وتىرىستى اشقان ءماجىلىس توراعاسى ءبىر جارىم جىلدىڭ ىشىندە قوعامدىق پالاتادا ءار ساراپشى كەز كەلگەن ماسەلە بويىنشا ءوز پىكىرىن ەركىن جەتكىزەتىن سەنىمدى ءارى ىسكەر ورتا قالىپتاسقانىن اتاپ ءوتتى.
– جالپى, قوعامدىق پالاتا جۇمىسى قارقىن الىپ, مەملەكەت باسشىسىنىڭ «ىقپالدى پارلامەنت» قاعيداسىن جۇزەگە اسىرۋعا ءوز ۇلەسىن قوسىپ كەلەدى. ەڭ باستىسى, پالاتا قوعامعا اشىق. قوعامدىق پالاتانى قۇرىپ, سىزدەردى بىرلەسىپ جۇمىس ىستەۋگە شاقىرعاندا وسىنى ماقسات ەتتىك. ءبىز بۇل ءتاسىلدى ودان ءارى دامىتىپ, جەتىلدىرۋىمىز كەرەك, – دەدى ە.قوشانوۆ.
بانكتەر تۋرالى جاڭا زاڭ, سالىق جانە تسيفرلىق كودەكستەر بويىنشا جۇمىسقا ەرەكشە نازار اۋدارىلادى. بۇل رەتتە ەلىمىزدىڭ تۇكپىر-تۇكپىرىندەگى حالىقتىڭ ۇسىنىس-پىكىرلەرىن جيناقتاپ, تالقىلاۋ قوعامدىق پالاتا مۇشەلەرىنىڭ ماڭىزدى مىندەتى ەكەنى ايتىلدى.
سونداي-اق ءماجىلىس توراعاسى قابىلدانعان زاڭداردىڭ ءىس جۇزىندە ورىندالۋى جونىندە قوعامدىق پالاتا مۇشەلەرىنىڭ پىكىرىن سۇرادى. ونىڭ ىشىندە لۋدومانيا مەن تۇرمىستىق زورلىق-زومبىلىققا قارسى كۇرەسكە باعىتتالعان تۇزەتۋلەردى جۇزەگە اسىرۋ دا قامتىلدى.
سپيكەر بيىل زاڭ جوبالارى بويىنشا ۇسىنىستار ءمودۋلى ىسكە قوسىلعانىن ەسكە سالىپ, ءماسليحات دەپۋتاتتارىن زاڭ جوبالاۋ جۇمىسىنا تارتۋ ارقىلى بۇل تەتىكتىڭ مۇمكىندىكتەرىن كەڭەيتۋدى ۇسىندى.
جيىندا قوعامدىق پالاتانىڭ كۇن تارتىبىندەگى وزەكتى ماسەلەلەر – ءسۋيتسيدتىڭ كوبەيۋى, جەدەل مەديتسينالىق كومەك جۇيەسىندەگى پروبلەمالار جانە باسقا دا تاقىرىپتارعا ەرەكشە ءمان بەرىلدى. سونىمەن قاتار ە.قوشانوۆ سايلاۋشىلاردىڭ تالاپ-تىلەگى بويىنشا ۇكىمەت پەن ءماجىلىس دەپۋتاتتارىنىڭ بىرلەسكەن جۇمىسىنا نازار اۋدارىپ, قوعامدىق پالاتا مۇشەلەرىن وسىعان اتسالىسۋعا شاقىردى.
– سەسسيا بارىسىندا ۇكىمەت مۇشەلەرى بىزگە وسىنداي ماسەلەلەردىڭ شەشىلۋ بارىسى تۋرالى ەكى رەت ەسەپ بەرەدى. سوندىقتان سىزدەر دە ءوز ۇسىنىستارىڭىزدى جيناقتاپ, قوعامدىق پالاتا توراعاسىنا بەرۋىڭىزگە بولادى. ول ءوز كەزەگىندە قوعامدىق پالاتا مۇشەلەرىنىڭ اتىنان ۇكىمەتكە سۇراقتارىن قويا الادى, – دەدى ول.
ءوز كەزەگىندە قوعامدىق پالاتا ساراپشىلارى وسى سەسسيانىڭ كۇن تارتىبىنە قاتىستى ءوز ۇسىنىستارىن ورتاعا سالدى. ءماجىلىستىڭ الەۋمەتتىك-مادەني دامۋ كوميتەتىنىڭ توراعاسى اسحات ايماعامبەتوۆ الەۋمەتتىك باعىتتاعى وزەكتى ماسەلەلەرگە توقتالدى. ەۋرازيالىق تۇتىنۋشىلار وداعىنىڭ باسقارما ءتورايىمى سۆەتلانا رومانوۆسكايا تۇتىنۋشىلاردىڭ قۇقىقتارىن قورعاۋ ستاندارتتارىن كەڭىنەن تالقىلاۋ قاجەتتىلىگىنە نازار اۋداردى. «م.قوزىباەۆ اتىنداعى سولتۇستىك قازاقستان ۋنيۆەرسيتەتى» كاق ديرەكتورلار كەڭەسىنىڭ توراعاسى, قوعامدىق پالاتا توراعاسىنىڭ ورىنباسارى عالىم بايتۇق قوعامدىق پالاتانىڭ بەدەلى ارتقانىن اتاپ ءوتىپ, پالاتانىڭ وڭىرلەردەگى كوشپەلى وتىرىستارىندا تالقىلاۋ ءۇشىن تاقىرىپتار ۇسىندى.
وتىرىس بارىسىندا پالاتا مۇشەلەرى وزگە دە وتكىر ماسەلەلەردى كوتەردى. بۇل – قازاقستانعا شەتەلدىك ينۆەستيتسيا تارتۋ, بيزنەستى دامىتۋعا جاعداي جاساۋ, مىندەتتى الەۋمەتتىك مەديتسينالىق ساقتاندىرۋ جۇيەسىن جەتىلدىرۋ, جالپى دەنساۋلىق ساقتاۋ سالاسىن دامىتۋ, جاڭا سالىق زاڭناماسى, جاساندى ينتەللەكتىنى قۇقىقتىق تۇرعىدان رەتتەۋ جانە تاعى باسقا.
جيىندا ەرلان قوشانوۆ قوعام قايراتكەرى, «Astana Open Dialogue» سەرىكتەستىگىنىڭ نەگىزىن قالاۋشى الەكساندر دانيلوۆتى جانە «ستراتەگيا» الەۋمەتتىك جانە ساياسي زەرتتەۋلەر ورتالىعى» قوعامدىق قورىنىڭ پرەزيدەنتى گۇلميرا يلەۋوۆانى قوعامدىق پالاتاعا جاڭا مۇشە بولۋىمەن قۇتتىقتادى.
