فوتو: ۇكىمەتتىڭ ءباسپاسوز قىزمەتى
افريكا, تاياۋ شىعىس جانە ورتالىق ازيا وڭىرلەرى بويىنشا Alstom فرانتسۋز كومپانياسىنىڭ پرەزيدەنتى ەندريۋ دەلەونيمەن ءوندىرىستى ودان ءارى لوكاليزاتسيالاۋ جانە جاڭا ينۆەستيتسيالىق جوبالاردى ىسكە قوسۋ جوسپارلارى تالقىلاندى.
ايتا كەتەيىك, Alstom – ەلىمىزدىڭ تەمىرجول يندۋسترياسىنىڭ نەگىزگى ينۆەستورى. 10 جىل ىشىندە كومپانيا قۇرىلىسقا, تەحنولوگيالار ترانسفەرتى مەن قازاقستاندىق مامانداردى وقىتۋعا شامامەن €120 ملن ينۆەستيتسيا سالدى. 1 مىڭنان استام ادام جۇمىس ورنىمەن قامتاماسىز ەتىلدى. استانادا 7 وندىرىستىك بازا اشىلدى, ونىڭ ىشىندە جولاۋشىلار جانە اۋىر جۇك ەلەكتروۆوزدارىن وندىرەتىن «ەلەكتروۆوز قۇراستىرۋ زاۋىتى» بار.
فرانتسۋز كومپانياسى 450-دەن استام جاڭا جۇمىس ورىندارىن اشا وتىرىپ, ەلەكتروۆوزعا تەحنيكالىق قىزمەت كورسەتەتىن ءتورت ورتالىقتىڭ قۇرىلىسىن باستادى. جوبانىڭ جالپى سوماسى €50 ملن-دى قۇرايدى, شۋ قالاسىندا العاشقى سەرۆيستىك ورتالىقتىڭ اشىلۋى 2025 جىلعا جوسپارلانعان.
زاۋىت قازاقستان مەن تمد نارىعىن باعىندىرىپ, ءوز ورنىن ساتىمەن يەلەندى. شىعىستان باتىسقا كونتەينەرلىك تاسىمالدىڭ ارتۋىنا بايلانىستى شىعارىلاتىن ونىمگە سۇرانىس ارتتى. بۇگىنگى تاڭدا ءوندىرىس كولەمى بويىنشا كاسىپورىن قازاقستاندا تەمىرجول ماشيناسىن جاساۋ سەكتورىندا شامامەن 30%-دى الادى.
Alstom باسشىسى ەندريۋ دەلەوني قازاقستاننىڭ ينۆەستيتسيالىق ساياساتىن قولدايتىنىن مالىمدەپ, ەلىمىزدە بيزنەس ءۇشىن جاسالىپ جاتقان جاعدايلار وندىرىستىك قۋاتتى كەڭەيتۋگە ىقپال ەتەتىنىن اتاپ ءوتتى. سونداي-اق قازاقستاندا يندۋستريالىق جانە كولىكتىك-لوگيستيكالىق الەۋەتىن دامىتۋعا باعىتتالعان ىنتىماقتاستىقتى كەڭەيتۋ كەلەشەگىنە نازار اۋدارىلدى, ونىڭ ىشىندە قتج-مەن ارىپتەستىك ماسەلەلەرى تالقىلاندى.
Wabtec امەريكالىق كومپانياسىنىڭ پرەزيدەنتى رافاەل سانتانامەن كەزدەسۋ بارىسىندا تەمىرجول سالاسىنا «جاسىل» تەحنولوگيالاردى ەنگىزۋ ماسەلەلەرى قارالدى. كومپانيا قازاقستاننىڭ ۇزاقمەرزىمدى ينۆەستيتسيالىق سەرىكتەسى سانالادى ءارى ەلىمىزدە لوكوموتيۆتەر ءوندىرىسىن لوكاليزاتسيالاۋدى دامىتۋدا. «لوكوموتيۆ قۇراستىرۋ زاۋىتى» – ورتالىق ازياداعى تەمىرجول كولىگى ماشيناسىن جاساۋ سالاسىنداعى كوشباسشى.
زاۋىت ىشكى نارىقتىڭ قاجەتتىلىكتەرىن قامتاماسىز ەتىپ قانا قويماي, ازەربايجان, تاجىكستان, تۇرىكمەنستان, قىرعىزستان, موڭعوليا جانە باسقا دا ەلدەرگە ەكسپورتتالاتىن جۇك, جولاۋشىلار جانە مانەۆرلىك لوكوموتيۆتەر شىعارادى. زاۋىتتا 800-دەن استام جۇمىس ورنى اشىلدى. قىزمەتكەرلەر اقش-تا وندىرىستەن قول ۇزبەي وقىتىلادى, سودان كەيىن ايماقتىق جانە جاھاندىق جوبالارعا قاتىسادى. بيىلعى ماۋسىم ايىندا استانادا جاڭا ينجەنەرلىك ورتالىق اشىلدى, وندا بالامالى ەنەرگيا كوزدەرىندە «جاسىل» لوكوموتيۆتەر ءوندىرۋ جۇمىسى جۇرگىزىلۋدە. جالپى, كومپانيا 2027 جىلدان باستاپ كەلەسى 10 جىل ىشىندە بالامالى وتىن تۇرلەرىن قولدانا وتىرىپ, جاڭا ونىمدەردى دامىتۋعا شامامەن $200 ملن ينۆەستيتسيا سالۋعا نيەتتى.
«مەملەكەت باسشىسى شەتەلدىك ينۆەستورلار كەڭەسى وتىرىسىندا سويلەگەن سوزىندە قازاقستاننىڭ نەگىزگى ەۋرازيالىق ترانزيتتىك حاب رەتىندە ەلدىك پوزيتسيالاردى نىعايتۋعا باعىتتالعانىن اتاپ كورسەتتى. ەلىمىزدە كولىك-لوگيستيكالىق سەكتوردى دامىتۋعا, ينفراقۇرىلىمدى جاڭارتۋعا جانە ماشينا جاساۋدى لوكاليزاتسيالاۋعا ەرەكشە نازار اۋدارىلادى. ءبىز ءوندىرىستى لوكاليزاتسيالاۋعا باعىتتالعان بيزنەس باستامالارىن جوعارى باعالايمىز جانە وسىنداي كومپانيالارعا قولداۋ كورسەتۋگە دايىنبىز. مۇنداي جوبالاردى ىسكە اسىرۋ قازاقستانعا لوكوموتيۆتەردى ءوندىرۋ جانە جاڭعىرتۋ حابىنا اينالۋعا جانە جەتكىزۋشىلەردىڭ جاھاندىق تىزبەگىنە ەنۋگە مۇمكىندىك بەرەدى», دەدى ولجاس بەكتەنوۆ.
