كورمە جۇمىسىن مۋزەي ديرەكتورى نۇربەك نۇرالين اشىپ, تاعلىمدىق ءىس-شارانىڭ باستى ماقساتىنا توقتالىپ, ونىڭ ءمانى مەن ماڭىزى جايلى كەڭىنەن اڭگىمەلەپ بەردى. كوركەمسۋرەت اكادەمياسىنىڭ كوررەسپوندەنت مۇشەسى, تانىمال سۋرەتشى دۋلات قوسپانوۆ, سۋرەتشىلەر وداعىنىڭ مۇشەلەرى يۋري پوپوۆ, ماگومەد كوكۋرحوەۆتىڭ كارتينالارى كورەرمەن نازارىن باۋراپ الدى. اسىرەسە, دۋلات قوسپانوۆتىڭ «وقجەتپەس», «قاراساي باتىر مەن اعىنتاي باتىر», «قىز قۋ» اتتى كارتينالارى قازاق حالقىنىڭ وتكەن تاريحىن بەينەلەيتىن تاماشا تۋىندىلار رەتىندە باعالاندى.
تاريحي وبرازدارعا تولى تۋىندىلاردا قازاقتىڭ قايسارلىعى, قاراپايىمدىلىعى, وجەتتىلىگى, ورلىگى, كەڭدىگى ايشىقتى سۋرەتتەلگەن. ال قولدانبالى ونەر سالاسىندا بەلگىلى ءمۇسىنشى يۋري پوپوۆتىڭ «پود گولۋبىم نەبوم», «ستارتسى», «دەرۆيش. بلاگايا ۆەست» اتتى شىعارمالارىن ەرەكشە اتاپ وتۋگە بولادى. اۆتوردىڭ قۇم مەن سازدىڭ كۇيدىرىلگەن قوسىندىسىنان جاساعان مۇسىندەرى دە بىرىنەن-ءبىرى اجارلى, مازمۇندى ەكەندىگىن ايتۋ كەرەك. سونداي-اق, ونەر سۇيەر قاۋىم ماگومەد كوكۋرحوەۆتىڭ «تۇلپار قاناتى», ء«ۇش اپالى-ءسىڭلىلى» كارتينالارى دا شىنايى وبرازدارعا تولى تاماشا تۋىندىلار. سۋرەتتەر مايلى بوياۋمەن سالىنىپ, ءبىر-بىرىمەن ۇيلەسىم تاپقانداي. قىلقالام شەبەرلەرىنىڭ كارتينالارىن وقۋشىلار قىزىعا تاماشالادى.
كورمە بارىسىندا سۋرەتشىلەر وداعىنىڭ مۇشەسى دۋجان ماعزۇموۆتىڭ دا «تاڭ ءسارى», «ۇندەستىك», «تۇركى» شاعارمالارى جۇرتشىلىق تالعامىنان شىقتى. ماسەلەن, «تاڭ ءسارى» پولوتناسىندا قىزىل جانە كوك بوياۋلاردى قولدانعان شەبەر كومپوزيتسيالىق تۇتاستىقتى ۇتىمدى كورسەتە بىلگەن. تاعى ءبىر ايتا كەتەرلىگى, كورمە بارىسىندا قوناقتاردى اتالمىش مۋزەيدىڭ عىلىمي قىزمەتكەرى گۇلزايرا ءسابيتوۆا جادىگەرلەر زالىمەن تانىستىردى. مۇندا قارۋ-جاراقتار مەن ەر-تۇرمان, اشەكەي بۇيىمدار, قولجازبالار, قازبا جۇمىستارى بارىسىندا تابىلعان قۇتى مەن 500 جىلدىق تاريحى بار ساپتاياق قويىلىپتى. اسىرەسە, سال-سەرىلەر بۇرىشىندا اقان سەرى ارداقتاعان اقتوقتىنىڭ جالمۇقاننان تۋعان بالاسى سۇلتاننىڭ دومبىراسى, سونداي-اق اقتوقتىنىڭ «زينگەر» تىگىن ماشيناسىنا وقۋشىلار قىزىعۋشىلىق تانىتتى.
كيىز ءۇي بۇرىشىنداعى اسەم تۇرمىستىق بۇيىمدار دا كوز جاۋىن الادى. مۇندا دا قازاقستان رەسپۋبليكاسى سۋرەتشىلەر وداعى مەن اكادەمياسىنىڭ مۇشەسى يبراگيم يسەنوۆتىڭ كارتينالارى قاتىسۋشىلاردىڭ قىزىعۋشىلىعىن تۋدىردى. قازاق حاندىعىنىڭ 550 جىلدىعىنا وراي ۇيىمداستىرىلعان سۋرەتشىلەردىڭ كورمەسى ءبىر اي بويى جۇرتشىلىقتىڭ نازارىنا ۇسىنىلاتىن بولادى.
باقبەرگەن امالبەك.
دەرەك: egemen.kz. سۋرەت: تولەگەن قوسشىعۇلوۆ.
