ەلمارا اسقارقىزى ورال وبلىسىنىڭ جىمپيتى اۋىلىندا دۇنيەگە كەلگەن. تاراس شەۆچەنكو اتىنداعى ورسك مەملەكەتتىك پەداگوگيكالىق ينستيتۋتىنىڭ فيلولوگيا فاكۋلتەتىن بىتىرگەن مامان سودان بەرى ورىس ءتىلى مەن ادەبيەتى ءپانىنىڭ مۇعالىمى بولىپ قىزمەت ەتىپ كەلەدى.
بولاشاق ەڭبەك ەرى ۇستازدىق جولىن اۋىلدا, جىمپيتى ورتا مەكتەبىندە باستاعان. 2000 جىلى ورال قالاسىنا اۋىسىپ, اۋەلى №37 مەكتەپتە, كەيىن №5 مەكتەپتە قىزمەت ەتتى. ال 2007 جىلدان بۇگىنگە دەيىن اسان تايمانوۆ اتىنداعى №34 مەكتەپ-گيمنازياسىندا ورىس ءتىلى مەن ادەبيەتى ءپانىنىڭ مۇعالىمى بولىپ جۇمىس ىستەپ كەلەدى. «پەداگوگ-زەرتتەۋشى» دارەجەسىنە جەتكەن ۇستازدىڭ جالپى پەداگوگيكالىق ءوتىلى – 34 جىل.
ەلمارا اسقارقىزى قازاقستان رەسپۋبليكاسى فيلولوگتەرىنىڭ «قازاقستاندا فيلولوگيالىق ءبىلىم بەرۋدىڭ نەگىزگى جولدارى» تاقىرىبىندا وتكەن ءبىرىنشى سەزىنە دەلەگات بولىپ قاتىستى. وبلىس كولەمىندە «جاس تەاتر كورەرمەنى» ادەبي دراما ۇيىرمەسىنىڭ باعدارلاماسىن قۇراستىردى. وبلىس كولەمىنە 10-سىنىپتارعا ارنالعان «پۋشكينيانا» قولدانبالى كۋرسى ءىس-تاجىريبەسى تاراتىلدى.
مۇعالىم باتىس قازاقستان وبلىسى مەن ورال قالاسىندا وتكەن ءپان وليميپيادالارىنا, بايقاۋلارعا ادىلقازى رەتىندە قاتىسىپ كەلەدى. «ورىس ءتىلى» مەن «ورىس ادەبيەتى» وقۋلىقتارىن تالداۋعا ارنالعان عىلىمي رەسپۋبليكالىق ءبىلىم بەرۋ ورتالىعىندا ەكسپەرتتىك كوميسسيا مۇشەسى. وبلىستىق شىعارماشىلىق توپ قۇرامىندا 5-11 سىنىپتارعا ارنالعان ورىس ءتىلى مەن ادەبيەتى پانىنەن تاقىرىپتىق-كۇنتىزبەلىك جوسپار قۇراستىرۋدا وبلىس مۇعالىمدەرىنە ادىستەمەلىك كومەك كورسەتەدى.
ەلمارا اسقارقىزىنىڭ وقۋشىلارى جىل سايىن ورال قالالىق, باتىس قازاقستان وبلىستىق, ءتىپتى رەسپۋبليكالىق سايىس, وليمپيادالاردا جۇلدەگەر, جەڭىمپاز اتانىپ ءجۇر.
اتاپ ايتار بولساق, 2019-2020 وقۋ جىلىندا رەسپۋبليكالىق عىلىمي جوبا سايىسىندا 11 سىنىپ وقۋشىلارى ن.عابدۋلعازيزوۆا مەن ز.تولەمىسوۆا قالالىق دەڭگەيدى – ءى ورىن, وبلىستىق دەڭگەيدە – ءىى ورىنعا يە بولدى. «پوەزيا دۋشي پۋشكينا» اتتى مانەرلەپ وقۋ سايىسىندا ن.عابدۋلعازيزوۆا رەسپۋبليكادا جەڭىمپاز اتاندى. ەسسە بايقاۋىندا ز.تولەمىسوۆا رەسپۋبليكادا ءىى ورىن الدى.
بۇدان بولەك, رەسپۋبليكالىق «تەاتردىڭ عاجايىپ الەمى» كونكۋرسىندا ە.ترايسوۆا باپتاعان وقۋشىلار توبى قالالىق دەڭگەيدە دە, وبلىستىق دەڭگەيدە دە ءى ورىنعا يە بولدى. 10-سىنىپ وقۋشىسى ا.نۇرلان ۇلى «ۇزدىك ەر ادام ءرولى» اتاعىن يەلەنسە, ن.عابدۋلعازيزوۆا «ۇزدىك اكتەرلىك ورىنداۋشى» اتاعىمەن ماراپاتتالدى.
ماقتاۋلى مۇعالىمنىڭ شاكىرتتەرى حالىقارالىق بايقاۋلاردا دا بيىكتەن كورىنىپ ءجۇر. 2020-2021 وقۋ جىلىندا حالىقارالىق ورىس ءتىلى ءپان وليمپياداسىندا گ.اسقاروۆا, م.ءجانتولينا «التىن سەرتيفيكاتقا» يە بولدى.
وسىنداي جۇيەلى جەتىستىكتەرى ءۇشىن ەلمارا اسقارقىزىنىڭ ءوزى 2016 جىلى رەسپۋبليكانىڭ «ۇزدىك پەداگوگى» اتانعان بولاتىن. ونىڭ ەسىمى «لۋچشيە ليۋدي, لۋچشيە ۆ وبرازوۆاني» اتتى حالىقارالىق ەنتسيكلوپەديا جيناعىنا ەنگەن.
«ەلمارا اسقارقىزى – بولاشاقتا دا شىعارماشىلىق جۇمىسىن تولىقتىرىپ, وقۋشىنى جەكە تۇلعا رەتىندە قالىپتاستىرۋعا بارىن سالاتىن جاڭاشىل, ىزدەنىمپاز مۇعالىم», دەيدى ارىپتەستەرى.
بايقاعانىمىزداي, ەلمارا اسقارقىزىنىڭ شاكىرتتەرى تەاتر ونەرىن ەرەكشە قادىرلەيدى. بۇل وقۋشىنىڭ بويىنا ۇستازدىڭ ۇلاعاتىمەن سىڭگەن قۇبىلىس. وتكەن 2022-2023 وقۋ جىلىندا عانا ە.ترايسوۆانىڭ شاكىرتى ا.يسليام «تەاتردىڭ عاجايىپ الەمى» اتتى رەسپۋبليكالىق فەستيۆال-بايقاۋىنىڭ «ەكىنشى پلانداعى ۇزدىك ءرول» نوميناتسياسى بويىنشا جەڭىمپاز اتاندى. رەسپۋبليكالىق عىلىمي جوبالار جارىسىنا قاتىسقان ا.ايباسوۆا «تەاتر ۋج پولون...» تاقىرىبىندا قالالىق كەزەڭىندە – ءى ورىن, وبلىستىق كەزەڭدە – ءىى ورىن الىپ, رەسپۋبليكاعا جولداما جەڭىپ الدى. ال 5-سىنىپ وقۋشىلارى س.قيلاۋ, ا.يسماعۇلوۆا, ا.بيسەنعاليەۆ, ز.حولماتوۆا وبلىستىق «تابيعاتتى ايالا» جاس ولكەتانۋشىلار فورۋمىندا «ەكوتەاتر» نوميناتسياسى بويىنشا ءى ورىن يەلەندى. «تەاتردىڭ عاجايىپ الەمى» تەاتر ونەرىنىڭ قالالىق فەستيۆال-بايقاۋىندا اسان تايمانوۆ اتىنداعى №34 مەكتەپ-گيمنازياسىنىڭ «تيۋز» كومانداسى ءىى ورىن يەلەندى.
«تەاتردى سۇيەتىن, ادەبيەتكە قۇمار جاس ورەن زيالى ازامات بولىپ قالىپتاسادى. ەلدىڭ بولاشاعى – وسىنداي ورەلى جاستار» دەيدى قازاقستاننىڭ ەڭبەك ەرى.
باتىس قازاقستان وبلىسى
