باتىرحان شوكەنوۆ قازاقستاندا جەرلەنەدى

استانا. 29 ءساۋىر. كەنەتتەن قايتىس بولعان بەلگىلى ونەر جۇلدىزى, قازاقستاننىڭ ەڭبەك سىڭىرگەن قايراتكەرى باتىرحان شوكەنوۆتىڭ دەنەسى الماتىعا جەتكىزىلەدى. بۇل تۋرالى tengrinews.kz حابارلادى. قازىر وسى ماسەلەمەن مارقۇمنىڭ اعاسى باۋىرجان شوكەنوۆ ماسكەۋگە كەتتى. ونىڭ مالىمدەۋىنشە, سوڭعى كەزدەرى ءانشى دەنساۋلىعىنىڭ سىر بەرىپ جۇرگەنىن ايتقان. ماسكەۋگە ۇشار الدىندا الماتى اۋەجايىندا تىلشىلەرمەن كەزدەسكەن باۋىرجان شوكەنوۆ: «قازىر جەرلەۋ ماسەلەسىن شەشىپ جاتىرمىز. وسى جاققا الىپ كەلەمىز. بىراق ودان كەيىن قالاي بولاتىنىن بىلمەيمىن. بۇل قايعىلى جاعداي ونىڭ پاتەرىندە بولعان. سول ۇيدە باتىردىڭ ديرەكتورى دا تۇراتىن ەدى. ول بىردەن جەدەل جاردەم شاقىرعان. دەگەنمەن, سوڭى وكىنىشتى اياقتالدى. كوپ سالماق ءتۇسىپ كەتكەن بولار. سوڭعى كەزدەرى دەنساۋلىعىنا شاعىمدانىپ جۇرگەن ەدى», – دەدى. بەلگىلى ونەرپازىمىزدىڭ قايتىس بولۋىنا بايلانىستى قازاقستان جانە رەسەي ەستراداسىنىڭ جۇلدىزدارى قايعىرىپ, الەۋمەتتىك جەلىلەر ارقىلى ءوز وكىنىشتەرىن بىلدىرۋدە. سونداي-اق, مادەنيەت جانە سپورت ءمينيسترى ارىستانبەك مۇحامەدي ۇلى دا ءوز كوڭىلىن ءبىلدىرىپ, قازاقستاننىڭ بارلىق وڭىرىندە باتىرحان شوكەنوۆتى ەسكە الۋعا ارنالعان كونتسەرتتەر وتەتىنىن ايتتى. ازىرگە اتالعان شارانىڭ ناقتى كۇنى مەن ۋاقىتى بەلگىسىز. ەلامان قوڭىر. دەرەك: tengrinews.kz. سۋرەت: art.gazeta.kz.