بايقاۋدىڭ دەڭگەيى 10 جىل بۇرىنعىعا قاراعاندا ايتارلىقتاي وسكەن. ىلگەرىدە قاتىسۋشىلار كەنەن ازىرباەۆتىڭ «كوكشولاق», «شىرقا, داۋسىم!», «قايران جاستىق» سەكىلدى ساناۋلى ءانىن عانا ورىندايتىن. سول كەزدە ۇيىمداستىرۋشىلار «بوز دالا بوزتورعايى» اتانعان كومپوزيتوردىڭ وزگە شىعارمالارى قالتارىستا قالعانىن ايتىپ جاتاتىن.
كەيىنگى ۋاقىتتا وسى ءبىر ولقىلىقتىڭ ورنى تولا باستادى دەپ ايتۋعا تولىق نەگىز بار. ماسەلەن, وسى جولى بايقاۋ قاتىسۋشىلارى كەنەن اندەرىنە تەرەڭ بويلاي باستاعانىن بايقادىق. «بال قۇيىلدى دالادان», «قازاقستان ايماعى», «الاتاۋ الابىندا», «بۇلبۇلعا», «بوزتورعاي», «گيگيگاي» سەكىلدى كەنەن ازىرباەۆتىڭ وزگە دە كوپتەگەن تاماشا ءانىن بايقاۋعا قاتىسقان ونەرپازدار شىرقاۋ شەگىنە جەتكىزە شىرقاپ, تىڭدارمانداردىڭ العىسىن ارقالادى.
ايگىلى حالىق اقىنى, ءانشى, كومپوزيتور كەنەن ازىرباەۆتىڭ 140 جىلدىعىنا ارنالعان بايقاۋعا قاتىسقان ءداستۇرلى انشىلەردىڭ قاي-قايسىسى بولسىن, بوز دالا بوزتورعايىنىڭ تاماشا تۋىندىلارىن شىرقاۋ شەگىنە جەتكىزە ورىنداعانىن ايتا كەتكەن ءجون. ۇلكەن دايىندىقپەن كەلگەندەرى بىردەن اڭعارىلدى. ءبىر سوزبەن ايتقاندا, مەملەكەتتىك سىيلىقتىڭ لاۋرەاتى التىنبەك قورازباەۆ باستاعان قازىلار القاسىنا جەڭىمپازدى انىقتاۋ وڭايعا سوققان جوق.
كىل جۇيرىك توپقا تۇسكەن ونەر الامانىندا ەشكىم جۇلدەسىز قالمادى. ۇزدىك ۇشتىكتىڭ قاتارىنا ەنبەگەن قاتىسۋشىلار ارنايى العىسحات, ديپلومدارمەن جانە 50 مىڭ تەڭگە كولەمىندە سىياقىمەن ماراپاتتالدى. ال «كەنەن اتا» قورى تاعايىنداعان ارنايى سىيلىق قوستاناي وبلىسىنان كەلگەن جاسۇلان وتەمۇراتوۆقا بۇيىردى.
بايقاۋ قورىتىندىسىندا قازىلار القاسىنىڭ شەشىمىمەن قوستانايلىق ايبيكە تاڭاتاروۆا, جامبىلدىق بەكارىس كوشتاەۆ ءۇشىنشى ورىنعا لايىق دەپ تانىلىپ, 200 مىڭ تەڭگە سىياقىعا يە بولسا, الماتى قالاسىنىڭ ۇكىلى ءۇمىتى نۇردانا سالىمحانعا جۇلدەلى ەكىنشى ورىن جانە 400 مىڭ تەڭگە سىياقى بەرىلدى. جامبىل وبلىسىنىڭ اتىنان قاتىسقان مەرەي ابۋەۆا ءبىرىنشى ورىن يەگەرى اتانىپ, 700 مىڭ تەڭگە قارجىلاي سىياقىمەن ماراپاتتالدى. قازىلار القاسى باس جۇلدە مەن 1 ميلليون تەڭگە جۇلدەگە تۇركىستان قالاسىنان كەلگەن ارۋجان ساعىندىقتى لايىق دەپ تاپتى.
تاراز
