فوتو: m.yk-news.kz
ەندى جۇرگىزۋشى كۋالىگىنە ۇمىتكەرلەر ەكى فاكتورلى اۋتەنتيفيكاتسيادان (تەكسەرۋدەن) وتەدى.
ەكى فاكتورلى تەكسەرۋ – قولدانۋشىنىڭ ەكى ءتۇرلى ادىسپەن ءوزىن-ءوزى راستاۋى. راستاۋ ءادىسى ءبىرىنشى سمس حابارلامانىڭ كومەگىمەن, ەكىنشىسى – بيومەتريالىق سايكەستەندىرۋ ارقىلى جۇزەگە اسىرىلادى.
تەستىلەۋ باستالار الدىندا قىزمەتتى الۋشىعا 1414 نومىرىنەن جەكە دەرەكتەرگە قول جەتكىزۋگە سۇراۋ سالاتىن حابارلاما جىبەرەدى. حابارلاما SMS قولدانۋشىنىڭ ەلەكتروندىق ۇكىمەت پورتالىنىڭ جەكە كابينەتىنە تىركەلگەن تەلەفون نومىرىنە جولدانادى.
اۆتوريزاتسيا ءساتتى وتكەننەن كەيىن قىزمەت الۋشى بيومەتريالىق سايكەستەندىرۋدەن ءوتۋى كەرەك.
«الاياقتار كۇن سايىن الداۋدىڭ جاڭا تاسىلدەرىن ويلاپ تاۋىپ جاتىر. وسى ورايدا ءبىزدىڭ قىزمەتكەرلەرىمىز دە زاڭبۇزۋشىلىقتاردى انىقتاۋ ءۇشىن ۇلكەن جۇمىستار اتقارۋدا. سونىمەن قاتار, مەملەكەتتىك كورپوراتسيا قىزمەت كورسەتۋدىڭ ساپاسىن جاقسارتۋ بويىنشا تۇراقتى جۇمىس جۇرگىزىپ كەلەدى. ەندىگى كەزەكتە, ەكى فاكتورلى اۋتەنتيفيكاتسيانى ەنگىزۋ ەمتيحانداعى بۇزۋشىلىقتاردىڭ سانىن ازايتۋعا كومەكتەسەدى. قىزمەت الۋشىنىڭ دەرەكتەرى دە سەنىمدى قورعالادى», دەدى مەملەكەتتىك كورپوراتسيانىڭ باسقارما توراعاسى ارمان كەنجەعاليەۆ.
ايتا كەتەيىك, جاڭا باستاما 11 قازاننان باستاپ ازىرگە استانا قالاسىندا عانا ەنگىزىلەدى. ال ەلىمىزدىڭ باسقا وڭىرىندەگى مامانداندىرىلعان حقكو-دا ەكى فاكتورلى اۋتەنتيفيكاتسيانى جىل سوڭىنا دەيىن ەنگىزۋ جوسپارلانعان.
