فوتو: syrboyi.kz
زاڭ جوباسى مەملەكەت باسشىسىنىڭ بانك سەكتورىنداعى رۇقسات بەرۋ تالاپتارىن وڭتايلاندىرۋ جونىندەگى تاپسىرماسىن ىسكە اسىرۋ ماقساتىندا ازىرلەنگەن. سونداي-اق قارجى نارىعىن ودان ءارى دامىتۋ مەن باسەكەلەستىكتى ارتتىرۋعا, تۇتىنۋشىلاردىڭ قۇقىقتارىن قورعاۋدى كۇشەيتۋ ءۇشىن شەتەلدىك بانكتەردىڭ فيليالدارىن تارتۋعا باعىتتالعان.
قارجى نارىعىن دامىتۋ تۋرالى بۇل زاڭ جوباسى بانك سەكتورىنا ينۆەستيتسيا تارتۋداعى اكىمشىلىك كەدەرگىلەردى ازايتۋعا باعىتتالعان. وسىعان بايلانىستى ەنشىلەس شەتەلدىك بانكتەر مەن ولاردىڭ فيليالدارىن اشۋ تالاپتارى جەڭىلدەيدى. بەيرەزيدەنت بانكتىڭ ۋاكىلەتتى ورگانعا ۇسىناتىن قۇجاتتار ءتىزىمى قىسقارتىلادى.
«شەتەلدىك بانكتىڭ جيىنتىق اكتيۆتەرىنىڭ ەڭ تومەنگى كولەمىن 20-دان 10 ميلليارد اقش دوللارىنا دەيىن قىسقارتۋ جوسپارلانعان. سونىمەن قاتار شەتەلدىك بانكتەردىڭ فيليالدارىنا جەكە تۇلعالاردىڭ دەپوزيتتەرىن تارتۋ, تولەم كارتوچكالارىن شىعارۋ, شەتەل ۆاليۋتاسىمەن ايىرباستاۋ وپەراتسيالارى, سينديكاتتالعان قارجىلاندىرۋ جانە باسقا دا قىزمەتتەردى كورسەتۋگە رۇقسات ەتىلەدى», دەلىنگەن ءماجىلىس حابارلاماسىندا.
