مينيسترلىك سىبايلاس جەمقورلىققا قارسى ءىس-قيمىل اگەنتتىگىمەن بىرلەسە وتىرىپ, 2022–2026 جىلدارعا ارنالعان سىبايلاس جەمقورلىققا قارسى ساياسات تۇجىرىمداماسىن جۇزەگە اسىرىپ كەلەدى. جوسپار اياسىندا نەگىزگى شارالار بەكىتىلىپ, جوبا كارتاسى ازىرلەندى. سونداي-اق سىبايلاس جەمقورلىق تاۋەكەلدەرىن جۇيەلى تۇردە تالداۋ جۇرگىزىلەدى. ال اشىقتىقتى قامتاماسىز ەتۋ ءۇشىن ينتەرنەت رەسۋرستا «سىبايلاس جەمقورلىق كارتالارى» ءبولىمى قۇرىلىپ, ىشكى جانە سىرتقى تالداۋلاردىڭ ناتيجەلەرى تۇراقتى جاريالانىپ وتىرادى.
«مينيسترلىك قىزمەتكەرلەرى اراسىندا سىبايلاس جەمقورلىققا قارسى مادەنيەتتى قالىپتاستىرۋ ماقساتىندا وقىتۋ باعدارلامالارى بەلسەندى ەنگىزىلىپ جاتىر. وقۋ كۋرستارى ءبىلىمدى تەكسەرۋگە ارنالعان تەستىلەۋ كەزەڭدەرىن قامتيدى. بۇل ءاربىر قىزمەتكەرگە قاجەتتى ءبىلىم الۋعا ءارى ولاردىڭ دەڭگەيىن باعالاۋعا مۇمكىندىك بەرەدى. سىبايلاس جەمقورلىققا قارسى ءىس-قيمىل مينيسترلىكتىڭ بارلىق دەڭگەيىندە – ورتالىق اپپاراتتان باستاپ اۋماقتىق بولىمشەلەرگە دەيىن جۇزەگە اسىرىلادى. مەملەكەتتىك قىزمەتكە العاش رەت كەلگەن قىزمەتكەرلەرگە ەتيكالىق نورمالار مەن زاڭداردى ساقتاۋ قاجەتتىلىگى تۋرالى ءتۇسىندىرۋ جۇمىسىنا ەرەكشە نازار اۋدارىلادى. بۇل مەملەكەتتىك قۇرىلىمدارعا ازاماتتاردىڭ سەنىمىن ارتتىرۋعا ىقپال ەتەدى. وسىلايشا, سىبايلاس جەمقورلىققا قارسى ءىس-قيمىل شارالارى جۇيەلى تۇردە جالعاسىن تاۋىپ, مينيسترلىكتىڭ تۇراقتى باقىلاۋىندا بولادى», دەدى سۋ رەسۋرستارى جانە يرريگاتسيا مينيسترلىگىنىڭ ادەپ جونىندەگى ۋاكىلى رۋستام بەيسەنقۇلوۆ.
