سۋدى زاڭسىز پايدالانعان شارۋا قوجالىقتارى انىقتالدى

ناتيجەسىندە, سۋ رەسۋرستارىن زاڭسىز جانە ءتيىمسىز پايدالانۋ, مەملەكەتتىك ساتىپ الۋعا بايلانىستى زاڭ بۇزۋشىلىقتار انىقتالعان.

الماتى وبلىسىنىڭ كۇرتى اۋدانىندا شارۋا قوجالىقتارىنىڭ سۋارمالى سۋدى جەرگىلىكتى «قازسۋشار» فيليالىمەن كەلىسىمشارتقا وتىرماي پايدالانعاندارى انىقتالعان. اتاپ ايتقاندا, 100 گا ەگىس القابىن سۋارۋ ءۇشىن سۋدى زاڭسىز العان.

سونداي-اق كەيبىر گيدروتەحنيكالىق قۇرىلىستاردىڭ توزۋىنا بايلانىستى كانالدا قوسىمشا سۋ شىعىنى بەلىگىلى بولعان. ياعني فيليال باسشىلىعىنىڭ نىسانداردىڭ تەحنيكالىق جاي-كۇيىنە جەتكىلىكسىز باقىلاۋ جۇرگىزۋىنە بايلانىستى سۋ رەسۋرستارىن ءتيىمسىز پايدالانۋ جانە ەسەبىن جۇرگىزۋ وقيعالارى تىركەلگەن.

بۇدان بولەك, مەملەكەتتىك ساتىپ الۋدا زاڭ بۇزۋ فاكتىلەرى دە انىقتالعان. فيليال زاڭدى جانە ىشكى نورماتيۆتىك قۇجاتتاردى بۇزا وتىرىپ, ءبىر كوزدەن مەملەكەتتىك ساتىپ الۋ تۋرالى 7 كەلىسىمشارت جاساسقان. وسىعان دەيىن, 2023 جىلعى شىلدەدە جالپى سوماسى 17,5 ملن تەڭگەگە سول جاعالاۋ ماگيسترالدى كانالىنىڭ جەر بولىگىن مەحانيكالىق تازالاۋ قىزمەتىن كورسەتۋگە وسىنداي تاسىلمەن شارت جاسالعان. دەمەك زاڭ بۇزۋشىلىق جۇيەلى تۇردە قايتالانعان.

سونىمەن قاتار فيليال ديرەكتورىنىڭ مىندەتىن اتقارۋشى جاقىن تۋىستارىمەن بىرگە جۇمىس ىستەۋگە جول بەرمەۋ تۋرالى سىبايلاس جەمقورلىققا قارسى زاڭنامادا بەلگىلەنگەن تالاپتى ساقتاماعان.

تەكسەرىس قورىتىندىسى بويىنشا انىقتالعان قۇقىق بۇزۋشىلىقتاردىڭ جالپى سوماسى شامامەن 20 ملن تەڭگەنى قۇراعان.

«انىقتالعان زاڭ بۇزۋشىلىقتار بويىنشا ماتەريالدار ءتيىستى ۋاكىلەتتى ورگاندارعا جىبەرىلدى. 3 قۇقىق بۇزۋشىلىق فاكتىسى بويىنشا فيليال ديرەكتورىنىڭ مىندەتىن اتقارۋشى تۇلعاعا اكىمشىلىك ايىپپۇل سالىندى. ايتا كەتۋ كەرەك, ديرەكتوردىڭ م.ا. وسىعان دەيىن دە بىرنەشە مارتە ەسكەرتۋ تۇرىندە تارتىپتىك جاۋاپكەرشىلىككە تارتىلعان», دەلىنگەن حابارلامادا.

وبلىستىق فيليالعا كەمشىلىكتەردى جويۋ بويىنشا ۇسىنىستار بەرىلگەن.

سونىمەن قاتار «قازسۋشاردىڭ» باسقا دا وبلىستارداعى فيليالدارى تەكسەرىستەن وتەدى. ايتا كەتەيىك, سۋدىڭ «كولەڭكەلى» نارىعىمەن ءتيىمدى كۇرەسۋ ءۇشىن مينيسترلىك جانىنان سۋ رەسۋرستارىن رەتتەۋ, قورعاۋ جانە پايدالانۋ جونىندە جاڭا كوميتەت قۇرىلعان.

ەسكە سالا كەتەيىك, وسىعان دەيىن جوعارى اۋديتورلىق پالاتا مەن سۋ رەسۋرستارى جانە يرريگاتسيا مينيسترلىگى بىرلەسىپ جۇرگىزگەن تەكسەرىستەردىڭ قورىتىندىسى بويىنشا «قازسۋشار» كاسىپورىنىنىڭ باسشى لاۋازىمىنداعى 5 قىزمەتكەرى تارتىپتىك جاۋاپكەرشىلىككە تارتىلعان ەدى. ال سۋ رەسۋرستارى جانە يرريگاتسيا مينيسترلىگىنىڭ ىشكى اۋديت دەپارتامەنتى جامبىل وبلىسىندا سۋدى زاڭسىز پايدالانۋدىڭ 10 فاكتىسىن انىقتاعان. بۇگىنگى تاڭدا فيليال باسشىسى قىزمەتىنەن بوساتىلعان.