فوتو: قر جوعارعى سوتى
سوت اكىمشىلىگىنىڭ باسشىسى نايل احمەتزاكيروۆ بيىلعى ءۇش توقساننىڭ قورىتىندىسى بويىنشا اۋماقتىق بولىمشەلەردىڭ باسشىلارىمەن كەڭەس وتكىزدى. كەزدەسۋ بارىسىندا ن.احمەتزاكيروۆ جاقىندا وتكەن سۋديالاردىڭ IX سەزىندە مەملەكەت باسشىسىنىڭ العا قويعان مىندەتتەرى اياسىندا بىرقاتار باسىم باعىتتاردى اتاپ ءوتتى.
اتاپ ايتقاندا, سوتتاردى ودان ءارى وڭتايلاندىرۋ, ينفراقۇرىلىمدى دامىتۋ, يننوۆاتسيالىق تەحنولوگيالار مەن جاساندى ينتەللەكت كومەگىمەن سوت ءىسىن جۇرگىزۋدى جەڭىلدەتۋ, ەكساۋماقتىق سوتتىلىقتى كەڭەيتۋ تۋرالى اڭگىمە بولدى. جۇمىس ناتيجەلەرى تۋرالى استانا, شىمكەنت, قوستاناي, جامبىل جانە تۇركىستان وبلىستارى ءسا دەپارتامەنتتەرىنىڭ باسشىلارى ەسەپ بەردى.
دەپارتامەنت باسشىلارى ەلدوس جۇماقسانوۆ پەن بەرىك مەيىرحانوۆ استانا مەن شىمكەنت قالالارىندا جۇرگىزىلىپ جاتقان جالپى يۋريسديكتسياداعى اۋداندىق سوتتاردىڭ بىرىگۋىنىڭ وڭ ناتيجەسىن اتاپ ءوتتى. وڭتايلاندىرۋ سۋديالاردىڭ جۇكتەمەسىن تەڭەستىرۋگە, بيۋدجەت شىعىندارىن قىسقارتۋعا, سوتتىلىققا قاتىستى داۋلاردان تۋىنداعان قاعازباستىلىقتى جويۋعا جانە جەكە شاعىمداردىڭ سانىن ازايتۋعا مۇمكىندىك بەردى.
قازىرگى ۋاقىتتا جوعارعى سوت توراعاسىنىڭ تاپسىرماسى بويىنشا باسقا وڭىرلەردە دە وسىنداي وڭتايلاندىرۋدى جۇرگىزۋ مۇمكىندىگى زەرتتەلىپ جاتىر.
«سونىمەن قاتار جيىندا ءىت-ونىمدەردى پايدالانۋ ناتيجەلەرى دە ايتىلدى. سوت ورىنداۋشىلارىنىڭ سانكتسيالاۋ قاۋلىلارىن جانە سوت بۇيرىعىن شىعارۋىنا روبوتتاندىرۋدىڭ ەنگىزىلۋى سوتتارداعى بيزنەس-پروتسەستەردى ايتارلىقتاي جەڭىلدەتتى, بۇل جالپى العاندا اتالعان ىستەر بويىنشا سوت تورەلىگىن جۇزەگە اسىرۋ ساپاسىنا جانە ولارداعى شاعىمداردىڭ ازايۋىنا وڭ اسەر ەتتى. سونداي-اق اۋماقتىق دەپارتامەنتتەردىڭ باسشىلارى سۋديالار اراسىندا «تسيفرلىق سوت ساراپتاماسى» IT-سەرۆيسىنە دەگەن سۇرانىستى اتاپ ءوتتى. وسى مودۋل پايدالاناتىن جاساندى ينتەللەكت سوت اكتىلەرى بانكىنىڭ تالداۋى نەگىزىندە ءىستىڭ ناتيجەسىن بولجايدى», دەلىنگەن حابارلامادا.
نايل احمەتزاكيروۆ «تورەلىك 2.0» جاڭارتىلعان نۇسقاسى, سوت ورگاندارىنىڭ بىرىڭعاي پورتالى, «ە-زاڭ كومەگى» جۇيەسى جانە اكىمشىلىك ىستەردى ەكساۋماقتان تىس ءبولۋ ىسكە قوسىلعانىن حابارلادى. سونىمەن قاتار ينفراقۇرىلىمدىق جوبالاردى جۇزەگە اسىرۋ بارىسى تالقىلاندى.
ايتا كەتەيىك, بيىلدىڭ وزىندە تۇركىستان وبلىستىق سوتىنىڭ, پاۆلودار جانە اتىراۋ قالالىق سوتتارىنىڭ, سولتۇستىك قازاقستان وبلىسىندا ع.مۇسىرەپوۆ, شىعىس قازاقستان وبلىسىندا گلۋبوكوۆسكي, باتىس قازاقستان وبلىسىندا بوكەيوردا اۋداندىق سوتتارىنىڭ 6 جاڭا عيماراتى پايدالانۋعا بەرىلگەن.
ال, اباي اۋدانى جانە بورودۋليحا اۋداندىق سوتى عيماراتتارىنىڭ قۇرىلىسى جاقىندا اياقتالادى. جەرگىلىكتى اتقارۋشى ورگاندارمەن بىرلەسە وتىرىپ, اقتوبە, پاۆلودار, الماتى, باتىس قازاقستان, تۇركىستان جانە ماڭعىستاۋ وبلىستارىندا سوت عيماراتتارىنىڭ قۇرىلىسى بويىنشا 13 جوبانى ازىرلەۋ پروتسەسى ءجۇرىپ جاتىر, ونىڭ ەكەۋىنىڭ قۇرىلىسى 2025 جىلدىڭ باسىنا جوسپارلانعان.
جالپى, قابىلدانعان جۇيەلى شارالار سوت جۇيەسىنە دەگەن سەنىمنىڭ ارتۋىنا وڭ اسەرىن تيگىزدى. حالىق سەنىمىنىڭ ءابسوليۋتتى دەڭگەيى 0,8%-عا (2023 جىلمەن سالىستىرعاندا) ارتىپ, سوتتارداعى جۇمىستى ۇيىمداستىرۋ جاقسارا تۇسكەن.
كەزدەسۋ قورىتىندىسى بويىنشا ن.احمەتزاكيروۆ سوت اكىمشىلىگى قىزمەتىنىڭ نەگىزگى باعىتتارى بويىنشا بىرقاتار ناقتى مىندەت قويدى. اتاپ ايتقاندا, باسشى وڭىرلىك بولىمشەلەردىڭ نازارىن قارجىلىق ءتارتىپ پەن سىبايلاس جەمقورلىققا قارسى زاڭنامانى قاتاڭ ساقتاۋ قاجەتتىلىگىنە اۋداردى.سونداي-اق اۋماقتىق ورگاندارعا تالداۋ جۇمىستارىن جانە كادرلىق جۇمىستى كۇشەيتۋ تاپسىرىلدى.
