مينيسترلەر مادەني قارىم-قاتىناستارداعى ەلەۋلى ىلگەرىلەۋدى اتاپ ءوتىپ, ەكى ەل پرەزيدەنتتەرىنىڭ ءوزارا ساپارلارىنىڭ بىرلەسكەن باستامالارعا جاڭا سەرپىن بەرەتىنىن ايتتى.
كەزدەسۋ بارىسىندا تاراپتار مۋزەيلەر جانە مادەني مۇرا سالاسىنداعى ىنتىماقتاستىق نيەتى تۋرالى دەكلاراتسياسىن, سونداي-اق قازاقستان رەسپۋبليكاسىنىڭ ۇلتتىق مۋزەيى مەن گيمە مۋزەيى اراسىنداعى ءوزارا تۇسىنىستىك تۋرالى مەموراندۋمدى قوسا العاندا, بىرقاتار كەلىسىمگە قول قويدى.
«قازاقتىڭ تاريحي جانە مادەني مۇراسىن جاھاندىق گۋمانيتارلىق كەڭىستىككە ناسيحاتتاۋ جانە ينتەگراتسيالاۋ – مەملەكەتتىڭ مادەني ساياساتىنداعى باسىمدىقتاردىڭ ءبىرى», دەدى ا.بالاەۆا.
سونداي-اق عىلىمي زەرتتەۋ سالاسىنداعى ىنتىماقتاستىقتى كۇشەيتۋ, «Courants du Monde» باعدارلاماسى اياسىندا قازاقستاندىق ماماندارعا ارنالعان تاعىلىمدامالار ۇيىمداستىرۋ ۇسىنىلدى.
«پرەزيدەنت توقاەۆتىڭ فرانتسياعا بۇل مەملەكەتتىك ساپارى مادەنيەتكە قاتىستى كوپتەگەن ماسەلەنى قامتيتىنىنا قۋانىشتىمىن. ءبىز بىرنەشە مەموراندۋمعا قول قويدىق. بۇل اراداعى تىعىز ىنتىماقتاستىقتى كورسەتەدى. سونىمەن قاتار گيمە مۋزەيىندە قازاقستاننىڭ ۇلتتىق كورمەسىنىڭ ۇيىمداستىرىلۋى – قارىم-قاتىناستارىمىزدىڭ ناقتىلىعى مەن تيىمدىلىگىنىڭ دالەلى», دەدى ر.داتي.
ءوز كەزەگىندە ا.بالاەۆا جاسالعان كەلىسىمدەر مادەني بايلانىستاردىڭ ودان ءارى تەرەڭدەي تۇسۋىنە ىقپال ەتىپ, قازاقستان مەن فرانتسيا اراسىنداعى قارىم-قاتىناستاردى نىعايتاتىن جاڭا بىرلەسكەن جوبالارعا نەگىز بولاتىنىنا سەنىم ءبىلدىردى.
ء«بىز كينووندىرىس سالاسى, قازىرگى زامانعى قازاق ادەبيەتىن فرانتسيادا جانە فرانتسۋز ادەبيەتىن بىزدە تانىستىرۋ, كونتسەرتتىك ۇيىمداردىڭ ءوزارا ءىس-قيمىلى جانە بالالار كونتەنتىنە قاتىستى بىرلەسكەن مادەني ءىس-شارالار وتكىزۋ مۇمكىندىكتەرىن قاراستىرۋىمىزعا بولادى», دەدى مينيستر.
بۇعان قوسا كەزدەسۋدە مۋزەي ساراپتاماسى بويىنشا تاجىريبە الماسۋ, تاريحي مۇرانى ساقتاۋ جانە مۋزەي ىسىنە جاڭا تەحنولوگيالاردى ەنگىزۋ ماسەلەلەرى تالقىلاندى. ەكى ەلدىڭ مينيسترلەرى كرەاتيۆتى يندۋستريا, ونىڭ ىشىندە ءسان سالاسىنداعى ىنتىماقتاستىققا قىزىعۋشىلىق تانىتتى. ا.بالاەۆا ۇلتتىق ءسان ونەرىنە جانە ونىڭ الەمدىك دەڭگەيدەگى كورسەتىلىمىنە نازار اۋدارۋدى ۇسىندى.
