كوكشەتاۋ قالاسىندا جىلۋ ەلەكتر ستانساسى سالىنادى

كوكشەتاۋ. 28 قاڭتار. اقمولا وبلىسىنىڭ اكىمى سەرگەي كۋلاگين مەن شەتەلدىك «Peterburg Holding Company», «All Energy Holding LTD» كومپانيالارىنىڭ جانە قازاقستاندىق «ون ولجا» جاۋاپكەرشىلىگى شەكتەۋلى سەرىكتەستىگىنىڭ باسشىلارى اراسىنداعى كوكشەتاۋ قالاسىندا جىلۋ ەلەكتر ورتالىعى قۇرىلىسىن باستاۋ جونىندەگى ءوزارا كەلىسىمنىڭ ەكىنشى راۋندى وتكىزىلدى. بۇل تۋرالى egemen.kz ءتىلشىسى حابارلادى. كەزدەسۋ بارىسىندا وبلىس اكىمى سەرگەي كۋلاگين الەۋەتتى ارىپتەستەرمەن جىلى شىرايلى اڭگىمە باستاپ, جىلۋ ەلەكتر ورتالىعى قۇرىلىسىنا قاتىستى جوبالاۋ-سمەتالىق قۇجاتتاردىڭ دايىندالۋ بارىسىمەن تانىستى. ول, سونداي-اق, ماڭىزدى ىستەگى كەز-كەلگەن ىركىلىس پەن دۇدامالدىلىك, ناقتى قادامداردىڭ ايقىندالماۋى كۇتكەندەگىدەي ناتيجە بەرمەيتىنىنە ەكپىن ءتۇسىردى. ءبىز ىقىلاس تانىتىپ, ارتىقشىلىق بەرىپ وتىرعان يزرايلدىك كومپانيانىڭ قازاقستاندىق كاسىپورىندارمەن, ونىڭ ىشىندە قۋات كوزدەرىنە باي «ون ولجا» سەرىكتەستىگىمەن تۇراقتى بايلانىس ورناتقاندىعى بولاشاق تابىستارىمىزعا كەپىلدىك بەرەدى. بۇعان قوسا, ءوڭىرىمىزدىڭ ينۆەستيتسيالىق تارتىمدىلىعى وزگە سالالاردىڭ دامۋىنا سەرپىن بەرىپ وتىرعاندىعى تىلگە تيەك ەتىلدى. «ان Energy Holding» كومپانياسىنىڭ قارجى ديرەكتورى ۆالەري اميەل سەنىم بىلدىرگەنى ءۇشىن وبلىس اكىمى سەرگەي كۋلاگينگە راحمەت ايتىپ, جوبانىڭ قازىرگى كەزەڭىندە باستاپقى جۇمىستاردى قارجىلاندىرۋ ماسەلەسىنىڭ شەشىلگەندىگىن اتاپ كورسەتتى. قازاقستان جاعىنان كاسىبي مامانداردىڭ جۇمىلدىرىلۋى جەو قۇرىلىسىنىڭ تەحنيكالىق جانە ستراتەگيالىق ماسەلەلەرىن شەشۋگە مۇمكىندىك بەرەتىنىن ايتقان يزرايلدىك كومپانيا وكىلى كەلەسى كەزدەسۋدە وبلىس باسشىلىعىنا ينۆەستيتسيالىق جوبانىڭ دايىن نۇسقاسى تانىستىرىلاتىنىن مالىمدەدى. باقبەرگەن امالبەك. دەرەك: egemen.kz. سۋرەت: egemen.kz.