چەمپيوناتتاعى ەڭ ءىرى جەڭىس

ول پورتۋگاليا مەن كحدر قۇرامالارى اراسىندا بولدى. ەسەپ – 7:0 كوزى تىرىسىندە-اق ادامزاتتىڭ ايتماتوۆتى اتانعان شوڭ قىرعىز شىڭعىس تورەقۇل ۇلى جولداستا­رى­مەن بىشكەكتەگى ءبىر كافەگە كىر­گەن ەكەن. ءبىرتالاي كىسى امانداس­قانعا ۇقسايدى, ءبىرتالايى تاماق­تان باسىن كوتەرمەپتى. ىلە-شالا جۇرت ابىر-دابىر بو­لىپ قالادى. شىقاڭ دا ەلەڭ­دەپ ەسىك جاققا قارايدى. مۇرتى ەندى تەبىندەگەن, كەۋدەسى شالقاق ءبىر جاس جىگىت كىرىپ كەلەدى. جۇرت جاپاتارماعاي امان­داسىپ جاتىر. ول باس يزەپ, مارعاۋ كۇيدە بولەك بولمەگە كىرەدى. شىقاڭ اڭ-تاڭ. “بۇل كىم؟” دەيدى عوي قاسىن­داعىلارعا. ولار دا ورەكپىپ وتىر ەكەن. دابىرلاپ كىم ەكەنىن اي­تادى. “سويتسەم, – دەيدى ەستەلىگىندە شىعاڭ, – بۇل ءجى­گىت ءوزىمىزدىڭ بىردە جەڭىپ, بىراق, كوبىرەك جە­ڭى­­لىپ جۇرەتىن “العانىڭ” شابۋىلشىسى ەكەن”. شىقاڭنىڭ وسى ەستەلىگى جادىمىزدا قالىپ قويىپ­تى. الەمگە اتاعى كەتكەن ۇلى جازۋشىنى تاڭقالدىرعان جاعداي فۋتبولدى جانى سۇيەتىندەرگە تاڭسىق ەمەس. پورتۋگاليانىڭ جارتىلاي قورعاۋشىسى كريشتيانۋ رونالدۋ مىنا مەملەكەتكە كەلە جاتىر دەسە, سول جەردىڭ حالقى ۇدەرە كوشىپ, اۋەجايعا بارماعانىمەن ونى ءبىر كورۋدى ارمانداپ, كوشەگە سىيماي تۇرادى. جۇمىر جەردىڭ حالقىنىڭ جارتىسىنان استامى فۋت­بولدى جاقسى كورەدى. الەم چەمپيوناتى كەزىندە ولار­دىڭ قاتارى ودان سايىن كوبەيەدى. ال, “رەالدا” شابۋىل وتىندە ءجۇرىپ, ءوز مەملەكەتىنە كەرەك بولعان جاعدايدا جارتىلاي قورعاۋشى بولۋعا دا كەلىسەتىن كريشتيانۋ رونالدۋ جانكۇيەرلەردىڭ كوز قۇرتى. جارتىلاي قورعاۋشىنىڭ مىندەتى قورعانىس پەن شابۋىلشىلار اراسىنداعى التىن كوپىر. الدىڭعى شەپتى دوپپەن جارىلقاۋ. ول رونالدۋدىڭ قولىنان كەلەدى. كەلگەندە دە مىقتاپ كەلەدى. پورتۋگاليا العاشقى ويىنىندا بەس دۇركىن الەم چەمپيونى برازيلياعا تاباندى قارسىلىق كورسەتكەن سولتۇستىك كورەيا قۇراماسىن قابىلداعان. تاس-تالقان ەتىپ ۇتتى. ەسەپ – 7:0! وڭتۇستىك افريكاداعى الەم چەم­پيو­ناتىنداعى ەڭ ءىرى جەڭىس ازىرگە وسى. بۇل قالاي بولدى دەيسىزدەر عوي. العاشى تايمداعى گول ەستەرىنەن تاندىرىپ كەتە جازداعان كورەيلەر ەسەپتى تەڭەستىرۋ ءۇشىن بار كۇشىن سالدى. جالپى, ولاردىڭ ەڭ ۇلكەن قاتەسى وسى بولعانعا ۇقسايدى. قورعانىس شەبى جار­تىلاي جالاڭاش قالدى. ويىن سوڭىنا تامان كورەيلەر 7:0 ەسەبىنە ىشتەي قۋانا كەلىسكەن شىعار دەپ تە ويلايمىز. ويتكەنى, مەيرەلەش, المەيدا, كوەنتراۋ سياقتى ويىنشىلاردىڭ تاعى دا 7-8 گول سوعاتىن ساتتەرى بولدى. رونالدۋدىڭ الىستان تەپكەن دوبى قاقپا ماڭدايشاسىنا تيمەگەندە چەمپيوناتتاعى ەڭ ادەمى گولداردىڭ ءبىرى بولاتىن ەدى. كەيپتاۋندا جاڭبىردىڭ شەلەكتەپ قۇيىپ تۇرۋى دا ويىنعا ءوز اسەرىن تيگىزبەي قويعان جوق. وسى ماتچتان سوڭ سولتۇستىك كورەيا قۇراماسىنىڭ باس باپكەرى كيم ەن حۋن وكىنىشتەن باسىن شايقاي بەردى. “ويسىراي ۇتىلۋعا باسقا-باسقا ەمەس, ءوزىم كىنا­لىمىن, – دەدى ول. – ءساتسىز ستراتەگيا تاڭدادىم. اقىرى جىگىتتەر پورتۋگالداردىڭ شابۋىلىنا شىداس بەرە المادى. ءبىر ماقساتقا جۇمىلا الماي شاشىلىپ قالدى. بۇعان مەن كىنالىمىن”. ال, پورتۋگاليانىڭ باس باپكەرى كارلوس كەيرۋشتىڭ قۋانىشىن تۇسىنۋگە بولادى. “بۇل پورتۋگاليا مەن ۇلتتىق قۇراما تاريحىنداعى ۇلى كۇن, – دەدى ول. – ەندى كەلەسى ويىنعا تىڭعىلىقتى دايىندالۋىمىز كەرەك. ءبىز جەتى گول سوققانىمىزبەن ءۇش ۇپاي الدىق. سوندىقتان بىزگە تاعى دا جەڭىس كەرەك”. پورتۋگاليا ءوز توبىنداعى سوڭعى ويىنىن برازي­ليا­مەن وتكىزەدى. مۇنى ەسكە العاندا الەم چەمپيوناتى في­نالىنىڭ قالاي بولاتىنى ءوز-وزىنەن تۇسىنىكتى شىعار دەپ ويلايمىز. ال, چيلي قۇراماسى شۆەيتساريانى 1:0 ەسەبىمەن جەڭدى. ويىننىڭ 75-ءشى مينۋتىندا ماسكەۋدىڭ تسسكا كلۋبىندا وينايتىن مارك گونسالەس سالعان دوپ ويىن تاعدىرىن شەشتى. ءاۋ باستا شۆەيتساريا باپكەرى وتتامار حيتتسفەلدىڭ ويلاعانى باسقا ەدى. الەمدەگى ۇزدىك يسپانيانىڭ اياعىنا تۇساۋ سالعان قۇراما الاڭعا جەڭەمىز دەگەن كوڭىلمەن شىققان. “ۇيدەگى ويدى بازارداعى نارىق بۇزادى” دەپ حالىق قالاي ءدال ايتقان دەسەڭىزشى. چيليلىكتەر قارسىلاستارىنىڭ اسپانداعى ارمانىن جەرگە ءتۇسىردى. ءچيليدى دە تۇسىنۋگە بولادى. سوڭعى كەزدەسۋ يسپاندىقتارمەن وتەتىندىكتەن, ولار تىسكە جۇمساقتاۋ شۆەيتساريانى جەڭبەسە, ءوز توبىنان شىقپاي قالۋى ابدەن مۇمكىن. سوندىقتان ەكى قۇراماعا دا تايىناتىن ەشتەڭە جوق ەدى. العاشقىدا ويىن تەڭ دارەجەدە ءجۇرىپ جاتتى. كەزەكپە كەزەك شابۋىل. ەكى جاقتا دا گول سوعاتىن مۇمكىندىكتەر بولعان. شۆەيتساريالىقتاردىڭ جارتىلاي قورعاۋشىسى ۆالان بەحراميدىڭ ءوز-وزىنەن قاعىنعانى. سور ءتۇرتتى مە, ءبىر ەمەس, سوڭىنا تۇسكەن ەكى ويىنشىنى شىنتاعىمەن ۇرىپ جابىرلەپ كەتتى. اربيتر حاليل يبراھيم قىزىل قاعاز كورسەتتى. اۋەلى بوسەجۋر, سودان سوڭ ۆيدالدى قۇلاتقان بەحرەمي الاڭنان كەتكەن سوڭ-اق چيليلىكتەر قارسىلاستارىنىڭ موينىنا ءمىنىپ الدى. كوپتىگىن پايدالانىپ, شابۋىلعا ءوتتى. شۆەيتسا­ريا­لىقتاردىڭ قاقپاسى ماڭايىنا دوپتان جاڭبىر جاۋدى. ماتياس فەرناندەس, ارتۋرو ۆيدال, جان بوسەجۋر جويقىن شابۋىلدى كۇشەيتتى. العاشقى تايمدا چيليلىكتەر 9 رەت قاقپانى كوزدەپ, تۋرا باعىتتالعان ءتورت دوپتى قاقپاشى دياگو بەنالو ادەمى-اق قاعىپ تاستادى. ال, شۆەيتساريالىقتار ءۇش رەت كوزدەپ, ۇشەۋىندە دە قيىس تەپتى. ەكىنشى تايمدا چيليلىكتەر جاسىنداي جارقىلداپ, قىسىمدى كۇشەيتتى. الەكسيس سانچەس 55-ءشى مينۋتتا گريحتينگتى كوز ىلەسپەس شاپشاڭدىقپەن الداپ ءوتىپ, بەنالومەن جەكپە-جەك قالىپ ەدى. قاقپاشى جىبەرگەن جوق, ءدال قاعىپ ۇلگەردى. 59-شى مينۋتتا مارك گونسالەستىڭ باسپەن ۇرعان دوبى قاقپادان قيىس كەتتى. “اڭدىعان جاۋ الماي قويمايدى”, ەكەن. سول گونسالەس اقىرى دەگەنىنە جەتتى. بەنالو قاقپا الدىندا قاۋىپتى ءسات تۋعىزعان پەرەدەسكە تۇرا ۇمتىلعاندا, ول دوپتى شتانگا تۇبىنە تاستاعان. لىپ ەتە قالعان گونسالەس ونى باسپەن سوعىپ جىبەردى – 1:0. ماتچ اياعىندا شۆەيتساريالىقتاردىڭ ويىندى تەڭەستىرىپ كەتەتىندەي مۇمكىندىگى بولدى. البەرت بۋنياكۋ قورعاۋشىنىڭ كوزىن الا بەرىپ, اياعىنىڭ ۇشىمەن قاقپا الدىنا پاس شىعارىپ بەردى. تۇرىك جىگىتى دەرديوكتىڭ قاتەلەسۋگە حاقىسى جوق ەدى. قاتەلەستى. تەپكەن دوبى قاق­پانىڭ تۇبىنەن جىلاپ ءوتتى. وعان قوسىلىپ جان­كۇيەرلەر ەڭىرەگەندەي بولدى. شۆەيتساريالىقتار مۇنداي مۇمكىندىكتى ءومىرى ۇمىتا الماس. ءتۇن ۇيقىنى ءتورت ءبولىپ شوشىتىپ وياتاتىن وقيعا عوي. بارىنە ءوزىنىڭ كىنالى ەكەنىن سەزگەن تۇرىك جىگىتىنىڭ ءتۇسى كۇلدەي بولىپ كەتتى. ال, يسپاندىقتار گوندۋراسپەن الاڭعا شىققان. گون­دۋراستى قايدام, ەۋروپا چەمپيونى يسپاندىقتار ءۇشىن نە بەل, نە بەلبەۋ كەتەتىن جاۋاپتى كەزدەسۋ ەدى. چيلي 6 ۇپاي ولجالاپ پلەي-وففتىڭ تابالدىرىعىندا تۇر. ءۇش ۇپايى بار شۆەيتساريالىقتار توپتاعى سوڭعى ويىنىن گوندۋراسپەن وتكىزىپ, قالاي دا جەڭۋگە تىرىسادى. اۋتسايدەر گوندۋراس تاعدىرىنا كونگەن جاعدايدا ەكى جولداما وسى ۇشەۋدىڭ قايسىسىنىڭ قالتاسىنا تۇسەدى؟ بىرەۋى ارتىق قوي. ونىڭ ۇستىنە يسپاندىقتار توقتاعان قوناقۇيدىڭ توبەسى وپىرىلىپ قۇلاپتى. ابىروي بولعاندا ىشتە ەشكىم بولماعان. ەگەر ولار ىرىمعا سەنەتىن بولسا, بۇل جاقسىلىق ەمەس. سوندىقتان ۆيسەنتو دەل بوسكەنىڭ شاكىرتتەرى گوندۋراس قۇراماسىن ءىرى ەسەپپەن ۇتۋدى كوزدەگەن. ۇپايلارى تەڭەسكەن جاعدايدا, دوپ ايىرماشىلىقتارى ەسەپكە الىنعاندا ۇتىلىپ قالماس ءۇشىن كەرەك نارسە بۇل. اقىرى يسپانيا – گوندۋراس 2:0 بولدى. باقتيار تايجان.