اقمولادا بەلارۋس تەحنيكالارى قۇراستىرىلىپ جاتىر

استانا. 29 قاڭتار. اقمولا وبلىسىنا بەلارۋس رەسپۋبليكاسى ونەركاسىپ مينيسترلىگىنىڭ سىرتقى ەكونوميكالىق قىزمەت باسقارماسىنىڭ باسشىسى ۆلاديمير ۆولچوك باستاعان ءبىر توپ ىسكەر ازاماتتار كەلدى. بۇل تۋرالى egemen.kz ءتىلشىسى حابارلادى. ولاردىڭ اقمولا وبلىسىنا كەلگەن ساپارىنىڭ باستى ماقساتى – ەۋرازيالىق ەكونوميكالىق كەڭەس اياسىندا قۇرىلعان «اۋىل شارۋاشىلىعى جانە كوممۋنالدىق تەحنيكالارىنىڭ قازاقستان-بەلارۋس يندۋستريالدى-تەحنولوگيالىق پاركى» ينۆەستيتسيالىق جوباسىن جۇزەگە اسىرۋ بارىسىمەن تانىسۋ جانە الداعى جوسپارلارىن تالقىلاۋ. اتالعان جوبا 2012 جىلى قولعا الىنا باستادى. مۇنداعى ماقسات بەلارۋس ەلىنىڭ كوممۋنالدىق جانە اۋىل شارۋاشىلىعى سالاسىنىڭ وزىق تەحنيكالارىن ەلىمىزدە قۇراستىرىپ, ەكى ەل اراسىنداعى ساۋدا-ەكونوميكالىق بايلانىستى نىعايتۋ بولىپ تابىلادى. جوبانىڭ ءبىرىنشى كەزەڭىن جۇزەگە اسىرۋ ءۇشىن 2014 جىلى بەلارۋس ەلىنىڭ «مينسك تراكتور زاۋىتى» اشىق اكتسيونەرلىك قوعامى جانە وتاندىق «قازاقستاننىڭ اگرويننوۆاتسيالىق كورپوراتسياسى» جاۋاپكەرشىلىگى شەكتەۋلى سەرىكەستىگى بىرلەسىپ, «متز-قايك» سەرىكتەستىگىن قۇرعان بولاتىن. ال وتكەن جىلى اتالعان جوبا اقمولا وبلىسى اكىمدىگىنىڭ جانىنداعى وڭىرلىك ۇيلەستىرۋ كەڭەسىنىڭ شەشىمىمەن قولداۋ تاۋىپ, يندۋستريالاندىرۋ كارتاسىنا ەنگىزىلدى. سونداي-اق سۋمەن, ەلەكتر قۋاتىمەن جابدىقتاۋ, كارىز جانە جىلۋ جۇيەسى ءتارىزدى ينفراقۇرىلىمدى تارتۋ ماسەلەسى دە وڭ شەشىمىن تاپقان. جالپى, بەلارۋس كومپانياسىنىڭ اقمولا وبلىسىمەن ىسكەرلىك بايلانىسى 2010 جىلدان باستاۋ الادى. وسى ارالىقتا 5 ميلليونعا جۋىق اقش دوللارىنا 7 ءتۇرلى تەحنيكانىڭ 500 داناسى قۇراستىرىلىپ شىعارىلعان. بۇلار نەگىزىنەن وتانداستارىمىز تاراپىنان سۇرانىسقا يە كوممۋنالدىق جانە اۋىل شارۋشىلىعى تەحنيكالارى بولىپ تابىلادى. «قازاقستان ءبىزدىڭ ستراتەگيالىق ارىپتەسىمىز. مۇندا بەلارۋس ونىمدەرىنە سۇرانىس جوعارى. وسىنداعى يندۋستريالدى-تەحنولوگيالىق پارك وسى باعىتتا بىرلەسە ىستەپ جاتقان جۇمىستارىمىزدىڭ جەمىسى. سوندىقتان, الداعى ۋاقىتتا ءونىم كولەمىن ارتتىرۋ جوسپاردا بار. بۇل ەكى جاققا ءتيىمدى ەكەندىگى ءسوزسىز», – دەيدى بەلارۋس رەسپۋبليكاسى ونەركاسىپ مينيسترلىگىنىڭ سىرتقى ەكونوميكالىق قىزمەت باسقارماسىنىڭ باسشىسى ۆلاديمير ۆولچوك. باقبەرگەن امالبەك. دەرەك: egemen.kz. سۋرەت: egemen.kz.