فوتو: freepik.com
مادەنيەت جانە اقپارات مينيسترلىگىنىڭ مالىمەتىنشە, ەلىمىزدە 12 مىڭعا جۋىق كىتاپحانا بار, ولاردىڭ 4 مىڭعا جۋىعى اتالعان ۆەدومستۆونىڭ قاراماعىندا. 9,5 مىڭنان استام كىتاپحاناشى 73 ميلليونعا جۋىق كىتاپتى ساقتاۋمەن اينالىسادى. 2020-2024 جىلدار ارالىعىندا كوپشىلىك كىتاپحانا پايدالانۋشىلارىنىڭ سانى 3 ميلليوننان 5 ميلليونعا دەيىن وسكەن. ەلەكتروندى كىتاپتار مەن قۇجاتتارعا جىل سايىن 110 ەلدىڭ پايدالانۋشىلارى جۇگىنەدى ەكەن.
«مينيسترلىك كىتاپحانالاردى جاڭعىرتۋ, ولاردى جابدىقتاۋ مەن قورلاردى تولىقتىرۋ جۇمىستارىن جالعاستىرىپ جاتىر. «قازاقستاندىق ۇلتتىق ەلەكتروندىق كىتاپحانا» جوباسى ايتارلىقتاي دامىپ كەلەدى. سىزدەردىڭ ەڭبەكتەرىڭىز بەن مادەني مۇرانى ساقتاۋ جولىنداعى ۇلەستەرىڭىزگە شىنايى العىسىمىزدى بىلدىرەمىز. بارشاڭىزعا زور دەنساۋلىق پەن تابىس تىلەيمىز», دەلىنگەن ۆەدومستۆو اقپاراتىندا.
