پەنسيلۆانيا ۋنيۆەرسيتەتىنىڭ زەرتتەۋشىلەرى سۋسىنداردىڭ ءدامىن ءبىر-بىرىنەن اجىراتا الاتىن «ەلەكتروندى ءتىل» جاساپ شىقتى. جاساندى ينتەللەكتىمەن جاسالعان قۇرىلعى سۇيىقتىقتىڭ ءتۇرىن عانا ەمەس, ساپاسىندا, قۇرامىندا قوسپالاردىڭ بار-جوعىن دا بىلە الادى. روبوتتىڭ داتچيكتەرى ءارتۇرلى حيميكاتتاردى انىقتاۋعا قابىلەتتى. نەيروجەلى ەنگىزىلگەن دەرەكتەر نەگىزىندە سۋسىننىڭ ءتۇرىن اجىراتىپ, ساپاسىنا تالداۋ جاسايدى. «ەلەكتروندى ءتىل» سىناق كەزىندە ءسۇت, سۋ, ءتۇرلى گازدالعان سۋسىندار, كوفە, جەمىس شىرىندارى تۇرلەرىنىڭ 80 پايىزدان استامىن ءدال تاپقان. ال جاساندى ينتەللەكتىگە باعالاۋ پارامەترلەرىن ءوز بەتىنشە انىقتاۋعا مۇمكىندىك بەرگەندە, دالدىك 95 پايىزعا دەيىن ارتقان.
5G-دەن جىلدام
لوندون ۋنيۆەرسيتەتى كوللەدجىنىڭ ينجەنەرلەرى سىمسىز دەرەكتەردى بەرۋ جىلدامدىعىن 938 گبيت/س-قا جەتكىزىپ, رەكورد ورناتتى.
بۇل ۇلىبريتانياداعى 5G جۇكتەۋ جىلدامدىعىنان 10 مىڭ ەسە جىلدام. مىسالى, 5G ارقىلى 4K Ultra HD فورماتىنداعى ەكى ساعاتتىق ءفيلمدى جۇكتەۋگە شامامەن 19 مينۋت كەتسە, جاڭا تەحنولوگيامەن ونى 0,12 سەكۋندتا جۇكتەۋگە بولادى. عالىمدار بۇل حالىق تىعىز ورنالاسقان ايماقتار مەن بۇقارالىق ءىس-شارالاردا تۇراقتى ءارى جىلدام بايلانىس ورناتۋعا كومەكتەسەتىنىن ايتادى. زەرتتەۋشىلەر جاڭا جۇيە الداعى زەرتحانالىق سىناقتاردان ءساتتى وتسە, 3-5 جىل ىشىندە قولدانىسقا دايىن بولادى دەپ وتىر.
عاشىقتار اراسىنا تۇسكەن ChatGPT
ChatGPT قازىر كەز كەلگەن سالادا كادەگە جاراپ ءجۇر. بىراق ونى رەنجىسىپ قالعان ادامىڭدى جەڭۋگە پايدالانۋ ءتىپتى قىزىق ەكەن.
28 جاستاعى ارۋ سۇيگەن جىگىتىمەن ارازداسىپ قالعاندا, ونى جەڭۋ ءۇشىن ۇنەمى جاساندى ينتەللەكتىنىڭ كومەگىنە جۇگىنەدى ەكەن. ءتىپتى تۋرا رەنجىسىپ قالعان ساتتە قولىنا سمارتفونىن الا قويىپ, ChatGPT-دەن اقىل سۇرايتىن كورىنەدى. بۇل تۋرالى جەلىدە قىزدىڭ جىگىتى جازدى. كەيىنگى ۋاقىتتا ولاردىڭ ارالارىندا بىرنەشە رەت جانجال بولعان. رەنجىسىپ قالعان سايىن قىز جاساندى ينتەللەكتىنىڭ كومەگىمەن ءاربىر ءسوزىن ەگجەي-تەگجەيلى ويلاستىرىپ الادى ەكەن. ء«وزىمدى ءبارىن ۇساق-تۇيەگىنە دەيىن ەستە ساقتايتىن روبوتپەن ايتىسىپ جاتقانداي سەزىنەمىن», دەپ جازدى جىگىت پاراقشاسىندا.
