فوتو: ile-tany.kz
الەۋمەتتىك قولداۋ پاكەتى مەن قارجىلىق ىنتالاندىرۋ بيىلعى جىلى 9 دارىگەردى اۋىلدىق مەديتسينالىق ۇيىمدارعا تارتۋعا مۇمكىندىك بەردى, تاعى 16 دارىگەر وبلىس ورتالىعىندا جۇمىس ىستەۋگە قالدى. قازان ايىنا دەيىن جۇمىسقا قابىلدانعان تاعى 45 دارىگەرگە وسى جىل سوڭىنا دەيىن كوتەرمە اقى تولەۋ جوسپارلانىپ وتىر.
وبلىستىق دەنساۋلىق ساقتاۋ باسقارماسىنىڭ حابارلاۋىنشا, بىلتىر وڭىردە مەديتسينا سالاسىنداعى كادر تاپشىلىعى 8%-عا تومەندەدى, ال بيىلعى جىل باستالعالى كادرلىق قۇرام 76 ديپلومدى مامانعا تولىققان.
كەلگەن دارىگەرلەر 3 ايلىق سىناق مەرزىمىنەن ءساتتى ءوتىپ, وڭىردە بارلىعى 5 جىل جۇمىس ىستەۋى ءتيىس.
«بىلىكتى مەديتسينالىق كادرلاردى تارتۋ ءۇشىن بىرجولعى كوتەرمە تولەمدەردى تولەۋ تۋرالى شەشىم قابىلداندى, بۇل ماقساتتارعا بيۋدجەتتەن 595 ملن تەڭگە ءبولىندى», دەدى وبلىستىق دەنساۋلىق ساقتاۋ باسقارماسىنىڭ باسشىسى ارمان جانسەڭگىروۆ.
جىل سايىن وبلىسقا 80-گە جۋىق جاس مامان كەلەدى ەكەن. سولاردىڭ ءبىرى - 17 جىلدىق ەڭبەك ءوتىلى بار حيرۋرگ نۇرمۇحامەد بايجانوۆ 6 اي بۇرىن قابانباي اۋىلىنداعى الاكول اۋدانىنىڭ ورتالىق اۋرۋحاناسىنىڭ بولىمشەسىنە جۇمىسقا كەلگەن. قولداۋ رەتىندە 10 ملن تەڭگە كوتەرمە تولەم العان. جەرگىلىكتى اكىمدىك ونىڭ وتباسى ءۇشىن تۇرۋعا جاعداي جاساي الدى.
«ارينە, جۇمىس ىستەۋ وڭاي ەمەس, كىشىگىرىم جاراقاتتاردان باسقا كۇنىنە 2-3 كۇردەلى وتا جاساۋعا تۋرا كەلەدى. بىراق ءبىز دارىگەرلەر بۇل جولدى ءوزىمىز تاڭدادىق. ءبىزدىڭ باستى مىندەتىمىز – ادامدارعا كومەكتەسۋ. ەسەپ بىرنەشە مينۋتقا سوزىلعان كەزدە بالالاردىڭ اۋىر جاراقاتتارىمەن بايلانىستى كۇردەلى جاعدايلار بولدى. باقىتىمىزعا وراي, مەندە 4 سەرتيفيكات بار, جالپى ەرەسەكتەر, جالپى بالالار حيرۋرگى, بالالار تراۆماتولوگى, بالالار ورتوپەدى, بالالار ۋرولوگى, سوندىقتان ءبىز ءارتۇرلى بەيىندەگى وتالاردى جاسايمىز», دەيدى ن.بايجانوۆ.
الاكول اوا ديرەكتورىنىڭ ورىنباسارى ەلميرا سەرىكوۆانىڭ ايتۋىنشا, قابانباي اۋىلىنداعى اۋداندىق اوا بولىمشەسىنە 5 جاڭا مامان, ونىڭ ىشىندە 2 حيرۋرگ, 2 رەانيماتولوگ, 1 اكۋشەر-گينەكولوگ قابىلدانعان. بارلىق ماماندار كوتەرمە تولەمدەرىن العان.
بيىل مەملەكەت باسشىسى زاڭ قابىلداعانىن, وعان سايكەس اۋىلدىق جەرلەرگە جۇمىسقا كەلەتىن اسا تاپشى ماماندىقتار بويىنشا مەديتسينا قىزمەتكەرلەرى 8,5 ملن.تەڭگە الاتىنىن ەستەرىڭىزگە سالايىق.
