سۋرەت: instagram.com/akimat__astana
جيىنعا جەرگىلىكتى ءماسليحات دەپۋتاتتارى, بەلگىلى بلوگەرلەر مەن قوعام قايراتكەرلەرى قاتىسىپ, الدىڭعى بۋىن اعالار اقىل-كەڭەسىمەن ءبولىستى. اشىلۋ سالتاناتىندا ەلوردالىق جاستار ساياساتى ماسەلەلەرى باسقارماسىنىڭ باسشىسى سامات يبراەۆ فورۋمنىڭ ماقسات-مىندەتىن اتاپ ءوتتى.
– «Jastar Fest» – ەلوردالىق جاستاردىڭ ەڭ جارقىن وكىلدەرىن, ويشىل بالالار مەن كوشباسشىلارىن بىرىكتىرگەن پلاتفورما. ءبىزدىڭ ماقسات – ستۋدەنتتىك ورتادا ادامنىڭ قۇقىقتارى مەن بوستاندىقتارىن قۇرمەتتەۋ قاعيداتتارىنا نەگىزدەلگەن ءوزارا سىيلاستىقتى قالىپتاستىرۋ, لۋدومانيانىڭ, دەۆيانتتى مىنەز-ق ۇلىقتىڭ الدىن الۋ, ادامگەرشىلىك نورمالارىن ءسىڭىرۋ, 2024–2025 جىلدارعا ارنالعان «استانا – ەسىرتكىسىز قالا» ناشاقورلىققا قارسى ءىس-قيمىل جانە الدىن الۋ جونىندەگى ءىس-شارالار جوسپارى اياسىندا مەملەكەتتىك جاستار ساياساتىن قولداۋ, سايكەسىنشە تەرىس ادەتتەردەن قورعاۋ. سوندىقتان بۇل الاڭ جاس كوشباسشىلارىمىزعا ءوز قىزمەتى شەڭبەرىندە قوعامعا رۋحاني قۇندىلىقتاردى, «ادال ازامات» قاعيداتىن مەيلىنشە كەڭىنەن ناسيحاتتاۋعا سەپ بولادى. ءارى ءىس-شارا جاستار ءۇشىن وي ءتۇيىپ, جاڭا باستامالارىنا سەرپىن بەرەتىنىنە سەنىمدىمىن, – دەدى ول.
جاستار الدىندا ءسوز العان استانا قالاسى ءماسليحاتىنىڭ دەپۋتاتى, تانىمال تەلەجۋرناليست ءلايلا سۇلتانقىزى قازىرگى قوعامدا وتكىر تۇرعان ماسەلەلەردى ايتىپ, سەبەپ-سالدارىن اشىپ
كورسەتتى.
– بۇگىندە وقۋىن اياقتاعان كەي تۇلەك وزىندىك ءومىر جولىن قاي سالامەن بايلانىستىرارىن بىلمەي, جۇمىسسىز جاستار قاتارىن تولىقتىرىپ ءجۇر. ءتىپتى ولار ەڭبەككە ارالاسۋعا مۇمكىندىك بەرەتىن «بولاشاق», «سەرپىن», «ديپلوممەن – اۋىلعا!» سەكىلدى مەملەكەتتىك باعدارلامالاردىڭ بارىن بىلمەي جاتادى. ويلاپ قاراساق, قازىرگى ۋاقىت – مۇمكىندىكتەر قاناتىن جايعان كەزەڭ. قاراپايىم ينتەرنەت ارقىلى كوپ دۇنيەنى وقىپ, بىرنەشە ءتىلدى تەگىن مەڭگەرىپ الۋعا بولادى. الەۋمەتتىك جەلىدە قىزىعۋشىلىعىنا نە قۇندىلىعىنا ساي جەكە برەند قالىپتاستىرۋعا دا مۇمكىندىك بار. ارينە, بۇل – سالدارمەن كۇرەسۋ عانا. ال ماسەلەنىڭ مانىسىنە ۇڭىلسەك, وعان تۇرتكى بولىپ وتىرعان – وتباسى ينستيتۋتىنداعى ءتالىم-تاربيە, ءبىلىم سالاسىنداعى باعىت-باعدار بەرۋدەگى ولقىلىقتار. ماسەلەن, اتا-انالار كوپ جاعدايدا بالالارىنا اقىل ايتادى. بىراق ەش ۋاقىتتا بالاسىمەن بىرگە وتىرىپ, پىكىر الماسىپ, ويىن تالقىلامايدى. بالانى ءتۇسىنۋ ءۇشىن الدىمەن ونىڭ ورتاسىنا زەر سالۋ قاجەت, – دەدى ل.سۇلتانقىزى.
ءوز كەزەگىندە ماركەتولوگ جانە جاستار ساياساتى جونىندەگى كەڭەس مۇشەسى راسۋل ابدۋللاەۆ جاستارعا الەۋمەتتىك جەلىلەردى قالاي ءتيىمدى پايدالانۋ كەرەك ەكەنىن, وزىندىك باعىتتى تاڭداۋداعى اقىل-كەڭەسىن ايتتى.
– ەگەر ءسىز ماتەماتيكانى جاقسى كورسەڭىز, وندا ماركەتينگ سالاسى سىزگە سايكەس كەلەدى. ماتەماتيكتەر ساتۋمەن, تارگەتپەن, تالداۋلارمەن اينالىسادى. ال تاريح پەن گەوگرافياعا بۇيرەگىڭىز بۇرىپ تۇرسا, برەند مەنەدجەرى ماماندىعىن تاڭداي الاسىز. نەگىزى بۇل ماماندىق كوپ وتانداستارىمىزدىڭ بولمىسىنا جاقىن كەلەدى. مەنىڭشە, قازىر كرەاتيۆتى ءونىم ويلاپ تابۋدا ەلىمىزدەگى ادام كاپيتالىنىڭ الەۋەتى زور, – دەدى ساراپشى.
فورۋمدا IT-دەگى تانىمال ماماندىقتار مەن سالادا جەتىستىككە جەتەلەيتىن كەڭەستەرىمەن اقپاراتتىق قاۋىپسىزدىك جونىندەگى ساراپشى مەدەت تۋرين ءبولىستى.
– IT سالاسىندا ەڭ تانىمال ماماندىقتار بار. ولار – باعدارلاماشىلار, تەستىلەۋ ينجەنەرلەرى, دەرەكتەردى تالداۋشىلار, UX/UI ديزاينەرلەرى, ءىت-ماركەتولوگتەر, جاساندى ينتەللەكت مامانى جانە تاعى باسقالارى. وسى باعىتتى تاڭداعان جاستار ءوز ماشىقتارىن دامىتۋعا, كاسىبي بايلانىستار جەلىسىن قۇرۋعا ءارى ۇنەمى وقۋعا دايىن بولۋى قاجەت. سونداي-اق كەز كەلگەن جاس كيبەرمادەنيەت پەن كيبەرگيگيەنانى ۇستانۋى كەرەك, – دەدى م.تۋرين.
ال استانا قالاسى ءماسليحاتىنىڭ دەپۋتاتى ارسلانبەك ماعزۇم جاستاردىڭ ەلىمىزدىڭ قوعامدىق ۇدەرىسىنە قاتىسۋىنىڭ ماڭىزىن اتاپ ءوتتى. سونىمەن قاتار دەپۋتات جاس بۋىندى قورشاعان ورتاعا ۇقىپتى قاراۋعا شاقىردى.
– ءححى عاسىر جاستارىنىڭ الدىندا قازىر كوپتەگەن مۇمكىندىك اشىلدى. بۇل – ەلوردادا ءوتىپ جاتقان كەرەمەت ءىس-شارالار عانا ەمەس, ءتۇرلى گرانت, تەگىن كۋرستار. قازىر جاس مينيسترلەر, دەپۋتاتتار, باسقارۋشىلار بار ەكەنىن ءبارىمىز بىلەمىز. جاستاردىڭ مەملەكەتتىك قىزمەتكە بارۋدان قورىقپايتىنىن ايتقىم كەلەدى. مەن جەرگىلىكتى ءماسليحاتتىڭ دەپۋتاتى بولا وتىرىپ, يدەيالاردى ۇسىنۋعا, جاستاردىڭ قۇقىعىن قورعاۋعا, قالا مەن ەلدىڭ ماڭىزدى وقيعالارىنا باسشىلىق ەتۋگە جانە قاتىسۋعا بولاتىنىنا مىسال كەلتىرە الامىن. مەملەكەت جاستاردىڭ ماسەلەلەرىنە كوپ كوڭىل بولەدى. جاستار ساياساتى اياسىندا ءتۇرلى اكتسيا مەن ءىس-شارا ۇيىمداستىرىلىپ تا ءجۇر. ءبىر «تازا قازاقستان» اكتسياسىن اۋىز تولتىرىپ ايتۋعا بولادى. ەل تازالىعىنا ۇندەگەن ناۋقان ءتىل, مادەنيەت, وي, مىنەز-ق ۇلىق تازالىعىن دا قاۋزايدى. سوندىقتان رەسپۋبليكالىق اكتسيانىڭ ءمانى تەرەڭ, – دەدى سپيكەر.
جالىندى جاستار جيىنىندا «Joltap» الەۋمەتتىك جوباسىنىڭ مۇمكىندىكتەرى دە قوزعالدى. جوبا جەتەكشىسى دانا ءجۇنىسوۆا وتانداستارىمىزعا تسيفرلىق كاسىپتى وقىتۋ جانە جۇمىسقا ورنالاستىرۋ مۇمكىندىكتەرى تۋرالى تولىعىراق ايتىپ بەردى.
