كىتاپتا سيدنەيدە وتكەن وليمپيادا چەمپيونى بەكزات ساتتارحانوۆتىڭ ءومىرى مەن الەمگە تانىمال سپورتشى بولعانعا دەيىنگى كاسىبي جولى جازىلعان. وقيعالار بوكسشىنىڭ اتا-اناسى مەن زامانداستارىنىڭ ەستەلىگىنەن الىنعان.
كىتاپ اۆتورى ازامات ابىلقايىردىڭ ايتۋىنشا, كىتاپ جازۋ پروتسەسى ءبىر ايعا سوزىلعان. وعان دەيىن زەرتتەۋ جۇمىستارى باسىمىراق بولعان. بوكسشىنىڭ اناسى سىرلىكۇل ساتتارحانوۆا كىتاپتىڭ قولجازباسىن بىرنەشە رەت وقىپ, ءوز پىكىرىن ايتىپ وتىرعان.
«بۇل كىتاپتا بوكسشىنىڭ قىزىقتى دا قيىن ءومىر جولى, ومىرىندەگى قىزىقتى ساتتەرى, سانالى عۇمىرىن قازاق بوكس ءستيلىن قالىپتاستىرۋعا ارناعانى, ەل ءۇشىن سىڭىرگەن ەرەن ەڭبەگى دارىپتەلەدى», دەدى كىتاپ اۆتورى.
كىتاپتىڭ تۇساۋكەسەرىنە ارنالعان ءىس-شاراعا بوكسشىنىڭ اناسى, قر پارلامەنتى سەناتىنىڭ دەپۋتاتى, باس رەداكتورلار كلۋبىنىڭ باسشىسى بيبىگۇل جەكسەنباي, قر پارلامەنتى سەناتىنىڭ دەپۋتاتى دارحان قىدىرالى, قر پارلامەنتى ءماجىلىسىنىڭ دەپۋتاتى نارتاي ارالباي ۇلى, «حابار» اگەنتتىگى» اق باسقارما توراعاسى كەمەلبەك ويشىباەۆ, «قازاقستان» رترك باسقارما توراعاسىنىڭ ورىنباسارى ازامات كەڭەس ۇلى, «ABAI» تەلەارناسىنىڭ ديرەكتورى ەركىن مۇحامەدجانوۆ, قوعام جانە مادەنيەت قايراتكەرلەرى, مەديا ساراپشىلار مەن سپورت جۋرناليستەرى, ەلىمىزدىڭ بەلگىلى اقىن-جازۋشىلارى قاتىستى.
كەزدەسۋ بارىسىندا ءسوز العان سىرلىكۇل ساتتارحانوۆا كىتاپتىڭ وسكەلەڭ ۇرپاققا ۇلگى-ونەگە ەكەنىن ايتتى.
قر پارلامەنتى سەناتىنىڭ دەپۋتاتى دارحان قىدىرالى بالالار مەن جاسوسپىرىمدەر اۋديتورياسىنا ارنايى جازىلعان «بەكزات ساتتارحانوۆ كىم؟» كىتابى قازاق بالالار ادەبيەتىندە ءوزىنىڭ ورنىن تابارىنا سەنىم ءبىلدىردى.
جينالعان قاۋىم قالامگەردى جاڭا كىتابىنىڭ جارىققا شىعۋىمەن قۇتتىقتاپ, جىلى لەبىزدەرىن جولدادى.
