الماتى. 29 ءساۋىر. قالا جاستارى استانادا وتكەن ەلباسىن ۇلىقتاۋ سالتاناتىنا وراي تۇڭعىش پرەزيدەنت ساياباعىندا فلەشموب ۇيىمداستىردى. بۇل تۋرالى egemen.kz حابارلادى.
يگىلىكتى باستامانىڭ العى شەبىندە تۇرعان جاستار ەلباسىنىڭ ارقاشان دا وزدەرىنە يىق سۇيەتىنىن ماقتانىشپەن اتاپ ءوتتى. قىزدار پەداگوگيكالىق ۋنيۆەرسيتەتىنىڭ 3- كۋرس ستۋدەنتى تولعاناي بەكمۇقا پرەزيدەنت سايلاۋى كەزىندە ۋنيۆەرسيتەتتەگى بارلىق زامانداستارىنىڭ ۇيىمشىلدىقپەن داۋىس بەرىپ, زور بەلسەندىلىك تانىتقانى تۋرالى اڭگىمەلەدى.
پرەزيدەنتتى ۇلىقتاۋ سالتاناتىن تەلەديداردان تاماشالاپ بولىسىمەن, جاستار فلەش-موبىنا كەلگەن تولعانايدىڭ قۇربىلارى ايدىنگۇل ايتۋعان مەن ايگەرىم بوستان: «ءبىز – پرەزيدەنتكە سەنەمىز, پرەزيدەنت – بىزگە, جاستارعا سەنسىن!» دەدى ءبىراۋىزدان.
شاراعا 1000-نان استام الماتى جاستارى جينالدى. ولاردىڭ ىشىندە ستۋدەنتتەر, مەملەكەتتىك ەمەس ۇيىمداردىڭ وكىلدەرى, قازاقستان حالقى اسسامبلەياسىنىڭ مۇشەلەرى بار.
ەلباسىن ۇلىقتاۋ سالتاناتىن قولداپ, ازاماتتىق ۇستانىم تانىتقان الماتىلىق جاستار, سازدى مۋزىكا ىرعاعىمەن الاڭدا جۇگىرە ءجۇرىپ ەلدىڭ كوك تۋىن, بۇركىت پەن كۇننىڭ كەسكىنىن ورنەكتەپ سالىپ, حالىق بىرلىگىن دارىپتەدى.
تالعات ءسۇيىنباي.
دەرەك, سۋرەت: egemen.kz.
