كوزىلدىرىك ادامدى سۋرەتكە ءتۇسىرىپ, Pimeyes سەرۆيسى ارقىلى ونىڭ بەتىن تانيدى. سودان كەيىن ينتەرنەتتەگى دەرەككوزدەردەن اقپارات جيناپ, تالداپ, نەگىزگى مالىمەتتەردى بەرەدى. ستۋدەنتتەر سىناق بارىسىندا كوزىلدىرىك ادامنىڭ اتى-ءجونى, مەكەنجايى, تۋىستارىنىڭ تەلەفون ءنومىرى سياقتى جەكە اقپاراتىن بىرنەشە مينۋت ىشىندە تاۋىپ بەرگەنىن ايتادى. ءبىر قىزىعى, بۇل جوبا تەحنولوگيانىڭ قانشالىقتى قاۋىپتى بولا الاتىنىن كورسەتۋ ماقساتىندا عانا جاسالعان. سوندىقتان ولار كودتى جاريالامايتىنىن مالىمدەدى.
قولدان وسىرىلگەن اسىل تاس
ەڭ قىمبات رۋبين تاسىن ەندى قولدان وسىرۋگە بولادى.
باتىس انگليا ۋنيۆەرسيتەتىنىڭ زەرتتەۋشىسى سوفي بۋنس پلاتينا ساقيناسىندا رۋبين ءوسىرۋدىڭ جاڭا ءادىسىن ويلاپ تاپتى. بۇل يننوۆاتسيالىق تەحنولوگيا زەرگەرلىك بۇيىمداردان قالعان رۋبين بولشەكتەرىن تولىققاندى اسىل تاسقا اينالدىرىپ, مەتالل كونسترۋكتسياسىنا بىرىكتىرۋگە مۇمكىندىك بەرەدى. ازىرلەۋشى كىشكەنتاي رۋبين فراگمەنتىن پلاتيناعا ورنالاستىرىپ, تاس ءوسىمىن جىلدامداتۋ ءۇشىن اليۋميني وكسيدىنىڭ بالقۋ تەمپەراتۋراسىن تومەندەتەتىن ءفليۋستى ەرىتىندىنى قولدانعان. ماتەريالدار پەشتە 5-تەن 50 ساعاتقا دەيىن ۇستالادى. بۋنستىڭ ايتۋىنشا, ۋاقىت نەعۇرلىم ۇزاق بولسا, كريستال سوعۇرلىم تازا جانە ءىرى بولادى. بۇل ءادىس تابيعي تاستاردان كەم ەمەس جاساندى اسىل تاستار جاساۋعا مۇمكىندىك بەرەدى. سونداي-اق قورشاعان ورتاعا زيان كەلتىرمەي, زەرگەرلىك بۇيىم ءوندىرىسىن دامىتۋعا جول اشادى.
نۇح كەمەسىنە اپاراتىن جول
عالىمدار 3 مىڭ جىل بۇرىن جازىلعان الەمنىڭ ەڭ كونە كارتاسىنداعى قۇپيانى اشتى.
ولار كارتاداعى سۋرەتتەر نۇح كەمەسىنە اپاراتىن جولدى بەينەلەيدى دەپ ەسەپتەيدى. زەرتتەۋشىلەردىڭ سوزىنشە, كارتانىڭ ارتقى جاعىندا «پارسيكتۋ» دەگەن جۇمباق ورىنعا اپاراتىن «كىلت سوزدەر» بار. «پارسيكتۋ» (parsiktu) دەگەن ءسوز ۇلى سۋ تاسقىنى كەزىندە ءومىردى ساقتاعان قايىقتى بىلدىرەدى. سونداي-اق ماتىندە «ۋرارتۋ» ءسوزى دە كەزدەسەدى. «ۋرارتۋ» ءسوزى اسسيريالىق تىلدە «ارارات» تاۋىنىڭ اتاۋى, ال ەۆرەي تىلىنەن اۋدارعاندا «تاۋلار» دەگەندى بىلدىرەدى. بيبلياداعى اڭىز بويىنشا نۇح پايعامبار ءدال سول جەردە ءوزىنىڭ كەمەسىن قالدىرعان. كارتانىڭ ارتىنداعى ماتىندە ساياحاتشى كورسەتىلگەن باعدارمەن جۇرسە, تاۋداعى الىپ كەمەگە تاپ بولاتىنى ايتىلعان.
