«ۇشتوبە – المالى – كوپبىرلىك» اۆتوموبيل جولىنىڭ جالپى ۇزىندىعى - 176 كم, سونىڭ 137 شاقىرىمى جوندەلدى, ونىڭ 78,5 شاقىرىمىنا جوندەۋ بيىل جۇرگىزىلدى. جولدىڭ قالعان بولىگى قاناعاتتانارلىق جاعدايدا.
اتاپ ايتقاندا, كوپبىرلىكتەن المالى اۋىلىنا دەيىنگى ۇزىندىعى 28 كم جول ۋچاسكەسىنە 2021 جىلى ورتاشا جوندەۋ جاسالدى. جولدىڭ قالعان بولىگىنىڭ قۇرىلىسى ءتورت بولىككە بولىنگەن.
«وتكەن جىلى جالپى ۇزىندىعى 30 كم بولاتىن 5 كم-دەن 35 كم-گە دەيىنگى ۋچاسكە جوندەلدى. بۇگىندە اۆتوتراسسانىڭ 40 شاقىرىمىنا, ياعني 90-147 شاقىرىم ۋچاسكەسىنە اسفالت توسەلدى. قازىرگى كەزدە اباتتاندىرۋ جۇمىستارى ءجۇرىپ جاتىر. اتاپ ايتقاندا, جول جيەگى نىعايتىلىپ, بەلگىلەر ورناتىلۋدا. جۇمىستار 10 قاراشاعا دەيىن بىتەدى. جوندەۋ جۇمىستارى تراسسانىڭ ەكىنشى جانە ءۇشىنشى ۋچاسكەلەرىندە دە اياقتالدى. بۇل نىساندار پايدالانۋعا بەرىلدى. ءسويتىپ «ۇشتوبە – المالى – كوپبىرلىك» جولىنىڭ بارلىق اتالعان ۋچاسكەلەرىنە اسفالت توسەلدى. جوبانىڭ قۇنى 4,9 ملرد. تەڭگەدەن اسادى. جول 3-ءشى ساناتتى, ءجۇرۋ بولىگىنىڭ ەنى 7 مەتر», دەدى بەيبىت يساباەۆقا جول قۇرىلىسى تۋرالى بايانداعان وبلىستىق جولاۋشى كولىگى جانە اۆتوموبيل جولدارى باسقارماسىنىڭ باسشىسى عالىمجان دارىباەۆ.
باسقارما باسشىسىنىڭ بايانداماسىن تىڭداعان وبلىس اكىمى جوندەۋ جۇمىستارىنىڭ ساپالى اتقارىلعانىن اتاپ ءوتىپ, مەردىگەر كومپانيا جۇمىسشىلارىنا ءىستى ۋاقىتىلى اياقتاعانى ءۇشىن ريزاشىلىعىن جەتكىزدى.
«حالىقپەن كەزدەسۋ كەزىندە تۇرعىندار كوپبىرلىك اۋىلىنا باراتىن جولدىڭ ماسەلەسىن كوتەرگەن بولاتىن. وسىعان بايلانىستى جولدى جوندەۋگە قاتىستى ناقتى شارالار قابىلدادىق. قازىر جول تولىق جوندەلىپ ءبىتتى. بۇل تراسسامەن جۇك كولىكتەرى كوپ جۇرمەيتىندىكتەن جانە جۇمىس ساپالى ورىندالعاندىقتان, جول كەمىندە ون جىل قىزمەت ەتەدى. كوپبىرلىك – شالعايدا جاتقان اۋىل. الدىمەن ونىڭ جولىتن جاسادىق, سوسىن اۋىز سۋ ساپاسىن جاقسارتتىق. ءبىزدىڭ بۇدان ءارى دە شالعايداعى جانە شەكارالىق اۋىلداردى دامىتۋعا باعىتتالعان ناقتى جوسپارلارىمىز بار», دەدى ب. يساباەۆ.
بۇل رەتتە تۇرعىندار دا پىكىر ءبىلدىردى:
ء«وزىم بايشەگىر اۋىلىندا تۇرامىن. وتىز جىل كولەمىندە جولىمىز جوندەۋ كورمەدى. ءبىزدىڭ دە, كوپبىرلىك اۋىلى تۇرعىندارىنىڭ دا جولدىڭ ساپاسىنا كوڭىلىمىز تولدى. قازىر مەن سياقتى كولىك جۇرگىزۋشىلەرى اۋدان ورتالىعىنا 1 جارىم ساعاتتا جەتەمىز», دەيدى تۇرعىن ءتۇتىنتاي ءمۇساپىروۆ.
اتاپ وتسەك, كەلەسى جىلى «ۇشتوبە – المالى – كوپبىرلىك» جولىنىڭ 145-ءشى ۋچاسكەسىندەگى المالى كوپىرى جاڭعىرتىلادى.
جالپى جاقسى جانە قاناعاتتانارلىق جاعدايداعى وبلىستىق ماڭىزى بار جولداردىڭ ۇلەسى جىلدىڭ سوڭىنا قاراي 94% جەتەدى.
