فوتو: قاراعاندى وبلىسىنىڭ پروكۋراتۋراسى
اقتوعاي اۋدانىنىڭ پروكۋراتۋراسى تۇرعىنداردىڭ شامادان تىس جۇك تيەلگەن اۋىر كولىكتەردىڭ وبلىستىق ماڭىزى بار تراسسامەن جۇرۋىنە شاعىمدارىن ەرەكشە باقىلاۋعا الدى. سەبەبى كولىكتىڭ شامادان تىس جۇكتەمەسى وبلىس ورتالىعىنا اپاراتىن جولدىڭ بۇزىلۋىنا اكەلىپ جاتىر.
ايتا كەتەيىك, جولداردىڭ بۇزىلۋىنىڭ نەگىزگى فاكتورلارىنىڭ ءبىرى - اۋىر كولىكتەردىڭ تاسىمالداۋعا رۇقسات ەتىلگەن سالماقتى ارتتىرۋى.
ەستەرىڭىزگە سالا كەتەيىك, اۆتوكولىكتىڭ جالپى سالماعى جۇكپەن بىرگە كەلەسى ماندەردەن اسپاۋى كەرەك:
- ءۇش ءوستى (م3 ساناتىنداعى توپسالى اۆتوبۋستاردى قوسپاعاندا) – 25 توننا;
- ءتورت ءوستى, ونىڭ ىشىندە ەكى باسقارىلاتىن وسىمەن – 32 توننا;
- بەس ءوستى – 38 توننا;
- التى نەمەسە ودان دا كوپ وستەرى بار – 44 توننا.
«اۋدان پروكۋراتۋراسىنىڭ باستاماسىمەن پوليتسيا قىزمەتكەرلەرى شامادان تىس جۇك تيەگەن اۋىر كولىكتەردى انىقتاپ, ۇستادى. «قاراعاندى وبلىسى بويىنشا كولىكتىك باقىلاۋ ينسپەكتسياسى» باسقارماسىنىڭ ماماندارى ولارعا قاتىستى اكىمشىلىك ماتەريالدار رەسىمدەدى. ناتيجەسىندە جەكە جانە زاڭدى تۇلعالار اكىمشىلىك جاۋاپكەرشىلىككە تارتىلدى. ءبىر اي ىشىندە جالپى سوماسى 2 900 000 تەڭگەدەن اساتىن 5 اكىمشىلىك حاتتاما رەسىمدەلىپ, ايىپپۇلدار تولەندى. قابىلدانعان شارالار جولداردىڭ مەرزىمىنەن بۇرىن بۇزىلۋى مەن توزۋىن بولدىرماۋعا ىقپال ەتەدى», دەلىنگەن حابارلامادا.
پوليتسيا قىزمەتكەرلەرى اۋىر جۇك كولىكتەرىنىڭ جۇرگىزۋشىلەرى ەرەجەلەردى قاتاڭ ساقتاۋىن جانە بەلگىلەنگەن سالماق پارامەترلەرىنەن اسپاۋ كەرەكتىگىن ەسكە سالدى. رۇقسات ەتىلگەن نورمالاردى بۇزۋ اكىمشىلىك جاۋاپتىلىققا تارتىلادى.
