فوتو: وبلىس اكىمدىگى
ءاۋتيزمى جانە باسقا دا وي-سانا كىناراتتارى بار بالالارعا ارنالعان مەكەمە جىل سايىن 125 ەرەكشە بالانى اقىسىز قابىلدايدى. ول اقتوبە قالاسى ساڭكىباي باتىر داڭعىلى №171ب مەكەنجايىندا ورنالاسقان.
ورتالىقتى رەسپۋبليكا كۇنى قارساڭىندا وبلىس اكىمدىگى, «سامۇرىق-قازىنا», «قازاقستان حالقىنا» «قامقورلىق» قورلارىمەن بىرلەسە ىسكە قوستى.
«رەسپۋبليكا كۇنى قارساڭىندا, مەنتالدى بۇزۋشىلىقتارى بار بالالارعا ارناۋلى الەۋمەتتىك قىزمەتتەر كورسەتەتىن مەملەكەتتىك مەكەمە اشىپ وتىرمىز. وبلىستا 18 جاسقا دەيىنگى مەنتالدى بۇزۋشىلىقتارى بار 635 مۇگەدەك بالا ەسەپتە تۇر. بۇگىن اشىلاتىن ورتالىقتىڭ ماماندارى بالالار مەن ولاردىڭ وتباسىلارىنا ناتيجەلى كومەك الۋعا جاعدايلار جاسايدى. جىل سايىن 50-دەن 100 بالاعا دەيىن كەشەندى قىزمەتتەر كورسەتىلەدى», دەدى ءوڭىر باسشىسى اسحات شاحاروۆ.
بولاشاقتا جاسوسپىرىمدەر وزدەرىن قامتاماسىز ەتۋ ءۇشىن اعاش ۇستاسى, قىش جانە تىگىن شەبەرحانالارىندا ساباقتار قاراستىرىلعان. سونداي-اق, ورتالىقتا ۆيزۋالدى بايلانىس ورناتۋدا قيىندىقتارى بار بالالار ءۇشىن روبوتوتەراپيا قولدانىلادى, وندا بالالار روبوتتارمەن ءوزارا قارىم-قاتىناس جاساۋدى ۇيرەنەدى. سونىمەن قاتار, لەگوتەراپيا, روبوتوتەحنيكا, ارت-تەراپيا جانە مۋزىكالىق تەراپيا ساباقتارى بالالاردىڭ دامۋىنا عانا ەمەس, الەۋمەتتەنۋىنە, قوعامعا ەنۋىنە جانە تولىققاندى ءومىر سۇرۋىنە سەپتىگىن تيگىزەدى.
ايتا كەتسەك, اتالعان ورتالىقتان بولەك, «سامۇرىق-قازىنا» اق كومپانيالارى توبىنىڭ بىرىڭعاي قايىرىمدىلىق وپەراتورى – «Samruk-Kazyna Trust» قورىنىڭ قارجىلاندىرۋىمەن وڭالتۋ جانە ەرتە ارالاسۋ ورتالىقتارى جۇمىس ىستەپ, ارقايسىسى جىلىنا 600 بالانى قامتىپ وتىر. بۇگىندە 1994 بالا قابىلدانىپ, 153-ءى ءتاي-ءتايلاپ العاشقى قادامىن باسسا, ال 331-ءى العاشقى ءسوزىن ايتقان.«ەرەكشە بالا اسىراپ وتىرعان ءار اتا-انا ءۇشىن مۇنداي ورتالىقتاردىڭ ماڭىزى زور. ءبىزدىڭ ماقساتىمىز – ەلدىڭ بارلىق ءوڭىرىن قامتي وتىرىپ, ەرەكشە بالالاردى جاقىن جەردەن قولجەتىمدى ءارى ءتيىمدى وڭالتۋمەن قامتاماسىز ەتۋ», دەدى «سامۇرىق-قازىنا» اق كورپوراتيۆتىك باسقارۋ, الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ.
