فوتو www.vr.zp.ua
مينيسترلىكتىڭ مالىمدەۋىنشە, قازىر قازاقستاندا اي-92 ماركالى بەنزين مەن ديزەل وتىنىن تۇتىنۋ ەرەكشە ارتىپ وتىر. قارجى مونيتورينگى اگەنتتىگىنىڭ ايتۋىنشا جانار-جاعارمايدىڭ زاڭسىز ەكسپورتىنىڭ اي سايىنعى كولەمى 10 مىڭ تونناعا جەتكەن. ونىڭ باستى سەبەبى باعا ايىرماشىلىعىندا بولىپ وتىر. قازاقستاندا جانار-جاعارماي باعاسى كورشى ەلدەرمەن سالىستىرعاندا ايتارلىقتاي تومەن.
«ەنەرگەتيكا ءمينيسترىنىڭ 2023 جىلعى 24 ناۋرىزداعى №118 بۇيرىعىنا وزگەرىستەر ەنگىزۋ تۋرالى ەنەرگەتيكا, ساۋدا جانە ينتەگراتسيا, قارجى جانە ۇلتتىق ەكونوميكا مينيسترلىكتەرىنىڭ بىرلەسكەن بۇيرىعىنىڭ جوباسى دايىندالدى. بۇيرىق جوباسىندا مۇناي ونىمدەرىنىڭ جەكەلەگەن تۇرلەرىن قازاقستان رەسپۋبليكاسىنىڭ اۋماعىنان ەۋرازيالىق ەكونوميكالىق وداقتىڭ كەدەندىك اۋماعىنان تىس جەرلەرگە اكەتۋگە تىيىم سالۋ مەرزىمىن 2024 جىلعى 31 جەلتوقساننان 2026 جىلعى 31 جەلتوقسانعا دەيىن ۇزارتۋ كوزدەلگەن. مۇناي ونىمدەرىن ەكسپورتتاۋدى باقىلاۋدى كۇشەيتۋ قاجەت», دەلىنگەن حابارلامادا.
