وسى اتالعان ەلدى مەكەندەردە تۇراتىن حالىق ءبىرازدان بەرى جەرگىلىكتى اكىمدىككە ءبىر مادەنيەت ءۇيىن سالىپ بەرۋ جونىندە ءوتىنىش ءبىلدىرىپ كەلگەن ەدى. تۇرعىنداردىڭ وسى ءوتىنىش-تىلەگىن ەسكەرگەن قالا اكىمى عابيت سىزدىقبەكوۆ مادەنيەت وشاقتارىنىڭ قۇرىلىسىن جەدەلدەتىپ قولعا الۋدى تاپسىردى. سونىڭ ناتيجەسىندە شاھاردىڭ شالعاي ەلدى مەكەندەرىندە زاماناۋي ۇلگىدە سالىنعان مادەنيەت ۇيلەرى پايدا بولدى. تۇرعىن الاپ حالقىمەن وسىناۋ قۋانىشتى بولىسۋگە مەگاپوليس باسشىسى ارنايى جۇمىس ساپارىمەن بارىپ, جاڭا نىسانداردىڭ اشىلۋىنا قاتىستى.
«مادەنيەت – مەملەكەت دامۋىنىڭ اجىراماس بولىگى. وركەنيەتتى ەلدەر قاشاندا جوعارى مادەنيەتىمەن ولشەنگەن. قوعامدا تىنىشتىقتىڭ ورناۋى, ازاماتتىق ۇستانىم كوزقاراسىنىڭ قالىپتاسۋى, ادامداردىڭ ءبىر-بىرىنە دەگەن سۇيىسپەنشىلىگى مەن باۋىرمالدىعى مادەنيەتتىلىكتەن باستاۋ الادى. بۇگىندە قالا ىرگەسىندەگى ەلدى مەكەندەردە ونىڭ بىردەن-ءبىر قاينار كوزى مادەنيەت وشاقتارى بولىپ وتىر. حالىق رۋحانياتىنا قىزمەت اتقاراتىن عيمارات بولعان سوڭ ەندى بۇل جەردە ءتۇرلى ءىس-شارالار وتكىزىلەتىن بولادى. سونىمەن بىرگە مادەنيەت وشاقتارى بوس ۋاقىتتى ءتيىمدى وتكىزۋگە ارنالعان تاپتىرماس ورىنعا اينالادى دەگەن سەنىم مول. مادەنيەت سالاسى – مەملەكەتتىڭ ۇستانىپ وتىرعان باسىم باعىتتارىنىڭ ءبىرى. سول سەبەپتى پرەزيدەنت تاپسىرماسىنا سايكەس مەگاپوليستە جاڭا شىعارماشىلىق الاڭدار قۇرۋ, سونداي-اق دارىندى جاستاردى قولداۋ جۇمىستارى جالعاسىن تابا بەرەدى», دەدى ع.سىزدىقبەكوۆ.
مەگاپوليس باسشىسى تۇرعىنداردى, ونىڭ ىشىندە جاستاردى كوپ وقۋعا, ونەر-ءبىلىم قۋعا, سپورتپەن شۇعىلدانىپ, سالاماتتى ءومىر سالتىن ۇستانۋعا, بالالار تاربيەسىنە كوپ كوڭىل بولۋگە شاقىردى. وسى تۇرعىدا: «بالالاردىڭ ۋاقىتىن قازىر تەلەفون ۇرلاپ جاتىر. ساعاتتاپ ويىن ويناۋ, قالابەردى, الەۋمەتتىك جەلىدەن شىقپاۋ جالپى قوعامنىڭ ادەتىنە اينالىپ بارادى. بۇل رەتتە وقۋشىلاردىڭ گادجەتتەرگە قۇمارلىعىن شەكتەۋ مەن ولاردىڭ سپورت, رۋحانيات تۇرعىسىنان جان-جاقتى دامۋىنا جاعداي جاساۋ – وتە ماڭىزدى ءىس. وسى ورايدا مادەنيەت وشاقتارى ۇلكەندەر مەن جاستاردىڭ, بالالاردىڭ ورتاق رۋحانيات جولىندا باس قوسار شىعارماشىلىق ورتاسى بولادى دەگەن سەنىمدەمىز. مادەنيەتى بيىك, ءبىلىمى جوعارى ەل قاشاندا وزادى. ادىلەتتى قوعام قۇرامىز, ەلىمىزدى وركەنيەتتى مەملەكەتتەردىڭ قاتارىنا قوسامىز دەسەك, ءبىلىم مەن مادەنيەتكە باسا كوڭىل ءبولۋىمىز قاجەت», دەگەن پىكىر ايتتى.
ءوز كەزەگىندە جەرگىلىكتى تۇرعىنداردىڭ ءوتىنىش-تىلەكتەرىن ورىنداپ, ءسوزىن جەردە قالدىرماعان قالا باسشىلىعىنا ۇلكەن العىستارىن جەتكىزدى. مەگاپوليستە قوردالانعان وزەكتى الەۋمەتتىك ماسەلەلەردىڭ دەر كەزىندە ءارى بىرتىندەپ شەشىلىپ كەلە جاتقانىنا ريزاشىلىقتارىن ءبىلدىردى.
بىلتىر جەلتوقسان ايىندا قۇرىلىسى باستالعان مادەنيەت ۇيلەرى جوباعا سايكەس ەكى قاباتتان تۇراتىن عيمارات رەتىندە سالىندى. ءار تۇرعىن الاپتاعى مادەنيەت وشاقتارىنىڭ اۋماعى 4 مىڭ شارشى مەترگە جۋىق اۋداندى قۇرايدى. 100 ورىنعا دەيىنگى اكت زالدارى بار زاماناۋي مادەنيەت ۇيلەرىندە ۆەستيبيۋل, گاردەروب, قۇرال-جابدىق قوياتىن, گريم جاساۋ, مۇمكىندىگى شەكتەۋلى ازاماتتارعا ارنالعان بولمەلەر, جۇمىس كابينەتتەرى, كىتاپحانا, وقۋ مەن جاتتىعۋ زالدارى قاراستىرىلعان. وقۋ زالى, كومپيۋتەرلىك بولمە, دەمالىس جايلارى مەن قىزمەتكەرلەر كابينەتى بارلىق كەرەكتى جابدىقتارمەن قامتاماسىز ەتىلگەن. جىلۋ مەن سۋ جۇيەسى قالانىڭ ورتالىقتاندىرىلعان كوممۋنالدىق قىزمەتىنە قوسىلعان. مۇندا حورەوگرافيا ءبولىمى مەن ءتۇرلى ۇيىرمە سىنىپتارى اشىلاتىن بولادى. ەكىنشى قاباتتا ورنالاسقان كىتاپحانا ەلدى مەكەن تۇرعىندارىنىڭ رۋحاني قاجەتىن وتەۋگە قىزمەت اتقارادى.
شىمكەنت
