فوتو: port-express.ru
17 قازان كۇنى تۋريزم جانە سپورت ءمينيسترى ەربول مىرزابوسىنوۆ الەۋمەتتىك جەلىدەگى پاراقشاسىندا ستانيسلاۆ چەرچەسوۆتىڭ قالجىڭى ورىنسىز بولعانىن اتاپ ءوتىپ, دەسە دە كەشىرىممەن قاراۋدى سۇرادى. ونىڭ كاسىبي قىزمەتىنە قاراپ باعا بەرۋ كەرەك ەكەنىن ەسكەرتتى.
«قۇرمەتتى دوستار!
ارينە, ستانيسلاۆ چەرچەسوۆتىڭ «فرانتسۋز تىلىنە» قاتىستى قالجىڭى ورىنسىز بولدى. مۇنى قازاقستان فۋتبول فەدەراتسياسى دا, باپكەردىڭ ءوزى دە بەك تۇسىنەدى.
دەگەنمەن, چەرچەسوۆتىڭ باستى مىندەتى – ۇلتتىق قۇرامانى جاڭا دەڭگەيگە شىعارۋ. ەندەشە, وعان ەڭ الدىمەن كاسىبي قىزمەتىنە قاراپ باعا بەرۋگە شاقىرامىن.
ءبىز قاشاننان قوناقجاي, دارحان مىنەزدى, كەشىرىمدى ەلمىز. ءبىزدى مىقتى ەل ەتەتىن دە وسى قاسيەتتەر. سوندىقتان ماسەلەنى ودان ءارى ورشىتە بەرمەي, حالقىمىزعا ءتان كەڭپەيىلدىك تانىتقانىمىز ابزال.
كەز كەلگەن داۋلى ماسەلەنى اقىل-پاراساتپەن شەشەتىن تولەرانتتى, وركەنيەتتى, ياعني دانا قوعام ەكەنىمىزدى كورسەتە بىلەيىك.
ستانيسلاۆ چەرچەسوۆ – حالىقارالىق دەڭگەيدەگى تانىمال فۋتبوليست ءارى 20 جىلدىق تاجىريبەسى بار كاسىبي جاتتىقتىرۋشى. سوندىقتان ول تۇبىندە قازاقستاندىق جانكۇيەرلەردىڭ سەنىمىن اقتاپ, ۇلتتىق قۇرامانى قازىرگى كۇردەلى كەزەڭنەن ابىرويمەن الىپ شىعادى دەپ سەنەمىن.
ءبارىمىز مۇددەسى ورتاق فۋتبول جاناشىرلارى رەتىندە ءبىر-ءبىرىمىزدى قولداپ جۇرەيىك», دەلىنگەن ءمينيستردىڭ جازباسىندا.
بۇعان دەيىن ۆەدوموستۆو فەدەراتسيالار مينيسترلىككە باعىنىستى بولىپ تابىلمايتىنىن ايتىپ, دەگەنمەن ۇلتتىق قۇندىلىقتارعا قۇرمەتپەن قاراۋ ىسىنە بەي-جاي قاراماۋ كەرەك ەكەنىن جەتكىزگەن.
ال فۋتبول فەدەراتسياسى ستانيسلاۆ چەرچەسوۆتىڭ قازاق ءتىلىن بەلسەندى ۇيرەنىپ جۇرگەنىن جانە سول وقيعادا «ازىلدەمەك» بولعانىن مالىمدەگەن.
