اجەلەر سالعان اندەر-اي

قالاعا قاراستى قارعالى اۋىل­دىق ارداگەرلەر كەڭەسى جانىنان قۇرىلعان «گەولوگ» مادەنيەت ءۇيى­نىڭ «اسىل اجەلەر» حالىقتىق ءان ءانسامبلى – وبلىسقا كەڭىنەن تانىمال ونەر ۇجىمى. انسامبل 2008 جىلى قۇرىلىپ, اراعا ءبىر جىل سالىپ حالىقتىق اتاققا يە بولدى. ونەر ۇجىمىنىڭ ومىرگە كەلۋىنە سول كەزدەگى قارعالى اۋى­لىنىڭ اكىمى مۇحامبەتقالي قاز­كەەۆ, اۋىلدىق ارداگەرلەر كەڭەسىنىڭ توراعاسى لەسكەن ءىز­بانوۆ جانە ەڭبەك ارداگەرى قال­فيا ءامىروۆا ۇيىتقى بولدى. ءبى­راز ۇيىمداستىرۋ جۇمىستارى جۇرگىزىلگەن سوڭ ءان سالۋعا يكەم­دى 13 اجەنىڭ باسى قوسىلىپ, ءانسامبلدىڭ نەگىزى قالاندى. وعان سول كەزدە وسى اۋىلداعى №3 مۋزىكا مەكتەبى ديرەكتورىنىڭ تاربيە ءىسى جونىندەگى ورىنباسارى قاراگوز ساعىنوۆا قوعامدىق نەگىزدە كوركەمدىك جەتەكشىلىك ەتتى. انسامبل العاشقى كونتسەرتتەرىن اۋىلداستارىنىڭ نازارىنا ۇسىن­دى. قاۋىمنىڭ كوڭىلىنەن شىقتى. ءسويتىپ, انسامبل وبلىستىق, قالالىق مادەني شارالارعا قا­تىسا باستادى. «اسىل اجەلەر» حا­لىقتىق ءان ءانسامبلى وبلىستىق, رەسپۋبليكالىق, حالىق­ارالىق ونەر بايقاۋلارى مەن فەس­تيۆالدارىنا قاتىسىپ, جۇلدەدەن قۇر قالعان كەزى جوق. – قازىر انسامبل قۇرامىندا 60-77 جاس ارالىعىنداعى 20 اجە بار. وزدەرىمىز اۋداندارعا شىعىپ, كونتسەرتتەر بەرىپ ءجۇرمىز. ونەردىڭ كۇشى سوندا بولار, اجەلەر مۇنداي ساپارلاردا قانشا شارشاپ-شال­دىقسا دا ەشقاشان باس تارتقان ەمەس. بيىلدىڭ وزىندە وبلىستا بىرنەشە كونتسەرت بەردىك. ەكى رەت رەسەيدىڭ كورشىلەس اۋداندارىنا بارىپ, ونەر كورسەتىپ قايتتىق. وندا دا جىلى قابىلدادى. قازاقى ۇلتتىق كيىمدەرىمىز جەتەرلىك. وسى «گەولوگ» مادەنيەت ۇيىنەن بولمە ءبولدى, كوركەمدىك جەتەكشىمىزگە شتات قاراستىرىلدى. جاڭا اندەردى ايتۋعا وسىندا دايىندالامىز. قازىر رەپەرتۋارىمىزدا 100-گە جۋىق اندەر بار. قازاقتىڭ حالىق اندەرىن, ورىس, ۋكراين, تاتار جانە باسقا ۇلتتاردىڭ ءان­دەرىن دە شىرقايمىز. ابايدىڭ «كوزىمنىڭ قاراسى» ءانىن ءۇش تىلدە ورىنداۋ ءۇشىن اعىلشىنشا دا ءتىل سىندىرۋعا تۋرا كەلدى, – دەيدى ءانسامبلدىڭ كور­كەمدىك جەتەك­شىسى قاراگوز ساعىنوۆا بىزبەن اڭگىمەسىندە. سويتكەنشە بولماي, كەزەكتى دايىندىققا كەلگەن اسىل اجەلەردىڭ الدى دا كورىنە باستادى. ءبىز ولاردى دا سوزگە تارتىق. – كەزىندە شالقار اۋدانىنىڭ بوزوي ەلدى مەكەنىندە گاز مەكە­مەسىندە لابورانت بولىپ ەڭبەك ەتتىم. ون بالا ءوسىرىپ, تاربيەلەپ, 15 نەمەرە, 4 شوبەرە ءسۇيىپ وتىرمىن. شالىم ومىردەن وزدى. مەن انسامبل قۇرىلعاننان بەرى قاتى­سىپ كەلەمىن. اپتاسىنا ەكى رەت دايىندىققا كەلەمىز. قول قۋسىرىپ بوس وتىرعاننان گورى وسىلاي ارالاسىپ, بويىمىزداعى ونەر ارقىلى كەيىنگى بالالارعا ۇلگى بولار ءىس تىندىرۋدان ارتىق باقىت بار ما؟ انسامبلگە ۇدايى دە­مەۋشىلىك جاساپ, مەيرام سايىن اقشالاي سىيلىعىن ۇسىنىپ, داستارقان جاياتىن «ارىستانعالي» شارۋا قوجالىعىنىڭ باسشىسى قايىرعالي ارىستانعاليەۆ بالا­مىزعا العىسىمىز شەكسىز, – دەيدى 71 جاستاعى گۇلارا شالاباەۆا. ال الماگۇل تاسقوجينانىڭ انسامبل قۇرامىنا قابىلدانعانىنا ەكى اي عانا بولىپتى. انسام­بل­دىڭ دايىندىعىنا كور­شى­لەس مۇعالجار ورمان شارۋا­شىلىعىنان كەلىپ قاتىسادى ەكەن. – مەنى شولپان دەگەن اپاي: «وسىنداي انسامبل بار, بارىپ قاتىسسايشى, ونەرىڭ بار عوي», دەپ قوياردا-قويماي كوندىردى. شالقاردا كوپ جىل ۇستاز بولدىم. كوركەمونەرپازدار ۇيىرمەلەرىنە قاتىساتىنمىن, 1988 جىلى ال­ماتىدا وتكەن بايقاۋدا ونەر كورسەتكەنىم بار. انسامبل ۇجىمى ۇيىمشىل, ونەردى قادىرلەيتىن انالار مەن اجەلەر. وسىنداي ۇجىمعا تاپ بولعانىما قۋانىشتىمىن. زەينەتكەرمىن دەپ قاراپ وتىر­عانشا, ونەرىڭمەن وزگەلەرگە قىزمەت ەتكەنگە نە جەتسىن, – دەيدى ول. انسامبل مۇشەلەرى ايلىق المايدى, ارالاسىپ جۇرگەندەرىنە, ونەرلەرى حالىق كادەسىنە جارا­عانىنا, ءوزارا كەزدەسكەندەرىنە ءدان ريزا. وبلىس كولەمىندە انسۇيەر قاۋ­ىمعا كوزايىم بولىپ كەلە جات­قان «اسىل اجەلەر» حالىقتىق ءان ءانسامبلىن ەندى ەلىمىز عانا ەمەس, الىس شەتەلدەر دە تا­ني­تىن بولادى دەسەك, ارتىق ايتقاندىق بولا قويماس. وعان استانادا قا­زاقستان مەن يسپانيا بىرلەسىپ وتكىزگەن «فيەستالونيا قازاقستان» حالىقارالىق كونكۋرسىندا «اسىل اجەلەر» ان­سامبلىنىڭ ۆوكال نوميناتسياسى بويىنشا ءبىرىنشى ورىن يەلەنىپ, ديپلوممەن جانە ەس­كەرت­كىش سىيلىقپەن ماراپاتتالۋى دەر ەدىك. بۇل كونكۋرسقا قا­زاقستان مەن يسپانيادان باسقا, رەسەيدەن, يتاليادان, سونداي-اق, فرانتسيادان بارلىعى 800 ونەر ۇجىمى قاتىسقان. ۆوكال نوميناتسياسى بويىنشا جاس ەرەكشەلىكتەرىنە قاراي 87 ونەر ۇجىمى سىنعا تۇسكەن. – ءبىزدىڭ انسامبل بۇل كون­كۋرسقا جان-جاقتى دايىندالدى. ارنايى كيىم تىكتىردىك. اس­تاناعا بارۋ ءۇشىن قارجى جا­عىنان قيىندىق تا كەزدەستى. الايدا, تاعى دا «ارىستانعالي» شارۋا قوجالىعىنىڭ باسشىسى قايىرعالي ارىستانعاليەۆ قولداۋ كورسەتتى. «جاقسىنىڭ جاقسىلىعىن ايت, نۇرى تاسىسىن» دەمەي مە قازاق, سول كى­سىنىڭ مەتسەناتتىعىن كوپتەن بەرى كورىپ كەلە جاتقانىمىزدى ايرىقشا ايت­قىم كەلەدى. ال كونكۋرسقا كەلسەك, ءبىز ۆوكال نوميناتسياسى بويىنشا تۇمانباي مولداعاليەۆتىڭ سوزىنە جازىلعان نۇرعيسا تىلەنديەۆتىڭ «جاعاداعى ارۋ قىز» ءانىن ءتورت داۋىستا ورىندادىق, جاياۋ مۇسانىڭ «اق سيسا» ءانىن ەكى داۋىستا شىر­قادىق. ناتيجەسىندە ەرەسەكتەر اراسىنداعى ۆوكال نوميناتسيا­سى بويىنشا ءبىرىنشى ورىندى يەلەندىك. قازىلار كيگەن ۇلتتىق كيىمىمىزدى, اجەلەردىڭ ءان ايتۋ شەبەرلىگىن, وزدەرىن ساحنادا ۇستاۋ مادەنيەتىن وتە جوعارى باعالادى, – دەيدى قاراگوز ساعىنوۆا. ساتىبالدى ءساۋىرباي, «ەگەمەن قازاقستان». اقتوبە وبلىسى.