ىزگىلىك نۇرى

ابىقان امانباي ۇلى اكە جولىن قۋعان ازاماتتاردىڭ ءبىرى بولىپ قالىپتاستى. ول ەلىمىز ەكونوميكاسىنىڭ دامۋىنا سۇبەلى ۇلەس قوستى. الماتى مال دارىگەرلىك ينستيتۋتىن قىزىل ديپلوممەن بىتىرگەن سوڭ, ەڭبەك جولىن شەلەك اۋدا­نى, ماساق اۋىلىندا مال دارىگەرلىكتەن باستادى. ەرەن ەڭبەگىمەن ەرتە تانىلعان ابىقانعا وبلىستا جاڭادان اشىلعان شارۋاشىلىققا باسشى بولۋ ۇسىنىلادى. جاس جىگىت مۇنى وزىنە دەگەن قۇرمەت دەپ ءتۇسىندى. ابىقان امانباي ۇلىنىڭ ۇزاق جىلعى ەڭبەگى تۇرگەن اۋىلىن كوركەيتۋگە ارنالدى. ول ەكو­نو­ميكالىق ماسەلەلەرمەن بىرگە, اۋىل­داعى ەتنوسارالىق كەلىسىم مەن تاتۋلىقتىڭ شايقالماۋىنا سەرگەك قارادى. ويتكەنى, وبلىستا قانشا ۇلت پەن ۇلىس بولسا, تۇرگەندە دە سولاردىڭ سونشاما وكىلدەرى تۇرادى. سوندىقتان ەشكىمدى الالاماي, بارلىق ەتنوستىڭ تەڭدىگىن, تاتۋلىعىن جاراستىرۋ جولدارىن ىزدەدى, ولاردىڭ مادەنيەتىن, سالت-ءداستۇرىن دامىتۋدى ويلاستىردى. سول ءۇردىس كەيىن دە, بۇگىن دە ءوز ناتيجەسىن كورسەتىپ كەلەدى. ابىقان اعانىڭ ءومىر جولىنا زەر سالاتىن بولساق, ول اۋىل شارۋاشىلىعىن دامىتۋمەن بىرگە, اۋداندا, اۋىلدا ءبىلىم سالاسىن دامىتۋعا دا وزىندىك قولتاڭباسىن قالدىردى. ونىڭ ەڭبەگى ۇكىمەت تاراپىنان دا, حالىق تاراپىنان دا اتالىپ ءوتىلدى. «قۇرمەت بەلگىسى» وردەنىمەن, بىرنەشە مەدالمەن ناگ­رادتالدى. ابىقان جەكسەنبەكوۆ – تۇرگەن اۋىلىنىڭ قۇرمەتتى ازاماتى. ءومىرىنىڭ سوڭعى جىلدارى كيەلى تۇرگەن اۋىلىنىڭ اكىمى قىزمەتىن اتقاردى. ول ەگەمەندىكتىڭ العاشقى جىل­دارى قازاق ءتىلى مارتەبەسىن كوتەرۋگە, قازاق مەكتەپتەرىن اشۋعا بەلسەنە اتسالىستى. تۇرگەندە ورىس تىلىندە ەكى مەكتەپ بار ەدى. قازاق مەكتەبى بولماعان. اۋىلدىڭ تاريحىندا مۇندا قازاق مەكتەبى بولماعان ەكەن. وسىعان بەلسەنە ارالاستى. ءسويتىپ, تۇرگەندەگى يليچ اتىنداعى مەكتەپتىڭ اتىن وزگەرتىپ, ونى مەملەكەت جانە قوعام قايراتكەرى دىنمۇحامەد قوناەۆتىڭ ەسىمىن بەرۋدى قولعا الدى. سونىڭ ارقاسىندا مەكتەپ تە, كوشە دە د.قوناەۆتىڭ اتىن يەمدەندى. ءبىلىم بەرۋ ءىسىنىڭ دامۋىنا قوسقان ۇلەسى ءۇشىن ول «قازاقستان رەسپۋبليكاسى ءبىلىم بەرۋ ءىسىنىڭ وزات قىزمەتكەرى» توسبەلگىسىمەن ماراپاتتالدى. ونىڭ بويىندا ادامعا دەگەن جاقسىلىق, سۇيىسپەنشىلىك, ءوز مۇددەسىنەن بۇرىن حالىق ءىسىن ءبىرىنشى كەزەككە قوياتىن ناعىز ازاماتتىعى, تۋعان ەلى مەن جەرىنە دەگەن سۇيىسپەنشىلىك سەزىمدەرى جوعارى بولدى. ابىقان امانباي ۇلىنىڭ ەسىمى ۇرپاق جادىندا ماڭگى ساقتالادى. ءوزى اشقان, قازاقتىڭ قارا كوزدەرىن بىلىممەن سۋسىنداتۋدى ماقسات ەتكەن تۇرگەن ورتا مەكتەبىندە جىل سايىن ابىقان جەكسەنبەكوۆكە ارنالعان ارنايى شارالار وتكىزىلىپ وتىرادى. سول شارالاردى ۇيىمداستىراتىن ءارى وعان قولداۋ كورسەتەتىندەر ابىقان اعا اۋلەتى. اعانىڭ ۇل-قىز­دارى مەكتەپكە قاجەتتى جاب­دىق­تارمەن, كومپيۋتەرلىك قۇ­رىلعىلارمەن, اقپاراتتىق قۇرال­دارمەن, ينتەراكتيۆتى تاقتالارمەن, ت.ب. قامتاماسىز ەتىپ وتىر. جىل باسىنداعى تۇرگەن قازاق ورتا مەكتەبىندە ابىقان جەكسەنبەكوۆكە ارنالعان وقۋ جانە سپورتتىق جارىس­تار وتكىزىلەدى. وندا مەكتەپ وقۋ­شىلارى ابىقان اعانىڭ ءومىر جو­لىمەن, ەڭبەك جولىمەن تانىسادى. اۋىلداستارى ونى «ابىقان – مۇزجارعىش كەمە, ويتكەنى, ول قانداي ىستە بولسىن توپتى باستاپ باسىندا ءوزى جۇرەدى» دەيدى. تۇرگەن اۋىلىن كوركەيتۋگە, حالقىنىڭ تۇرمىس-تىرشىلىگىن جاقسارتۋعا بۇكىل عۇمىرىن ارناعان ابىقان جەكسەنبەكوۆتىڭ يگىلىكتى ىستەرىن بۇگىندە اركىم ايتىپ ءجۇر. ءاليسۇلتان قۇلانباي, «ەگەمەن قازاقستان». الماتى وبلىسى, ەڭبەكشىقازاق اۋدانى.