نۇرسۇلتان نازارباەۆتىڭ قازاقستان پرەزيدەنتى لاۋازىمىنا رەسمي كىرىسۋ ءراسىمى

استانا. 29 ءساۋىر. بۇگىن استاناداعى تاۋەلسىزدىك سارايىندا قازاقستان پرەزيدەنتى بولىپ قايتا سايلانعان نۇرسۇلتان نازارباەۆتى ۇلىقتاۋ ءراسىمى ءوتتى. بۇل تۋرالى akorda.kz حابارلادى. ءىس-شارا مەملەكەتتىك تۋ مەن پرەزيدەنت بايراعىنىڭ, سونداي-اق, قازاقستان رەسپۋبليكاسى كونستيتۋتسياسىنىڭ تاۋەلسىزدىك سارايىنىڭ ۇلكەن زالىنا سالتاناتتى جاعدايدا اكەلىنۋىنەن باستالدى. مەملەكەت باسشىسىنىڭ كورتەجى «اقوردا» رەزيدەنتسياسىنان تاۋەلسىزدىك سارايىنىڭ باسقى ەسىگىنىڭ الدىنا كەلدى. وسى جەردە جاڭادان سايلانعان قازاقستان رەسپۋبليكاسى پرەزيدەنتىنە مەملەكەتتىك كۇزەت قىزمەتىنىڭ باستىعى ا.كۇرەڭبەكوۆ راپورت بەردى. نۇرسۇلتان نازارباەۆ ارتيللەريالىق وت-شاشۋ بولىپ جاتقان كەزدە تاۋەلسىزدىك سارايىنا كىردى. تاۋەلسىزدىك سارايىنىڭ ۇلكەن زالىندا كونستيتۋتسيالىق كەڭەس توراعاسى ي.روگوۆ كونستيتۋتسيانىڭ 42-بابىنا سايكەس, قازاقستان رەسپۋبليكاسىنىڭ پرەزيدەنتى حالىققا انت بەرگەن ساتتەن باستاپ لاۋازىمىنا كىرىسەتىنىن مالىمدەدى. نۇرسۇلتان نازارباەۆ وڭ قولىن كونستيتۋتسياعا قويىپ: «قازاقستان حالقىنا ادال قىزمەت ەتۋگە, قازاقستان رەسپۋبليكاسىنىڭ كونستيتۋتسياسى مەن زاڭدارىن قاتاڭ ساقتاۋعا, ازاماتتاردىڭ قۇقىقتارى مەن بوستاندىقتارىنا كەپىلدىك بەرۋگە, قازاقستان رەسپۋبليكاسى پرەزيدەنتىنىڭ وزىمە جۇكتەلگەن مارتەبەلى مىندەتىن ادال اتقارۋعا سالتاناتتى تۇردە انت ەتەمىن!», – دەپ, مەملەكەتتىك تىلدە انت قابىلدادى. سودان كەيىن ەلباسى مەملەكەتتىك تۋدى ءسۇيدى. مەملەكەتتىك گيمندى ورىنداۋ بارىسىندا 21 رەت زەڭبىرەكتەردەن وق اتىلدى. ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ نۇرسۇلتان نازارباەۆقا قازاقستان رەسپۋبليكاسى پرەزيدەنتىنىڭ كۋالىگىن تاپسىردى. مەملەكەت باسشىسى ۇلىقتاۋ راسىمىندە سويلەگەن سوزىندە پرەزيدەنت سايلاۋى قوعام بىرلىگىنىڭ قۋاتىن پاش ەتكەنىنە توقتالدى. «قازاقستاندىقتار ماعان ۇلى سەنىم كورسەتىپ, وتانعا تاعى قىزمەت ەتۋگە شاقىردى. ءبىز كۇردەلى جولدى بىرگە ءجۇرىپ وتتىك: وزىمىزگە سەنىپ, تاۋەلسىزدىگىمىزدى الدىق, مەملەكەت قۇرىپ, الەمگە جاڭا قازاقستاننىڭ ەسىگىن اشتىق, ءوزىمىزدى ءبىرتۇتاس ۇلى ۇلت رەتىندە تانىتتىق. سىزدەردىڭ سەنىمدەرىڭىز مەنى ءاردايىم شابىتتاندىردى, سەنىمدىلىك پەن كۇش-قۋات بەردى. قازىر بارلىق جاۋاپكەرشىلىكپەن ايتقىم كەلەدى: بۇعان دەيىنگى جىلدارداعى سياقتى حالىققا ادال قىزمەت ەتىپ, ەلدىڭ جانە بارلىق ازاماتتارىمىزدىڭ اماندىعىن ساقتاپ, جالپىۇلتتىق بيىك مۇددەلەرىمىزدى قورعايتىن بولامىن, – دەدى قازاقستان پرەزيدەنتى. نۇرسۇلتان نازارباەۆ ەلدىڭ ءارى قاراي دامۋىنا قاتەر توندىرەتىن بىرقاتار سىرتقى ىقپالدارعا نازار اۋداردى. «بۇل – الەم قالپىنىڭ داعدارىسى مەن جالپى بەلگىسىزدىكتىڭ ءورشۋى. الەمدىك ەكونوميكانىڭ تۋربۋلەنتتىلىگى جالعاسۋدا. سانكتسيالىق, «ۆاليۋتالىق» جانە ساۋدا سوعىستارى بارلىق ەلدەردە جاعدايدى ۋشىقتىرۋدا. كليماتتىڭ وزگەرۋ ۇدەرىسى بۇگىندە بولجاپ بولمايتىن سالدارلارعا, ءتۇرلى اپاتتارعا باستاۋدا. ورتالىق ازياعا الەمدىك ءبولىنىستىڭ جاڭا وزگەرىستەرى اسەرىن تيگىزۋى مۇمكىن, بۇل دا – بۇكىل ءوڭىر ءۇشىن قاتەر. جاھاندىق قالىپتىڭ داعدارىسى مەن الەمدىك ەكونوميكاداعى تۇراقسىزدىق وسى سىن-قاتەرلەرمەن كۇرەستەگى حالىقارالىق ۇيلەستىرۋ ماسەلەسىن دارمەنسىز ەتە تۇسەدى», – دەدى مەملەكەت باسشىسى. قازاقستان پرەزيدەنتى رەفورمالاردى ورىنداۋ ءۇشىن كۇش-جىگەر جۇمىلدىرۋ قاجەتتىگىن ايتتى. «تاياۋ ارادا ەل پرەزيدەنتىنىڭ جانىنان جاڭعىرتۋ جونىندەگى ۇلتتىق كوميسسيا قۇرىلاتىن بولادى. ونىڭ ماقساتى – بەس رەفورمانىڭ كەزەڭ-كەزەڭىمەن جۇزەگە اسىرىلۋىن باسقارۋ جانە مەملەكەتتىك ورگانداردىڭ, بيزنەس سەكتورى مەن ازاماتتىق قوعامنىڭ ءىس-قيمىلىن ۇيلەستىرۋ. ۇلتتىق كوميسسيا جانىندا قۇرامىنا بەدەلدى شەتەلدىك جانە قازاقستاندىق ساراپشىلار كىرگەن حالىقارالىق كونسۋلتاتيۆتىك كەڭەس ارەكەت ەتەتىن بولادى. بۇل ەڭ وزىق حالىقارالىق تاجىريبەنى پايدالانۋعا سەپتىگىن تيگىزەدى», – دەدى نۇرسۇلتان نازارباەۆ. بۇدان بولەك, مەملەكەت باسشىسى كوميسسيانىڭ ءبىرىنشى وتىرىسىندا «مەملەكەت قۇرۋ ىسىندەگى ەندىگى 100 ناقتى قادام» ۇلت جوسپارى تانىستىرىلاتىنىن ايتتى. «100 قادام» – ءبىزدىڭ جاھاندىق جانە ىشكى سىن-قاتەرلەرگە قارسى جاۋابىمىز, سونىمەن بىرگە دامىعان وتىز مەملەكەتتىڭ قاتارىنا جاڭا تاريحي جاعدايلاردا قوسىلۋ جونىندەگى جوسپار», – دەدى قازاقستان پرەزيدەنتى. سوڭىندا نۇرسۇلتان نازارباەۆ قازاقستان مەملەكەتتىڭ كۇش-قۋاتى مەن حالىقتىڭ دانالىعىنا سۇيەنە وتىرىپ, بارلىق مىندەتتەردى جۇزەگە اسىرا الاتىنىن ايتتى. «مەن ۇلتقا ءوزىم جاريالاعان رەفورمالارعا كەڭىنەن اتسالىسۋ جونىندە ءسوز ارنايمىن. «رەسپۋبليكا» ءسوزى لاتىن تىلىنەن تىكەلەي «ورتاق ءىس» دەپ اۋدارىلادى. قازاقستاننىڭ جاڭعىرتىلۋى – ءبىزدىڭ ورتاق ءىسىمىز», – دەدى مەملەكەت باسشىسى. ءسوزىن اياقتاعاننان كەيىن ەل پرەزيدەنتى – قازاقستان رەسپۋبليكاسىنىڭ جوعارعى باس قولباسشىسى تاۋەلسىزدىك سارايى الدىنداعى الاڭدا قورعانىس ءمينيسترى يمانعالي تاسماعامبەتوۆتىڭ راپورتىن قابىلدادى. مەملەكەت باسشىسىنىڭ الدىنان قازاقستان رەسپۋبليكاسى قارۋلى كۇشتەرىنىڭ وكىلدەرى سالتاناتتى شەرۋمەن ءجۇرىپ ءوتتى. ۇلىقتاۋ راسىمىنە جوعارعى سوت سۋديالارى, قازاقستان رەسپۋبليكاسى پارلامەنتىنىڭ دەپۋتاتتارى, پرەزيدەنت اكىمشىلىگى مەن پرەمەر-مينيستر كەڭسەسىنىڭ وكىلدەرى, قازاقستاندا تىركەلگەن ديپلوماتيالىق وكىلدىكتەر مەن حالىقارالىق ۇيىمداردىڭ باسشىلارى, مەملەكەتتىك باسقارۋدىڭ ورتالىق ورگاندارى باسشىلارى, ۇكىمەت مۇشەلەرى, جاۋاپتى حاتشىلار, وبلىستاردىڭ, استانا مەن الماتى قالالارىنىڭ اكىمدەرى, قازاقستان حالقى اسسامبلەياسىنىڭ مۇشەلەرى, ءدىني كونفەسسيالار وكىلدەرى, رەسپۋبليكالىق بيۋدجەتتىڭ ورىندالۋىن باقىلاۋ جونىندەگى ەسەپ كوميتەتىنىڭ مۇشەلەرى, ورتالىق سايلاۋ كوميسسياسىنىڭ مۇشەلەرى, كونستيتۋتسيالىق كەڭەس مۇشەلەرى, پرەزيدەنتتىككە كانديداتتار, رەسپۋبليكالىق جانە وڭىرلىك قوعامدىق شتاب, سايلاۋدى باقىلاۋ جونىندەگى رەسپۋبليكالىق قوعامدىق كوميسسيا مۇشەلەرى, «نۇر وتان» پارتياسىنىڭ باسشىلىعى, تۇڭعىش پرەزيدەنت مەكەمەلەرى مەن ۇيىمدارىنىڭ جەتەكشىلەرى, دەموكراتيالىق كۇشتەردىڭ «قازاقستان-2050» جالپىۇلتىق كواليتسياسى مۇشەلەرى, «حالىق قاھارمانى» جانە «ەڭبەك ەرى» اتاعى يەگەرلەرى, ەل گەنەراليتەتى, سەنىمدى وكىلدەر, قوعامدىق-ساياسي بىرلەستىكتەر مەن ۇكىمەتتىك ەمەس ۇيىمدار جەتەكشىلەرى, رەسپۋبليكالىق بۇقارالىق اقپارات قۇرالدارىنىڭ باسشىلارى, كورنەكتى عىلىم, مادەنيەت جانە ونەر قايراتكەرلەرى, رەسپۋبليكانىڭ ىسكەر توپتار وكىلدەرى, جاستار ۇيىمدارىنىڭ كوشباسشىلارى قاتىستى. ءىس-شاراعا بارلىعى 3 000-عا جۋىق ادام شاقىرىلدى. قازاقستان رەسپۋبليكاسى پرەزيدەنتىنىڭ سايلاۋى 2015 جىلعى 26 ساۋىردە ءوتتى. قازاقستان رەسپۋبليكاسى ورتالىق سايلاۋ كوميسسياسىنىڭ مالىمەتى بويىنشا, داۋىس بەرۋگە 9 090 920 ادام نەمەسە سايلاۋشىلاردىڭ 95,21 پايىزى قاتىسقان. نۇرسۇلتان نازارباەۆ سايلاۋشىلاردىڭ 8 833 250 داۋسىنا يە بولدى, بۇل – داۋىس بەرۋ راسىمىنە قاتىسقان سايلاۋشىلار داۋسىنىڭ  97,75 پايىزى. ەلامان قوڭىر. دەرەك: akorda.kz. سۋرەت: tengrinews.kz.