ماڭعىستاۋدا اسكەري قىزمەتكەر جاۋاپقا تارتىلدى

اقتاۋ. 29 قاڭتار. اقتاۋ گارنيزونى اسكەري سوتى قىزمەت بابىن اسىرا پايدالانعان اسكەري قىزمەتكەرگە قاتىستى قىلمىستىق ءىس قوزعادى. بۇل تۋرالى egemen.kz ءتىلشىسى حابارلادى. قورعانىس مينيسترلىگى 30153 اسكەري ءبولىمىنىڭ ماتەريالدى-تەحنيكالىق قامتاماسىز ەتۋ روتاسى كۇزەت جانە قورعاۋ اتقىش-زەنيتتىك ۆزۆودىنىڭ (اتقىش-زەنيتشى) ساربازى, كىشى سەرجانت ج.قاتارداعى جاۋىنگەر ا.-عا وزىنە قاراي كەلۋىن بۇيىرعان. الايدا, بۇيرىعىن ەستىمەي, كيىم كەپتىرۋ بولمەسىنە كىرىپ كەتكەن قاتارداعى جاۋىنگەردى بۇيرىعىمدى ورىندامادى دەپ تۇسىنگەن كىشى سەرجانت كيىم كەپتىرەتىن بولمەگە كىرىپ, جاس ساربازدى ساباۋعا كىرىسەدى. ناتيجەسىندە قاتارداعى جاۋىنگەردىڭ ەرنى جىرتىلىپ, بەتى كوگەرەدى. وسى ارەكەتى ءۇشىن جاۋاپقا تارتىلىپ, قىلمىستىق كودەكستىڭ 451-بابىنىڭ 1-بولىگىمەن ايىپتالعان كىشى سەرجانت ج.-عا قاتىستى قىلمىستىق ءىس قوزعالدى. ونى اقتاۋ گارنيزونى اسكەري سوتى وندىرىسكە قابىلدادى. اتالعان تۇلعاعا قاتىستى قىلمىستىق ءىس بويىنشا باستى سوت تالقىلاۋى 2015 جىلدىڭ 4 اقپانعا تاعايىندالدى. گۇلايىم شىنتەمىرقىزى. دەرەك: egemen.kz. سۋرەت: bnews.kz.