فەدەراتسيا باسشىسى ادىلەت بارمەنقۇلوۆ شەكتەن شىققان چەرچەسوۆكە ايىپپۇل سالىنعانىن ايتتى.
«قاتەلىكتەر بار, ءبىز بۇل تۋرالى كەشە عانا جۋرناليستەرمەن سويلەستىك. چەرچەسوۆتىڭ ءازىلى, ارينە, شەكتەن شىقتى. مەن ونىمەن جەكە سويلەستىم, مەملەكەتتىك ءتىلدىڭ وزەكتىلىگى مەن ماڭىزىن ءتۇسىندىردىم. ءبىز ول تۋرالى چەرچەسوۆتىڭ وزىمەن سويلەستىك. وعان ايىپپۇل سالىندى», دەدى فەدەراتسيا باسشىسى ادىلەت بارمەنقۇلوۆ.
فەدەراتسيا مالىمەتىنشە, ايىپپۇل سومماسى - 200 اەك نەمەسە 738 400 تەڭگە.
بۇعان دەيىن قازاقستان فۋتبول كومانداسىنىڭ باس باپكەرى ستانيسلاۆ چەرچەسوۆ قازاق تىلىندە سۇراق قويعان جۋرناليسكە «سەن فرانتسۋز تىلىندە سويلەپ وتىرسىڭ با؟» دەگەن. وسى ءسوزى قوعامدا قىزۋ تالقىعا ءتۇسىپ, ونى سىناعاندار كوبەيدى.
قازاقستان فۋتبول فەدەراتسياسى بۇل وقيعانى بىلاي تۇسىندىرەدى.
«الەۋمەتتىك جەلىلەردە جاريالانعان فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆتىڭ قازاق تىلىنە قۇرمەت كورسەتپەۋىنە قاتىستى ۆيدەوعا بايلانىستى قازاقستان فۋتبول فەدەراتسياسى جاعدايدى ءتۇسىندىرىپ ءوتۋ قاجەت دەپ سانايدى. جازبادا ۆيدەونىڭ ءۇزىندىسى كورسەتىلگەن. نەگىزى بۇل سۇراقتى فرانتسيانىڭ پسج كلۋبىنىڭ فورماسىن كيىپ جۇرگەن وتاندىق جۋرناليست بەگاسىل سەيىتقانوۆ ءباسپاسوز ءماسليحاتىندا قويعاننان كەيىن باس باپكەر ازىلدەپ جاۋاپ قايتارعان ەدى. ستانيسلاۆ چەرچەسوۆ قازاق ءتىلى مەن ەلىمىزدىڭ مادەنيەتىنە ۇلكەن قۇرمەتپەن قارايدى, سونىمەن قاتار قازاق ءتىلىن بەلسەندى تۇردە وقىپ جاتقانىن مالىمدەيمىز», دەلىنگەن مالىمدەمەدە.
