بۇل, ارينە, وتە ماڭىزدى ماسەلە. سوندىقتان مەملەكەت بۇعان ارنايى قاراجات ءبولدى, شتابتار جاساقتادى. وسى سەبەپتى جاسى 18-گە تولعان ءار ازامات ءوز كوزقاراسىن بىلدىرۋگە ءتيىس ەدى دەپ سانايمىز. «اەس سالۋعا بولمايدى, بۇعان قارسىمىز» دەگەندەردى دە ەستىگەنبىز. بىراق قولداۋشىلاردىڭ ولاردان كوپ بولعانىن داۋىس بەرۋ ناتيجەسى ايقىن كورسەتتى. ارينە, ەكى جاقتىڭ دا ءوز ۇستانىمى بولدى, قاي-قايسىسى دا ەل ەرتەڭىن ويلاعانى كۇمانسىز.
اەس سالۋ – بۇرىن-سوڭدى ەل تاريحىندا بولماعان ۇلكەن ماسەلە. بىزدە شاعىن اتوم ەلەكتر ستانسالارى بار. مىسالى, ماڭعىستاۋ وڭىرىندە ءىرى-ءىرى وزەندەر جوق قوي. سوندىقتان كاسپيدىڭ سۋىن تۇششىتىپ الادى. تۇرعىندار اتوم رەاكتورىنىڭ كومەگىمەن جاساندى سۋ تۇتىنىپ وتىر. وعان 50 جىلدان اسىپ كەتتى. وسىنى اشىق ايتۋىمىز كەرەك. اەس سالۋ – بۇگىندە بۇكىلعالامدىق ۇدەرىس. قازىر اەس دامىعان ەلدەردە جەتكىلىكتى سالىنعان, سالىپ جاتقان ەلدەر دە بار, ەندى سالماق بولىپ جاتقان ەلدەر دە از ەمەس.
قازىر قىرعىزستانداعى توقتاعۇل سۋقويماسىنان, شىعىس قازاقستانداعى بۇقتىرمادان ەلەكتر قۋاتى وندىرىلەدى. ەكىباستۇزدا ءوندىرىلىپ جاتقان ەنەرگيا بۇكىل باتىس-ءسىبىردى قامتاماسىز ەتىپ وتىر دەپ ايتۋعا بولادى. قازىرگى زاماندا ادامنىڭ كۇنى قۋات كوزىنە تىكەلەي تاۋەلدى. سوندىقتان مۇنى وتە وزەكتى ماسەلە دەۋىمىز كەرەك. ويتكەنى تەحنيكا, تەحنولوگيا دامىعان سايىن ەنەرگيا تاپشىلىعى دا ارتىپ كەلەدى. ءبىرىنشى كەزەكتە وسىنى تۇسىنگەنىمىز ءجون.
بۇگىندە قوعامدا «اەس-ءتى رەسەي سالماسىن» دەگەن نارازىلىق بار. رەسەي – سانكتسيا قۇرساۋىنداعى ەل, سوندىقتان ونىڭ شاماسى كەلمەيدى. ال اەس-كە قىزمەت كورسەتۋ ماسەلەسىنە كەلسەك, وزىمىزدە يادرولىق فيزيكا دەگەن ماماندىق بار. وعان ءبىلىم گرانتتارى جاقسى بولىنەدى, بىراق بالا از تۇسەدى. بولاشاقتا وسىنداي ماڭىزدى ءبىلىم سالالارىنا كوڭىل ءبولۋ كەرەك.
راۋان بايدالى,
ا.بايتۇرسىن ۇلى اتىنداعى
قوۋ كافەدرا مەڭگەرۋشىسى
قوستاناي
ادىلبەكتىڭ اسەم اندەرىنە ارنالدى
سوزاق – كۇي قونىپ, ءان دارىعان قاسيەتتى ءوڭىر. كەزىندە بۇل ايماقتان ونەرىمەن ەلگە تانىلعان نەبىر ساڭلاق شىققان. سولاردىڭ ءبىرى – ءانشى, تانىمال كومپوزيتور, تەرىسكەيدىڭ تالانتتى پەرزەنتى ادىلبەك نىسانباەۆ. ومىردەن وزعان ونەر يەسىنىڭ ارتىندا ولمەستەي بولىپ اۋەزدى اندەرى قالدى.
اۋدان ورتالىعى – شولاققورعان اۋىلىندا تاياۋدا بۇكىلوداقتىق حالىق شىعارماشىلىعى فەستيۆالىنىڭ ەكى دۇركىن لاۋرەاتى ادىلبەك نىسانباەۆتىڭ 70 جىلدىق مەرەيتويىنا وراي «ادىلبەكتىڭ اندەرى-اي» اتتى وبلىستىق ءان بايقاۋى وتكىزىلدى.
ونەر سايىسى باستالماس بۇرىن س.قوجانوۆ اتىنداعى تاريحي-ولكەتانۋ مۋزەيىندە ادىلبەك نىسانباەۆقا ارنالعان ەكسپوزيتسيالىق بۇرىش اشىلىپ, كەزىندە ءوزى ۇستازدىق ەتكەن ءبىلىم ۇياسى – ت.الىمقۇلوۆ اتىنداعى №14 مەكتەپ- ينتەرنات ليتسەيىندەگى مۋزىكا ءدارىسحاناسىنا ەسىمى بەرىلدى. سالتاناتتى ءىس-شارادا اۋدان اكىمى مۇحيت سەكسەنباەۆ ءسوز سويلەپ, مەرەيتوي اياسىندا ءوتىپ جاتقان ەسكە الۋ بايقاۋىنىڭ ماڭىزىنا توقتالدى.
وسىلايشا, مازمۇندى ءان كەشىندە قازاق ۇلت اسپاپتارى وركەسترى, ادىلبەك نىسانباەۆتىڭ شاكىرتتەرى – مادەنيەت قايراتكەرى جۇبانىش جەكسەن ۇلى, ساۋلە اپپازوۆا, گۇلنار تولەگەنوۆا, وبلىستىق فيلارمونيا ءانشىسى ءورازالى جاڭاباي باستاعان تانىمال دا تالانتتى انشىلەر ونەر كورسەتتى. ولار ادىلبەك نىسانباەۆتىڭ كەڭ تاراعان اسەم دە اۋەزدى اندەرىن جاندى داۋىستا شىرقادى.
«ەل ءىشى – ونەر كەنىشى» دەپ تەككە ايتىلماعان. وسى تۇرعىدان العاندا, «سوزاقتىڭ ءشامشىسى» اتانعان ادىلبەك نىسانباەۆقا ارنالعان بۇل ءان بايقاۋى شىن مانىندە ونەردەگى جولىن دارىپتەۋگە ارنالعان كەش بولدى.
ونەردىڭ ومىرشەڭدىگى دەگەن وسىندايدا ايقىن كورىنسە كەرەك.
كارىباي امزە ۇلى,
ەڭبەك ارداگەرى
تۇركىستان وبلىسى
ەل فۋتبولىنىڭ ەڭسەسى ءتۇسىپ تۇر
فۋتبول – الەمدەگى ەڭ تانىمال سپورت ءتۇرى. ونىمەن اينالىسپايتىن نەمەسە جانكۇيەرلىك تانىتپايتىن ادام كەمدە-كەم. جاھاندا ماڭدايى جارقىراعان اياقدوپ شەبەرلەرى, سولاردىڭ ارقاسىندا تاسى ورگە دومالاعان كوماندالار دا از ەمەس. وكىنىشكە قاراي, قازاق فۋتبولى تۋرالى ويلاساق, كوڭىلىمىز پاسەيىپ سالا بەرەدى. جىلدار جىلجىپ ءوتىپ جاتىر, ەل چەمپيوناتىنا قاتىساتىن كوماندالار مەن ۇلتتىق قۇرامامىز قالپاعىمىزدى اسپانعا اتاتىن دەڭگەيدە ونەر كورسەتە الار ەمەس.
بۇل سوزىمىزگە ەۋروكۋبوككە قاتىسقان كوماندالارىمىزدىڭ ايتۋعا ۇيات ويىندارى مەن ۇلتتىق قۇرامامىزدىڭ ءوزىنىڭ سوڭعى كەزدەسۋىندە سلوۆەنيا قۇراماسىنان 0:3 بولىپ ۇتىلعانى ايقىن دالەل بولا الادى. مىنە, وسىنىڭ سالدارىنان ەلىمىزدەگى فۋتبول سۇيەر قاۋىمنىڭ كوپشىلىگى شەتەلدىك فۋتبولشىلار مەن كوماندالارعا نە قۇرامالارعا جانكۇيەر بولادى. دۇنيەجۇزىلىك فۋتبول قاۋىمداستىعىنىڭ (FIFA) رەيتينگىندە ۇلتتىق قۇرامانىڭ 121-ورىنعا ورنالاسۋىنىڭ ءوزى-اق ەل فۋتبولىنىڭ دەڭگەيىن انىق كورسەتەدى.
ەلىمىزدە فۋتبولدى دامىتۋ ماقساتىندا مەملەكەت قازىناسىنان ايتارلىقتاي قارجى ءبولىپ, دوپتى ءتۇزۋ تەبۋگە ءبىراز بالانى شەتەلگە شەبەرلىگىن شىڭداۋعا دا جىبەردىك. برازيلياعا بارىپ, فۋتبول اكادەمياسىندا اياقدوپتىڭ قىر-سىرىن مەڭگەرگەن بالالار قازىر قايدا؟ ولاردىڭ ىشىنەن تىم بولماسا بىرەۋى ءبىر كوماندادا بەلگىلى ءبىر دەڭگەيدە ونەر كورسەتىپ ءجۇر دەگەندى ەستىمەپپىز.
كەيدە ءبىزدىڭ فۋتبولشىلار ەلىنىڭ ماقتانىشى ەمەس, مازاعى بولىپ جۇرگەندەي اسەر قالدىرادى. نەگە دەيسىز بە؟ «جايدارمان» سايىسىنا قاتىسۋشى كوماندالاردىڭ ەكى ءازىلىنىڭ ءبىرى فۋتبولشىلار تۋرالى. اششى اجۋامەن سىناپ, ولاردىڭ ساناسىن سىلكىپ الايىن دەيتىن دە شىعار, بىراق ونى ۇعاتىن فۋتبولشىلاردى كورمەدىك. ماقتاپ ەمەس, سىناپ جاتسا, نامىستان جارىلىپ كەتپەي مە؟
ەل چەمپيوناتىندا «تاراز» كلۋبى تۋرنير كەستەسىندە كوش سوڭىندا قالىپ قويىپ, 2022 جىلى ءبىرىنشى ليگاعا سىرعىدى. 14 جىلدان بەرى «تاراز» بىردە-ءبىر جۇلدە يەلەنگەن جوق. باس باپكەرلىك قىزمەتتى نۇركەن مازباەۆ ارقالاعاندا زور ءۇمىت كۇتىپ ەدىك, سەنىم اقتالمادى. كەلەر ماۋسىمدا جەرگىلىكتى كوماندامىز پرەمەر-ليگا دوداسىنا قوسىلسا ەكەن دەپ تىلەيمىز.
ساعىن بولاتبەكوۆ,
ماكەن ساياقوۆ
جامبىل وبلىسى
