«وسىلايشا قىزىلوردا وبلىسى اكىمدىگىمەن بىرلەسە, وڭىردەگى قور كاسىپورىندارىنىڭ بەلسەندى اتسالىسۋىمەن وسكەلەڭ ۇرپاقتىڭ دامىپ, شىعارماشىلىقپەن شۇعىلدانۋىنا بارلىق جاعداي جاسالىپ جاتىر. وڭىردە ءبىلىمدى دە سپورتپەن اينالىساتىن جاستار سانى كوبەيىپ, ەلىمىزدىڭ جاڭا چەمپيوندارى مەن دارىندى تۇلعالارى ءوسىپ شىعادى دەپ سەنەمىز», دەپ اتاپ ءوتتى اشىلۋ راسىمدەرىندە «سامۇرىق-قازىنا» اق كورپوراتيۆتىك باسقارۋ, الەۋمەتتىك-ەڭبەك ماسەلەلەرى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ.
سىرداريا وزەنىنىڭ سول جاعالاۋىندا بوي كوتەرگەن اۋماعى 3652 شارشى مەتر, 2 قاباتتان تۇراتىن جاڭا زاماناۋي ورتالىقتا 16 ۇستەل تەننيسى بولادى, عيمارات كۇنىنە 150 جەرگىلىكتى تۇرعىن مەن سپورتشىنى قابىلداي الماق. بۇعان دەيىن, وڭىردە اشىق اسپان استىندا ۇستەل تەننيسىمەن كاسىبي اينالىسۋ قولايسىزدىق تۋدىرعان.
«بۇگىن ەل يگىلىگىنە بەرىلگەن ۇستەل تەننيسى ورتالىعى سىر سپورتىنا جاڭا سەرپىن اكەلىپ, جەڭىمپازدار سىيلايدى دەپ سەنەمىز. سۇيىكتى قىزىلوردامىزدىڭ كەلبەتىنە كورىك قوساتىن اسەم عيماراتتاردىڭ قاتارىن تولىقتىرعان ورتالىقتىڭ قولدانىسقا بەرىلۋى بارشاڭىزعا قۇتتى بولسىن. ەلىمىزدىڭ كوك بايراعى ءدۇبىرلى دودالاردا بيىكتە جەلبىرەپ, سپورتشىلارىمىز جەڭىس تۇعىرىنان كورىنسىن!», دەدى قىزىلوردا وبلىسىنىڭ اكىمى نۇرلىبەك نالىباەۆ.
3 مىڭ شارشى مەتردى الىپ جاتقان, قور توبىنداعى «قازگەرمۇناي» كومپانياسى قارجىلاندىرعان وقۋشىلار سارايىنداعى سىنىپتار ونەركاسىپتىك ديزايندى, روبوتتەحنيكانى, باسقا دا ءتۇرلى تەحنيكالىق جاڭالىقتاردى, جاڭارتىلاتىن قۋات كوزدەرىن زەردەلەۋگە ارنالعان. جىلىجاي مەن قىسقى باق, بي, مۋزىكا اسپاپتارى بولمەلەرى بار.
قور ەلىمىز بويىنشا «جايلى مەكتەپ» جوباسى اياسىندا 208 مەكتەپتىڭ قۇرىلىسىن جوسپارلاپ وتىر. بۇگىندە ونىڭ 18-ءى اشىلدى. جىل سوڭىنا دەيىن تاعى 58 ءبىلىم ورداسى پايدالانۋعا بەرىلەدى. قىزىلوردادا جوسپارلانعان 10 جايلى مەكتەپتىڭ ءبىرى – جوعارىدا اتالعان مەكتەپ.
«سامۇرىق-قازىنا» اق كومپانيالار توبىنىڭ «Samruk-Kazyna Trust» كق ارقىلى جۇزەگە اسىپ جاتقان قايىرىمدىلىق قىزمەتىندە سوڭعى 5 جىلدا قىزىلوردا وبلىسىندا 1,5 ملرد تەڭگەدەن استام سوماعا دەنساۋلىق ساقتاۋ, حالىقتىڭ الەۋمەتتىك وسال توپتارىن قولداۋ, الەۋمەتتىك كاسىپكەرلىكتى دامىتۋ, بۇقارالىق سپورت باعىتتارىندا 11 جوبا ىسكە قوسىلدى. ماسەلەن, قور قولداۋىنىڭ ناتيجەسىندە, قازىرگى كەزدە قىزىلوردا وڭىرىندە وڭالتۋ ورتالىعى, كوپسالالى سپورت كەشەنى, بەيىمدەلگەن سپورت توپتارى جۇمىس ىستەپ تۇر.
