فوتو: Qamshy.kz
تۋرنير «كوشپەلىلەردىڭ اسىق سپورتى» حالىقارالىق فەدەراتسياسى, «رەسپۋبليكالىق اسىق اتۋ» فەدەراتسياسى, قر تۋريزم جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى جانە «ۇلتتىق جانە ات سپورتى تۇرلەرى ورتالىعىمەن» بىرلەسىپ ۇيىمداستىرىلىپ جاتىر.
تۋرنير اياسىندا ەلىمىزدىڭ ءار ايماعىندا وتكەن ىرىكتەۋ كەزەڭدەرىندە 21 جاستان اسقان 2 مىڭعا جۋىق ادام ءوزارا باق سىناستى. ءار وڭىردەن ۇزدىك شىققان 2 سپورتشى ەلوردادا وتەتىن فينالدىق ويىندارعا جولداما الدى.
شەشۋشى ويىندار 25 قازان كۇنى استاناداعى «Qazaqstan» جەڭىل اتلەتيكالىق سپورت كەشەنىندە وتەدى, وندا تۋرنير جەڭىمپازىنا اۆتوكولىك سىيعا بەرىلەدى.
«كوشپەلىلەردىڭ اسىق سپورتى» حالىقارالىق فەدەراتسياسىنىڭ پرەزيدەنتى, «Respublica» پارتياسىنىڭ ماجىلىستەگى دەپۋتاتى ولجاس قۇسپەكوۆ ۇلتتىق ويىندى جاڭعىرتۋ – ۇلتتىق جانە رۋحاني قۇندىلىقتارىمىزدى, مادەنيەتىمىزدى دارىپتەۋگە ىقپال ەتۋگە جانە سپورتشىلارعا ءوز شەبەرلىكتەرىن شىڭداۋعا زور مۇمكىندىك ەكەنىن اتاپ ءوتتى.
«ۇلتتىق ويىندارىمىزدىڭ بۇگىندە قايتا ورىستەپ جاندانۋى قۋانىشتى جاعداي. وسىنداي جارىستاردى نەعۇرلىم ءجيى ۇيىمداستىرۋ ارقىلى ۇلتتىق ويىنداردى بارىنشا ناسيحاتتايمىز. سونىمەن قاتار سايىستار سپورتشىلاردىڭ شەبەرلىگىن شىڭدايدى, ولاردىڭ جان-جاقتى دامۋى ءۇشىن زور سەپتىگىن تيگىزەدى دەپ ەسەپتەيمىن. Respublica پارتياسىنىڭ سايلاۋالدى باعدارلاماسىندا قازاقتىڭ تاريحي-مادەني مۇرالارىن ساقتاۋ جانە دارىپتەۋ, ۇلتتىق قۇندىلىقتاردى ۇرپاققا جەتكىزۋ ماقسات ەتىلگەن. سول العان باعىتىمىزدان تايماي, جۇمىس جاساۋدى جالعاستىرا بەرەمىز», دەدى ولجاس حايروللا ۇلى.
ايتا كەتۋ كەرەك, «كوشپەلىلەردىڭ اسىق سپورتى» حالىقارالىق فەدەراتسياسى قۇرىلعان جارتى جىلدىڭ ىشىندە 14 ەلدە تۇراقتى اسىق ويناۋ فەدەراتسيالارى تىركەلدى, اسىق ويناۋ سپورتى كوشپەلىلەر ويىنىنىڭ تۇراقتى ديستسيپليناسى بولىپ بەكىتىلدى. ەندى, ەكى جىلدا ءبىر رەت الەم چەمپيوناتى وتكىزىلىپ تۇرادى. العاشقىسى بيىل ۇيىمداستىرىلىپ, وعان 14 ەلدىڭ وكىلدەرى قاتىستى.
