتەنشە جاعدايلار كۇشتەرى 4 800-گە جۋىق ادامدى قۇتقارىپ, 30 مىڭنان اسا ادامعا كومەك كورسەتكەن. سونداي-اق ول جوعالعان ادامداردى ىزدەۋگە كومەكتەسۋ ءۇشىن مادريدتەن, يسپانيانىڭ باسقا بولىكتەرىنەن 5 مىڭعا جۋىق سارباز كەلگەنىن, تاعى دا 5 مىڭ اسكەري قىزمەتكەر جونەلتىلۋىن كۇتىپ وتىرعانىن ايتتى.
ۆالەنسياداعى ەڭ ءىرى ساۋدا ورتالىعى, 5 700 كولىك ورنى بار Bonaire-ءدىڭ كولىك تۇراعىن 3 مەترلىك دەڭگەيدە سۋ باسقان. سوعان قاراماستان قۇتقارۋ توپتارى مەن ءورت سوندىرۋشىلەر كۇش بىرىكتىرىپ, جەراستى گاراجدارىنداعى سۋ مەن لايدى شىعارۋعا ايانباي ەڭبەكتەنىپ جاتىر.
تابيعي اپاتتان قاتتى زارداپ شەككەن اۋدانداردا مەكتەپتەر مەن نەگىزگى قىزمەت كورسەتۋ ورىندارىنىڭ جۇمىسى توقتادى. تولاسسىز نوسەر جاۋىننان كەيىن مادريد جانە بارسەلونامەن تەمىرجول قاتىناسى ۇزىلگەن. 31 قازاننان باستاپ ەلدە ءۇش كۇندىك ازا تۇتۋ كۇنى جاريالانعان.
ساراپشىلار اپاتتى كۇن رايىنىڭ كۇرت بۇزىلۋىن كليماتتىڭ وزگەرۋىمەن بايلانىستىرىپ وتىر. ياعني جەرورتا تەڭىزىندەگى تەمپەراتۋرانىڭ جوعارىلاۋىنان بۋلانۋ دەڭگەيى ارتىپ, جاۋىن-شاشىن مولشەرىنە اسەر ەتكەنىن جەتكىزدى. مەتەورولوگتەر بولاشاقتا مۇنداي اپاتتار جيىلەۋى مۇمكىن دەيدى. يسپانيا بيلىگى اپاتتان زارداپ شەككەن ايماقتاردى قالپىنا كەلتىرۋ ءۇشىن ەۋرووداقتان قولداۋ سۇرادى.
ال ءبىزدىڭ سىرتقى ىستەر مينيسترلىگىنىڭ وكىلى ايبەك سمادياروۆتىڭ مالىمدەۋىنشە, يسپانيادا سۋ تاسقىنىنان زارداپ شەككەندەر مەن قازا تاپقاندار اراسىندا قازاقستان ازاماتتارى جوق.
