ورمانعا ءورت تيگەندە نە تابيعاتتى توپان سۋ باسقاندا عانا ەرلىگى كوزگە ەرەك كورىنەتىن ورمان شارۋاشىلىعى قىزمەتكەرلەرىنىڭ بىلايعى ءومىرى دە قاۋىپ-قاتەرگە تولى. ونى جىلى جەردە وتىرعان ادام وڭايلىقپەن تۇسىنبەيدى. مەملەكەت باسشىسى حالىققا جولداۋىندا: «ەرىنبەي ەڭبەك ەتكەن جان ءوز ءىسىنىڭ مايتالمانى اتانادى. ال كاسىبىن تولىق مەڭگەرگەن ادام, قاشاندا سۇرانىسقا يە بولادى. ءبىز ەڭبەك ادامىنىڭ مارتەبەسىن كوتەرۋگە باسا ءمان بەرەمىز», دەپ اشىپ ايتتى.
وسى رەتتە تالاي جىلدان بەرى تابيعاتپەن بىرگە تىنىستاپ, ورمانداردى مولىقتىرۋ مەن قورعاۋعا ەلەۋلى ۇلەس قوسقان ءاربىر ازاماتتىڭ ءىسى ەلەۋسىز قالماۋى قاجەت. ايتالىق, الپىس جىلدىق عۇمىرىنىڭ 40 جىلىن ورمان سالاسىنا ارناعان ۇسەن سابىربەكوۆتى ناعىز «ەڭبەك ادامى» دەسە بولاتىنداي.
ول ەڭبەك جولىن الماتى وبلىسىنا قاراستى شەلەك ورمان شارۋاشىلىعىندا قاتارداعى جۇمىسشى بولىپ باستايدى. كەيىننەن ورمان شەبەرى, مەحانيك, ورمانشى دارەجەسىنە كوتەرىلەدى. كوپ ۇزاماي قىزىلجيدە ورمان شارۋاشىلىعىنا ديرەكتوردىڭ ورىنباسارى بولىپ اۋىسادى. وسى كەزەڭدە ورمان وسىرۋدەگى جەتىستىكتەرىمەن ەرەكشەلەنىپ, وبلىستىق باسقارما تاراپى قىزمەتىنە رازى بولادى. 2018-2021 جىلدارى سارقان اۋدانىنداعى بورلىتوبە ورمان شارۋاشىلىعىندا ديرەكتور بولىپ قىزمەت ەتەدى. بۇل جەردە دە مەملەكەتتىك ورمان قورىن 44 مىڭ گەكتارعا ۇلعايتىپ, ورمان تۇقىمباعىن ۇيىمداستىرادى.
«كەزىندە زاڭنامادا مەكتەپ ورمان شارۋاشىلىعى دەگەن ۇعىم ەنگىزىلەدى. وندا ورمان شارۋاشىلىقتارىن قارجىلاندىرۋ, كومەك كورسەتۋ تەتىكتەرى قاراستىرىلعان. بالالارعا ارنايى فورمالار مەن اسپاپتار, ارنايى جابدىقتار بەرۋ جاعدايى ەرەكشە ايتىلادى. بۇل كۇندە وسى دۇنيە كەمشىن قالىپ جاتىر. ورمان ورتەنسە, ونى قايتا قالپىنا كەلتىرۋگە 20 جىل ۋاقىت كەرەك. تابيعاتتى قايتا تۇلەتۋدە الدىمىزدان ەكى جول شىعادى. ءبىرى – تەحنيكالىق جول, ياعني دايىن اعاشتاردى وتىرعىزىپ, ونى ءوسىرۋ. ەكىنشىسى – تابيعي جول, ياعني ەگىن ەكپەي, اعاشتىڭ ءوز بەتىنشە وسۋىنە مۇمكىندىك جاساۋ», دەيدى ۇسەن اعا.
بۇگىندە ءۇ.سابىربەكوۆ قاپال ورمان شارۋاشىلىعى ديرەكتورى قىزمەتىن اتقارىپ ءجۇر. قاي مەكەندە ەڭبەك ەتسە دە, سول جەردى گۇلدەندىرۋگە بارىن سالاتىن مايتالمان ماماننىڭ باستاماسىمەن ورمان القابى ۇلعايىپ كەلەدى. ماسەلەن, مەملەكەت باسشىسىنىڭ جولداۋىنا ساي, وسىدان 4 جىل بۇرىن قاپال اۋىلىنىڭ باتىس جاعىنان 1 گەكتار اۋماقتا ۇلكەن ساياباق اشىلۋىنا تۇرتكى بولدى. ول جەرگە 12 ءتۇرلى كوشەت ەگىلگەن. بۇرىندارى كۇل-قوقىس شاشىلىپ, بوس جاتقان اۋماق بۇگىندە كوگالدانىپ, اۋىل كوركىن كەلتىرىپ تۇر. سونداي-اق اقسۋ اۋدانىنىڭ اراسان, سۋىقساي, قاپال, جانسۇگىروۆ, ماتاي, تاعى باسقا سەلولىق وكرۋگتەرىندە كوگالداندىرۋ جۇمىستارىنا بەلسەندى تۇردە اتسالىسىپ كەلەدى.
ۇسەن مەدەۋبەك ۇلىنىڭ ناتيجەلى بولعان تاعى ءبىر ءىسى – ەڭبەك ەتىپ جۇرگەن مەكەمەسىنىڭ «جوڭعار ورمان شارۋاشىلىعى» دەگەن اتاۋىن وزگەرتۋ جونىندەگى باستاماسى. شىندىعىندا, «جوڭعار» ءسوزى مۇنداعى ورمان شارۋاشىلىعىنا مۇلدە قاتىسى جوق تىركەس ەدى. ول اتالعان مەكەمەنىڭ تاريحي اتىن قايتارۋعا كۇش سالىپ, ونىڭ قادىر-قاسيەتىن ارداقتاۋدى مۇرات ەتتى. باستاماسى ونوماستيكالىق كوميسسيا تاراپىنان قولداۋ تاۋىپ, جەتىسۋ وبلىسى اكىمىنىڭ 2023 جىلعى 13 ماۋسىمداعى №175 قاۋلىسىنا سايكەس, «قاپال ورمان شارۋاشىلىعى» كوممۋنالدىق مەملەكەتتىك مەكەمەسى دەپ اتالدى.
«تۋعان جەرىنە قىزمەت ەتۋ – ءار ادامنىڭ بورىشى. ورمان شارۋاشىلىعىنداعى ءورتتىڭ 70-80 پايىزى براكونەرلەردىڭ قولدان ءورت قويۋ سالدارىنان بولادى. براكونەرلەر ورمانداردى ورتەپ, اعاش ساتقاندارىنىڭ سالدارىنان ەلىمىزدەگى قانشاما تابيعي ورمان قورىنان ايىرىلىپ جاتىرمىز. بۇل – تولعاقتى ماسەلە. سوندىقتان ءاربىر جەرگىلىكتى ازامات تابيعاتقا تۋعان اناسىنداي قاراۋى قاجەت», دەيدى كەيىپكەرىمىز.
جارتى عاسىرعا جۋىق عۇمىرىن ورمان شارۋاشىلىعىن وركەندەتۋگە ارناعان ۇسەن مەدەۋبەك ۇلى – كاسىبىنە ادال ازامات. اۋداننىڭ تىنىس تىرشىلىگىنە, قوعامدىق ءىس-شارالارعا بەلسەنە قاتىسىپ, از قامتىلعان, جاعدايى تومەن وتباسىلارعا ماتەريالدىق كومەك كورسەتەدى. تابيعاتتى الەمدەگى بارلىق ءتىرى اعزانىڭ ءتۇپ نەگىزى دەپ سانايتىن بىلىكتى مامان كەيىنگى بۋىن وكىلدەرىنە باي تاجىريبەسىن تالماي ۇيرەتىپ, ىزگىلىككە باۋلىپ كەلەدى.
جەتىسۋ وبلىسى
