جايىق وڭىرىندە گاز تاپشى

وبلىستىق ەنەرگەتيكا جانە تۇرعىن ءۇي-كوم­مۋ­نالدىق شارۋاشىلىعى باس­قارماسىنىڭ باسشىسى ميراس مۇلكاي وڭىرلىك كوممۋنيكاتسيالار قىزمەتى الاڭىندا وتكەن بريفينگتە وڭىردە قالىپتاسقان جاعدايعا تۇسىنىك بەردى. باتىس قا­زاق­ستان وبلىسىنىڭ ىشكى نارىعىنا سۇيىتىلعان مۇناي گازىن جەتكىزۋمەن 19 نىسان اينالىسادى. وبلىس اۋماعىندا جالپى سانى 109 گاز قۇيۋ ستانساسى بار. ءوڭىردىڭ ورتاشا ايلىق سۇيىتىلعان گازدى تۇتىنۋ مولشەرى – 4000-4500 توننا.

باتىس قازاقستان وبلىسىنا ءتورتىنشى توقساندا 11 566 توننا سۇيى­تىلعان مۇناي گازىن جەتكىزۋ جوسپارلانعان ەكەن. سونىڭ ىشىندە قازان ايىندا – 3510 توننا, قاراشادا – 4030 توننا, جەلتوقسان ايىندا 4026 توننا جەتكىزۋ كوزدەلگەن. الاي­دا 14 قاراشا كۇنگى جاعدايعا قاراعاندا «جايىق­مۇناي» جشس قازان ايىنداعى جوسپارىن نەبارى 41% ورىنداپ, 1442 توننا عانا گاز بەرگەن.

– 1-25 قازان ارالىعىندا اتىراۋ مۇناي وڭدەۋ زاۋى­تى ۋاقىتشا جوندەۋگە جابىلدى. وسىعان بايلانىستى ەنەر­­­گە­تيكا مينيسترلىگى اتىراۋ وبلىسىنا قاجەتتى گاز كولە­مىنىڭ ءبىر بولىگىن, ياعني 2490 توننا ءونىمدى «جايىق­مۇناي» كومپانياسىنان الۋعا شەشىم شىعارعان. ال بۇل كوم­پانيا تاۋلىگىنە 220 توننا عانا سۇيىق گاز جونەل­تە الادى. قازىر وسى گازدىڭ 120 تونناسى – باتىس قازاقستان وبلى­­سىنا, 100 تونناسى – اتىراۋ وبلىسىنا جەتكىزىلىپ جاتىر, – دەپ ءتۇسىندىردى ميراس مۇلكاي.

مىنە, وڭىردەگى گاز تاپشى­لىعى, كەيبىر گاز قۇيۋ ستانسالارىندا تالون پايدا بول­­عانى سوندىقتان ەكەن. بۇعان قوسا, سوڭعى كەزدە وڭىردە سۇيىتىلعان گاز وتىنىمەن جۇرەتىن كولىك كوبەيىپ كەتكەن. پوليتسيا دەپارتامەنتىنىڭ مالى­مە­تىن­شە, وتكەن جىلى گاز جابدىعى ورناتىلعان كولىك سانى 15 650 بولسا, ءبىر جىل ىشىندە ول 30 پايىزعا ارتىپ, 22 432-گە جەتكەن.

«وسى وقيعالاردىڭ سەبەبى­نەن سۇيىتىلعان گاز قۇيۋ ستان­سا­لا­رىندا كەزەك كوبەيىپ, كەي جەردە تالون پايدا بولدى. بىراق بۇل ۋاقىتشا جاعداي. قازىر ەنەرگەتيكا مينيستر­لىگى قوسىمشا سۇيىتىلعان مۇناي گازىنىڭ قاجەتتى كولە­مىن باسقا كوزدەردەن ءبولۋ ماسە­لەسىن قاراستىرىپ جاتىر», دەدى باس­قارما باسشىسى.

باتىس قازاقستان وبلىسى