اقمولا وبلىسىندا تۇرعىنداردى قاۋىپسىز جەرگە كوشىرۋدە

استانا. 29 ءساۋىر. اقمولا وبلىسى تسەلينوگراد اۋدانى ورازاق اۋىلدىق وكرۋگىندە نۇرا وزەنىندەگى بوگەت بۇزىلىپ, جەرگىلىكتى حالىق قاۋىپسىز جەرگە كوشىرىلۋدە. وقيعا 28 ساۋىردە ساعات 18:30-دار شاماسىندا بولعان. بۇل تۋرالى «ينتەرفاكس-قازاقستان» اگەنتتىگىنە سىلتەمە جاساپ, tengrinews.kz حابارلادى. حابارلامادا ايتىلعانداي, بوگەتتىڭ بۇزىلۋ سالدارىنان ورازاق اۋىلىنىڭ ەسكى بولىگىن سۋ باسقان. ازىرگە قانشا ءۇي سۋ استىندا قالعانى ناقتى بەلگىسىز. ءتىلسىز جاۋ اۋىلدىڭ جاڭادان سالىنعان بولىگىنە جاقىنداپ كەلەدى. تسەلينوگراد اۋداندىق اكىمدىگىنىڭ حابارلاۋىنشا, جەرگىلىكتى تۇرعىنداردى شۇعىل قاۋىپسىز جەرگە كوشىرۋ جۇمىستارى باستالىپ كەتكەن. اۋداننان وسى ماقساتتا 8 اۆتوبۋس وقيعا ورنىنا جىبەرىلدى. العاش بولىپ 7 ادامدى: قاريالار مەن اياعى اۋىر ايەلدەردى ەۆاكۋاتسيالادى. ولار ەمحاناداعى 20 ادام ءۇشىن دايىندالعان ۋاقىتشا پاناعا ورنالاستىرىلدى. اۋدان اكىمى مالعاجدار تاتكەەۆدىڭ مالىمەتىنە سۇيەنسەك, ورازاق اۋىلىنىڭ تۇرعىندارى اراسىندا تاسقىننان زارداپ شەككەن جانە قازا تاپقاندار جوق. اۋداندىق اكىمدىكتىڭ مالىمەتى بويىنشا, اتالعان اۋىلدا 400-دەن استام ءۇي جانە 2 000-عا جۋىق تۇرعىن بار. وزەن سۋىنىڭ كوتەرىلۋىنە بايلانىستى تۇرعىنداردىڭ كوپ بولىگى بوگەت بۇزىلعانعا دەيىن قاۋىپسىز جەرگە كوشىرىلگەن. بۇگىندە قالعان تۇرعىنداردى ەۆاكۋاتسيالاۋ جۇمىستارى ءجۇرىپ جاتىر. تاتكەەۆتىڭ ايتۋىنشا, قازىرگى تاڭدا اۋىل تۇرعىندارىنىڭ 70 پايىزى قاۋىپسىز جەرگە كوشىرىلگەن. ەلامان قوڭىر. دەرەك, سۋرەت: tengrinews.kz.