جاڭا اككۋمۋلياتور مارس اتموسفەراسىنداعى ەلەمەنتتەردى پايدالانا وتىرىپ, ەنەرگيا وندىرە الادى. باتارەيا قورشاعان ورتادان كومىرقىشقىل گازىن, وتتەگى مەن كومىرتەك توتىعىن سىڭىرە الاتىندىقتان, جەردەن جەتكىزىلەتىن جابدىقتىڭ سالماعىن ازايتۋعا مۇمكىندىك بەرەدى. بۇل – مارس لوگيستيكاسىنداعى ماڭىزدى قادام. يننوۆاتسيالىق ءونىم كۇن پانەلدەرى مەن اتوم ەنەرگيا كوزدەرىنەن سونداي-اق مارستاعى رەسۋرستاردان دا قۋات الادى.
80 جاستاعى الەم ارۋى
80 جاستاعى چحۆە سۋن حۆا «الەم ارۋى» بايقاۋىنىڭ ءفيناليسى اتانىپ, جۇرتتى تاڭعالدىردى.
سۇلۋلىق بايقاۋلارىنا ادەتتە 30-عا تولماعان, سىمباتتى ۇمىتكەرلەر عانا تاڭدالىپ الىنادى. الايدا وڭتۇستىك كورەيا «الەم ارۋى» بايقاۋىنىڭ ەرەجەلەرىنە وزگەرىس ەنگىزىپ, كەيبىر شەكتەۋدى الىپ تاستاعان. سونىڭ ارقاسىندا 3 نەمەرەسى بار اجە بايقاۋدىڭ ىرىكتەۋىنەن ءوتىپ, فينالعا دەيىن جەتكەن.
جۇرەك تالماسىن انىقتاعىش
جاساندى ينتەللەكت كوپ سالادا سەنىمدى جاردەمشىگە اينالدى. بۇل جولى امەريكالىق زەرتتەۋشىلەر نەيروجەلىنىڭ كومەگىمەن ينفاركت بەلگىسىن ەرتە انىقتايتىن داتچيك جاساپ شىعاردى.
قۇرىلعى جۇرەك تالماسى اۋرۋىن جىلدام انىقتاۋعا ارنالعان. ونى اۋرۋحانادا, جەدەل جاردەم جۇمىسىندا پايدالانۋ ءتيىمدى بولماق. جۇيە ەكى كەزەڭدە جۇمىس ىستەيدى. العاشقى كەزەڭدە يممۋنوفەرمەنتتى تالداۋ تەستى قان ۇلگىسىندەگى cTnI اقۋىزىن انىقتايدى. ەكىنشى كەزەڭدە, سيگنالدى كۇشەيتۋ فازاسىندا, حيميالىق رەاكتسيا ىسكە قوسىلادى. سودان كەيىن ارنايى ءپورتاتيۆتى قۇرىلعى قانداعى ءتۇس وزگەرىسىن سۋرەتكە تۇسىرەدى. نەيروجەلى الىنعان كەسكىندەردى 15 مينۋت ىشىندە تالداپ بەرەدى. وسىلايشا, ينفاركت بەلگىسىن ەرتە كەزەڭدە-اق انىقتاۋعا بولادى.
