ەندوسكوپيا – سكالپەلدىڭ كومەگىنسىز قۋىس مۇشەلەردى قاراۋعا مۇمكىندىك بەرەتىن اسپاپتىق دياگنوستيكا. جاڭا ورتالىق پاتسيەنتتەرگە دياگنوستيكا مەن ەمدەۋدىڭ ەڭ وزىق ادىستەرىن قولدانۋعا مۇمكىندىك بەرەتىن زاماناۋي قوندىرعىلارمەن جابدىقتالعان. ورتالىقتاعى اسپاپتار ارقىلى ەندوسكوپيالىق, رەنتگەنولوگيالىق زەرتتەۋدى بىرىكتىرىپ, اسقازان-ىشەك جولدارىنىڭ جوعارعى بولىگىنە, ءوت جولدارىنا, ۇيقى بەزى مەن اس قورىتۋ جولدارىنىڭ اۋرۋلارىنا ساپالى دياگنوستيكا جاساۋعا, ءتيىمدى ەمدەۋدى قامتاماسىز ەتۋگە بولادى دەيدى ماماندار.
ورالداعى ورتالىقتىڭ اشىلۋىنا ا.ن.سىزعانوۆ اتىنداعى ۇلتتىق حيرۋرگيا عىلىمي ورتالىعىنان ستراتەگيالىق دامۋ ءبولىمىنىڭ باسشىسى, مەديتسينا عىلىمدارىنىڭ كانديداتى, جوعارى ساناتتى حيرۋرگ دارىگەر وڭلاسىن يبەكەنوۆ پەن كلينيكالىق فيزيولوگيا جانە ەندوسكوپيا ءبولىمىنىڭ مەڭگەرۋشىسى ابان ابدىراشەۆ ارنايى شاقىرىلعان ەكەن.
– بۇگىندە كوپتەگەن وپەراتسيا ەندوسكوپيالىق ارالاسۋلاردىڭ كومەگىمەن جاسالادى. اسىرەسە اسقازان-ىشەك جولدارىنان قان كەتۋ كەزىندە ەندوسكوپيالىق گەموستاز جاساۋ ارقىلى قان كەتۋدى 90 پايىزعا دەيىن توقتاتۋعا بولادى. بۇرىن اشىق وپەراتسيالار جاسالاتىن, ءولىم-ءجىتىم دە وتە جوعارى بولاتىن. قازىر تەك ەندوسكوپيالىق گەموستاز ارقىلى قاندى توقتاتىپ, سىرقاتتىڭ اسقازان-ىشەك جولدارىنان قان كەتۋ كەزىندە بولاتىن شەتىن وقيعالار سانىن ازايتتىق, – دەيدى وڭلاسىن تولەگەن ۇلى.
جاڭا ورتالىقتا اسقازان-ىشەك جولدارىنىڭ پاتولوگيالارىنا, وكپە-قولقا اۋرۋلارىنا دياگنوستيكالىق زەرتتەۋ جاسالادى. ەندوسكوپيالىق ادىسپەن ەمدەۋ جۇرگىزىلەدى. ال ءينۆازيۆتى وپەراتسيالار اۋرۋحانادا جاتۋ ۋاقىتىن قىسقارتىپ, وڭالتۋ كەزەڭىن ازايتۋعا مۇمكىندىك بەرەدى. وبلىس تۇرعىندارى مۇندا دياگنوستيكالىق تەكسەرۋدەن (فگدس, كولونوسكوپيا) ءوتۋ نەمەسە ەم قابىلداۋعا (پوليپەكتوميا) ءوز مەكەنجايىندا تىركەلگەن ەمحانانىڭ جولداماسى ارقىلى كەلە الادى. ورتالىقتىڭ اشىلۋىنا وراي وتكەن سالتاناتتى ءىس-شارادان سوڭ ۇلتتىق عىلىمي حيرۋرگيا ورتالىعى ماماندارى «ەندوسكوپيالىق پاپيللوسفينكتەروتوميا» (EPST), «وڭەشتىڭ ۆاريكوزدى تامىرلارىن ەندوسكوپيالىق بايلاۋ» (VRVP) جونىندە شەبەرلىك ساعاتىن وتكىزدى.
باتىس قازاقستان وبلىسى
