فوتو: olympic.kz
جەلتوقسان ايىندا استانادا قازاقستان بىررىنشىلىگى وتەدى. ەل ىشىلىك چەمپيوناتتان كەيىن بوكستان ەرلەر قۇراماسى تولىعۋى مۇمكىن.
«ادەتتە ءبىزدىڭ قۇراما قازاقستان چەمپيوناتىنان كەيىن جاساقتالادى. جەلتوقساندا استانادا ىشكى تۋرنير وتەدى. كوماندا جاساقتاۋدى سول كەزدە قاراستىرامىز. ەل بىرىنشىلىگىنە بارلىق بوكسشى قاتىسا الادى. جاستار كومانداسىنىڭ وكىلدەرىنە دە قاتىسۋعا رۇقسات بەردىك. جاستار ساپىنان 7-8 ادام نەگىزگى قۇرامعا كىرە الادى دەپ ويلايمىن. سونىمەن بىرگە ەل چەمپيوناتىنان ازيا چەمپيوناتىنىڭ جەڭىمپازدارى مەن جۇلدەگەرلەرىن بوساتامىز. ازيا بىرىنشىلىگى 30 قاراشادا يوردانيادا وتەدى. قالعان بوكسشىلاردىڭ بارلىعى قازاقستان چەمپيوناتىنا قاتىسادى», دەدى قايرات ءساتجانوۆ.
سونداي-اق باس باپكەر شىمكەنتتە وتكەن حالىقارالىق تۋرنيردە بوكسشىلار نەگە ءوز سالماعىندا جۇدىرىقتاسپاعانىن ءتۇسىندىردى.
«ايتپاقشى, ءبىز شىمكەنتتە كەي قاتىسۋشىلارعا قازىرگى سالماقتا شارشى الاڭعا شىقپاۋعا رۇقسات بەردىك. مۇحامەدسابىردى الايىق, ول وليمپيادا الدىندا وتە كوپ جارىس وتكىزدى. يتاليا مەن تايلاندتا جارىسقا ءتۇستى. سونىمەن بىرگە ەل ىشىندەگى سايىسقا دا قاتىستى, وندا الەمدىك جارىستىڭ قاتىسۋشىسى انىقتالدى. ارتىنشا وليمپيادا كەزىندە رينگكە شىقتى. ءار جەكپە-جەك – اعزا ءۇشىن ۇلكەن سالماق. اعزا وتە كوپ دارۋمەندەر مەن پايدالى زاتتاردان ايرىلادى. سوندىقتان سالماق قۋدىڭ ادام اعزاسىنا كەرى اسەرى زور. سول سەبەپتى, ءبىز كەي بوكسشىلارعا ادەتتەگى سالماعىنان جوعارى سالماقتا شارشى الاڭعا شىعۋىنا رۇقسات بەردىك. الداعى جارىستار الدىندا دەڭگەيدىڭ ءتۇسىپ كەتكەنىن قالامادىق», دەدى باس باپكەر.
