ۇلتتىق مەرەكە – رەسپۋبليكا كۇنى قارساڭىندا مەملەكەتتىك كەڭەسشى ەرلان قارين ۇلتتىق قۇرىلتايدىڭ, قازاقستان رەسپۋبليكاسى پرەزيدەنتىنىڭ جانىنداعى جاستار ساياساتى جونىندەگى كەڭەستىڭ بىرقاتار مۇشەسىنە, ايماقتان كەلگەن قوعام بەلسەندىلەرىنە مەملەكەتتىك ناگرادا تاپسىردى.
اتاپ ايتقاندا, «پاراسات» وردەنىمەن ۇلتتىق قۇرىلتايدىڭ مۇشەسى, تۇركىستان وبلىستىق قوعامدىق كەڭەسىنىڭ توراعاسى ءبايدىلدا جىلقىشيەۆ ماراپاتتالدى.
ال ۇلتتىق قۇرىلتايدىڭ, باتىس قازاقستان وبلىستىق قوعامدىق كەڭەسىنىڭ مۇشەسى باۋىرجان عۇبايدۋللين, م.وتەمىسوۆ اتىنداعى باتىس قازاقستان ۋنيۆەرسيتەتىنىڭ دوتسەنتى جاڭابەك جاقسىعاليەۆ, قوستاناي اۆتوموبيل كولىگى كوللەدجىنىڭ ديرەكتورى دميتري پاۆلەنكو «قۇرمەت» وردەنىنىڭ يەگەرى اتاندى.
سونداي-اق شىعىس قازاقستان وبلىسى ازاماتتىق اليانسىنىڭ توراعاسى, وبلىستىق كوعامدىق كەڭەستىڭ مۇشەسى اياۋجان ءاشىموۆا مەن شىعىس قازاقستان وبلىسى ۇلان اۋدانىنداعى قاسىم قايسەنوۆ اتىنداعى ورتا مەكتەپتىڭ ديرەكتورى اسەم چامكاەۆاعا «ەرەن ەڭبەگى ءۇشىن» مەدالى تاپسىرىلدى.
پرەزيدەنت جانىنداعى جاستار ساياساتى جونىندەگى كەڭەستىڭ مۇشەلەرى – ءدىنتانۋشى, ءدىني ەكسترەميزمگە قارسى ءىس-قيمىل جونىندەگى ساراپشى ەلنار بەرىكباەۆ, «قوعامدىق كەلىسىم» ينستيتۋتىنىڭ ديرەكتورى ەلينا ماساگۋتوۆا, قوعام بەلسەندىسى عالىمجان مىرزاباەۆ, سونداي-اق قازاقستاننىڭ ازاماتتىق اليانسىنىڭ اتقارۋشى ديرەكتورى مۇرات وماشەۆ «شاپاعات» مەدالىمەن ماراپاتتالدى.
ە.قارين تاۋەلسىزدىك پەن ەگەمەندىكتىڭ, بارشا ازاماتتىڭ بەرەكەلى بىرلىگى مەن ىرىستى ىنتىماعىنىڭ جارقىن ءرامىزى سانالاتىن ۇلتتىق مەرەكە – رەسپۋبليكا كۇنىمەن ماراپات يەلەرىن قۇتتىقتادى.
