ماڭعىستاۋدا بۇرىنعى مەملەكەتتىك قىزمەتكەرلەرگە ۇكىم شىقتى

اقتاۋ. 29 قاڭتار. مەملەكەتتىك ىستەر جونىندەگى اگەنتتىگى ماڭعىستاۋ وبلىسى بويىنشا دەپارتامەنتىنىڭ بۇرىنعى قىزمەتكەرلەرىنە قاتىستى سوت ۇكىمى جاريالاندى. بۇل تۋرالى egemen.kz ءتىلشىسى حابارلادى. اقتاۋ قالالىق سوتىندا قىلمىستىق كودەكستىڭ 311-بابىنىڭ 4- بولىگى, «گ» تارماعىمەن (بىرنەشە رەت پارا الۋ) ە.وسپانوۆقا, قىلمىستىق كودەكستىڭ 313-بابىنىڭ 1-بولىگىمەن (پاراقورلىققا دەلدال بولۋ) ن.يحسانوۆا مەن ج.كۋرازوۆاعا قاتىستى قىلمىستىق ءىس بويىنشا ۇكىم جاريالاندى. اتالمىش دەپارتامەنتتىڭ باسشىسى بولعان ە.وسپانوۆ مەملەكەتتىك قىزمەتكە ۇمىتكەرلەردەن تەستىلەۋدەن جاعىمدى ناتيجەگە جەتۋ ءۇشىن بىرنەشە رەت اقشالاي سىيلىقتار العانى ءۇشىن, ال دەپارتامەنت باسشىسىنىڭ ورىنباسارى ن.يحسانوۆا مەن پەرسونالدى باسقارۋ ءبولىمىنىڭ باسشىسى ج.كۋرازوۆا پارا الۋعا جانە بەرۋگە دەلدال بولعانى ءۇشىن ايىپتالعان ەدى. اقتاۋ قالالىق سوتىنىڭ ۇكىمىمەن ە.وسپانوۆ قىلمىستىق كودەكستىڭ 366-بابىنىڭ 3-ءبولىمىنىڭ 4-تارماعىمەن كىنالى دەپ تانىلىپ, ونى 7 جىلعا باس بوستاندىعىنان ايىرۋ جازاسى تاعايىندالىپ, جازانى تۇزەۋ كولونياسىنىڭ جالپى رەجىمىندە وتەۋ بەلگىلەندى. سونداي-اق, ونىڭ جەكە مۇلكى تاركىلەنىپ, قىلمىستىق كودەكستىڭ 41-بابىنىڭ 2-بولىمىنە ساي مەملەكەتتىك ورگانداردا قىزمەت اتقارۋ قۇقىنان 7 جىلعا ايىرىلدى. ءبىر ەپيزود بويىنشا ە.وسپانوۆ كىناسىز دەپ تانىلعان. ال ن.يحسانوۆا جانە ج.كۋرازوۆا قىلمىستىق كودەكستىڭ 313-بابىنىڭ 1-بولىمىمەن كىنالى دەپ تانىلىپ, ولاردىڭ ارقايسىسىنا جازا رەتىندە 700 ايلىق ەسەپتىك كورسەتكىش مولشەرىندە 1 387 400 تەڭگەدەن ايىپپۇل سالىنىپ, مەملەكەتتىك ورگانداردا قىزمەت اتقارۋ قۇقىنان 1 جىلعا ايىرىلدى. ماڭعىستاۋ وبلىستىق سوتى ءباسپاسوز قىزمەتىنىڭ حابارلاۋىنشا, ۇكىم زاڭدى كۇشىنە ەنگەن جوق. گۇلايىم شىنتەمىرقىزى. دەرەك, سۋرەت: egemen.kz.