سالتاناتتى ءىس-شاراعا قازاقستاننىڭ وزبەكستانداعى ەلشىسى بەيبىت اتامقۇلوۆ, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى بولات تىلەپ, سامارقاند مەملەكەتتىك ۋنيۆەرسيتەتىنىڭ رەكتورى رۋستام حالمۋرادوۆ قازاقستان عىلىم جانە جوعارى ءبىلىم مينيسترلىگىنىڭ, وزبەكستان جوعارى ءبىلىم, عىلىم جانە يننوۆاتسيالار مينيسترلىگىنىڭ وكىلدەرى قاتىستى.
ورتالىقتىڭ اشىلۋ سالتاناتىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى بولات تىلەپ ءسوز سويلەپ, عىلىمي-مادەني ورتالىق, قازاق ءتىلى مەن ادەبيەتى ءبولىمىنىڭ اشىلۋى – ەكى ەل اراسىنداعى ىنتىماقتاستىقتى نىعايتۋ, ءبىلىم مەن مادەنيەت سالاسىنداعى بايلانىستاردى دامىتۋ جولىنداعى ماڭىزدى قادام ەكەنىن جەتكىزدى.
«بۇل – شەتەلدە اباي ۋنيۆەرسيتەتى تاراپىنان اشىلعان جەتىنشى ورتالىق. سامارقاند تورىندە بوي كوتەرگەن ورتالىق تەك ءبىلىم مەن تاجىريبە الماسۋ الاڭىنا اينالىپ قانا قويماي, تۇركىتىلدەس حالىقتار اراسىنداعى دوستىق پەن ءوزارا تۇسىنىستىك قارىم-قاتىناستى دامىتۋعا قىزمەت ەتەدى», دەدى ول.
ءىس-شارا اياسىندا اباي ۋنيۆەرسيتەتى وكىلدەرى سامارقاند مەملەكەتتىك ۋنيۆەرسيتەتىنىڭ رەكتورى رۋستام حالمۋرادوۆپەن, فيلولوگيا فاكۋلتەتىنىڭ پروفەسسور-وقىتۋشىلار قۇرامىمەن كەزدەسىپ, ءبىلىم, عىلىم سالاسىنداعى بايلانىس تۋرالى پىكىرلەستى.
بيىل اباي اتىنداعى قازۇپۋ-دا الىشەر ناۋاي اتىنداعى ءتىل جانە ادەبيەت ورتالىعى اشىلىپ, تۇركىتىلدەس حالىقتارعا ورتاق تۇلعانىڭ شىعارماشىلىعىن زەرتتەۋ جانە ناسيحاتتاۋ ءىس-شارالارى باستاۋ الدى. قازىرگى تاڭدا اباي ۋنيۆەرسيتەتىندە وزبەكستاننان كەلگەن 148 ستۋدەنت ءبىلىم الادى.
