اقىلى مەكتەپتىڭ ارتىقشىلىعى
جەكەمەنشىك مەكتەپتەردىڭ كوپشىلىگى ءبىلىم سالاسىندا زاماناۋي ادىستەمەلەردى ەنگىزىپ, ءار وقۋشىنىڭ جەكە قاجەتتىلىگىنە بەيىمدەلگەن باعدارلامالاردى ۇسىنادى. سوندىقتان اتا-انالار بالالارىن شەتەلدىك نەمەسە حالىقارالىق ستاندارتقا ساي وقۋ وشاقتارىندا وقىتقىسى كەلەدى.
جەكەمەنشىك مەكتەپتەردىڭ ءبىلىم جۇيەسىندە ساپا جوعارى بولا ما دەگەن سۇراق ءالى دە ماڭىزدى. بۇل سۇراقتى جان-جاقتى ساراپتاپ, ناقتى ناتيجەلەرگە سۇيەنە وتىرىپ قاراستىرۋ قاجەت. مىسالى, ەلىمىزدەگى «Haileybury», «ميراس» سياقتى مەكتەپتەر بريتاندىق نەمەسە حالىقارالىق باكالاۆريات (IB) باعدارلامالارىن ۇسىنا وتىرىپ, الەمنىڭ ۇزدىك ۋنيۆەرسيتەتتەرىنە تۇسۋگە مۇمكىندىك بەرەدى. مۇنداي مەكتەپتەردە كوبىنە شاعىن سىنىپ, ساپالى ينفراقۇرىلىم, جوعارى بىلىكتى پەداگوگ ماماندار ءبىلىم بەرەدى ءارى وقۋشىلارعا بەرىلەتىن مۇمكىندىك تە كوپ.
ەلىمىزدەگى كەيبىر جەكەمەنشىك مەكتەپتەردىڭ تۇلەكتەرى حالىقارالىق ەمتيحاندار مەن ۋنيۆەرسيتەتتەرگە قابىلدانۋ كورسەتكىشى بويىنشا جاقسى دەڭگەيگە شىعىپ وتىر. ماسەلەن, «Haileybury Almaty» مەكتەبىن بىتىرگەن وقۋشىلار جىل سايىن «Cambridge», «Harvard», «Oxford» سياقتى ۋنيۆەرسيتەتتەرگە وقۋعا قابىلدانادى. سونداي-اق «ميراس» مەكتەبىنەن دە حالىقارالىق باكالاۆريات ەمتيحاندارىنان جوعارى بالل جيناپ, شەتەلدىك جوعارى وقۋ ورىندارىنا تۇسكەن وقۋشىلار بارشىلىق.
«Haileybury» مەكتەپتەرىندەگى وقۋ باعدارلامالارى اعىلشىن تىلىندە جۇرگىزىلەدى, سونداي-اق حالىقارالىق GCSE (General Certificate of Secondary Education) مەن A-Level باعدارلاماسىنا سايكەس ءبىلىم بەرىلەدى. مۇنداي جۇيە وقۋشىلاردىڭ اناليتيكالىق ويلاۋ قابىلەتىن دامىتۋعا, زەرتتەۋ جۇمىسىنا كوڭىل بولۋگە باعىتتالعان. بۇل مەكتەپتەردەگى وقۋ اقىسى جىلىنا 10-15 ملن تەڭگە شاماسىندا. بۇعان وقۋ باعدارلاماسى, قوسىمشا كۋرستار, سپورتتىق, شىعارماشىلىق ءىس-شارالار كىرەدى.
ال الماتى مەن استانادا ورنالاسقان «ميراس» مەكتەبى – حالىقارالىق باكالاۆريات (IB) باعدارلاماسىن ۇسىناتىن ءبىلىم ۇيالارىنىڭ ءبىرى. بۇل باعدارلاما وقۋشىلاردى الەمدىك دەڭگەيدە مويىندالعان ديپلوممەن قامتاماسىز ەتەدى. ناتيجەسىندە, تۇلەكتەر كەز كەلگەن ۋنيۆەرسيتەتكە ءتۇسۋ مۇمكىندىگىنە يە بولادى. «ميراس» مەكتەپتەرىندە قازاق, ورىس, اعىلشىن تىلدەرىندە وقىتادى. ال وندا وقۋ قۇنى جىلىنا شامامەن 5-9 ملن تەڭگەنى قۇرايدى.
«Tamos Education» – الماتىداعى زاماناۋي جەكەمەنشىك مەكتەپتىڭ ءبىرى. بۇل مەكتەپ ماتەماتيكا, جاراتىلىستانۋ, IT باعىتتارىنا باسىمدىق بەرىپ, وقۋشىلاردى عىلىم مەن تەحنولوگيا سالاسىنا جان-جاقتى دايىندايدى. وقۋشىلارعا ساپالى ءبىلىم بەرۋ باعىتىندا شەتەلدىك وقىتۋ ادىستەمەلەرى قولدانىلادى, ال مەكتەپتىڭ ينفراقۇرىلىمى زاماناۋي زەرتحانالارمەن, تەحنولوگيالارمەن جابدىقتالعان. اتالعان مەكتەپتە وقۋ اقىسى جىلىنا 2,5-4,5 ملن تەڭگە ارالىعىندا.
«Quantum» مەكتەبى – وقۋشىلاردىڭ جان-جاقتى دامۋىنا, سىني ويلاۋ قابىلەتىن ارتتىرۋعا, الەمدىك ستاندارتتارعا ساي ءبىلىم الۋعا باعىتتالعان وقۋ وشاعى. مەكتەپتىڭ باستى ارتىقشىلىعىنىڭ ءبىرى – وقۋ ۇدەرىسىندە تەك اكادەميالىق ءبىلىم بەرىپ قانا قويماي, پراكتيكالىق داعدىلاردى دا قالىپتاستىرۋى. STEM باعىتىنداعى پاندەرمەن قاتار, روبوتتەحنيكا, باعدارلامالاۋ, ينجەنەرلىك جوبالاۋ سياقتى زاماناۋي سالالارعا دا باسا نازار اۋدارىلادى. «Quantum» مەكتەبىنىڭ باستى ەرەكشەلىگى – وقۋشىلاردى عىلىمي زەرتتەۋ جۇمىسىنا تارتۋ. ءبىلىم الۋشىلار عىلىمي جوبالارعا بەلسەندى قاتىسىپ, حالىقارالىق دەڭگەيدەگى جارىستا جۇلدەلى ورىنعا يە بولىپ كەلەدى. مەكتەپتىڭ وقۋ باعدارلاماسى وقۋشىلارعا زەرتتەۋ داعدىلارىن دامىتۋعا مۇمكىندىك بەرەدى, بۇل ولاردىڭ جوعارى وقۋ ورىندارىنا تۇسۋىنە, بولاشاقتا باسەكەگە قابىلەتتى مامان بولۋىنا ۇلكەن كومەك. مۇندا وقۋ اقىسى جىلىنا شامامەن 4-5 ميلليون تەڭگە كولەمىندە. سونىمەن قاتار مەكتەپتە تالانتتى وقۋشىلارعا ارنالعان گرانتتار قاراستىرىلعان. وقۋشىلاردىڭ اكادەميالىق ۇلگەرىمىنە بايلانىستى ءتۇرلى جەڭىلدىك بەرىلەدى. بۇل دا «Quantum» مەكتەبىنىڭ الەۋمەتتىك جاۋاپكەرشىلىگىن بايقاتادى.
«Spectrum» حالىقارالىق مەكتەبىنىڭ وقۋ باعدارلاماسى «Cambridge International» ستاندارتتارىنا نەگىزدەلگەن, بۇل وقۋشىلاردى حالىقارالىق دەڭگەيدە تانىلعان ەمتيحاندارعا (IGCSE جانە A-Level) دايىنداۋعا مۇمكىندىك بەرەدى. مەكتەپ شەت تىلدەرىن تەرەڭدەتىپ وقىتۋعا ەرەكشە كوڭىل بولەدى, اسىرەسە اعىلشىن ءتىلى نەگىزگى ءتىل رەتىندە وقىتىلادى. سونىمەن قاتار يسپان, فرانتسۋز, نەمىس, قىتاي تىلدەرىن مەڭگەرۋگە مۇمكىندىك بەرىلەدى. بۇل كوپتىلدى ءبىلىم جۇيەسى وقۋشىلاردىڭ حالىقارالىق ءبىلىم كەڭىستىگىنە ەركىن كىرۋىنە جاعداي جاسايدى.
«Spectrum» مەكتەبىندەگى وقۋ اقىسى ءارتۇرلى جاس دەڭگەيىنە بايلانىستى وزگەرەدى, جىلىنا شامامەن 4-7 ملن تەڭگە ارالىعىندا. مەكتەپتە دارىندى بالالاردى قولداۋ ماقساتىندا ءتۇرلى جەڭىلدىك پەن گرانتتىق باعدارلاما قاراستىرىلعان.
ماماندار پىكىرى, اتا-انا تاڭداۋى
ۇلتتىق بيزنەس جانە ينجينيرينگ مەكتەبىنىڭ نەگىزىن قالاۋشى, ەكونوميكا عىلىمدارىنىڭ كانديداتى گۇلميرا قورعانباەۆا جەكەمەنشىك مەكتەپتەردى قۇرۋشىلار وعان تەك بيزنەس رەتىندە قاراماۋى كەرەك دەيدى. ونىڭ ايتۋىنشا, بارلىق مەكتەپتە الەۋمەتتىك جاۋاپكەرشىلىك بولۋى قاجەت.
ء«بىزدىڭ مەكتەپ جەكەمەنشىك بولعانىمەن, دارىندى ءارى تالاپتى وقۋشىلارعا ارنالعان گرانتتار قاراستىرىلعان. سونىمەن قاتار جاقسى ناتيجە كورسەتىپ جۇرگەن وقۋشىلارعا دا جەڭىلدىك ۇسىنامىز. بولاشاقتا جاعدايىمىز تۇراقتالىپ, دامىعان كەزدە, اۋىلدىق جەرلەردەگى بالالارعا دا قولجەتىمدى ءبىلىم الۋ مۇمكىندىگىن جاساۋدى كوزدەپ وتىرمىز. جەكەمەنشىك مەكتەپتەردى تەك پايدا تابۋدىڭ كوزى دەپ قاراۋعا بولمايدى. مەكتەپ اشۋ ۇلكەن الەۋمەتتىك جاۋاپكەرشىلىك جۇكتەيدى, سوندىقتان اقىلى مەكتەپتەر اتا-انالارعا, وقۋشىلارعا ساپالى جاعداي جاساۋعا مىندەتتى. مەكتەپ اشۋدىڭ ماقساتى – ءبىلىم جۇيەسىن جاقسارتۋعا, دامىتۋعا ۇلەس قوسۋ», دەيدى ول.
ء«بىزدىڭ مەكتەپتە ءبىلىم ۇدەرىسى تەك اكادەميالىق جەتىستىكتەرمەن شەكتەلمەيدى. ءبىز وقۋشىلاردىڭ جان-جاقتى دامۋىنا, ولاردىڭ جەكە قابىلەتتەرىن اشۋعا ەرەكشە ءمان بەرەمىز. ءاربىر بالا تالانتتى, تەك سول تالانتتى دۇرىس باعىتتا دامىتۋ ماڭىزدى. ءبىز وقۋشىلارىمىزعا الەمدىك دەڭگەيدە ءبىلىم بەرىپ قانا قويماي, ولاردىڭ تۇلعالىق دامۋىنا, ءوز ويىن ەركىن جەتكىزۋىنە, سىني ويلاۋىنا جاعداي جاسايمىز. مەكتەپ باعدارلامالارى حالىقارالىق تالاپتارعا ساي بولعانىمەن, وقۋشىلارىمىزدى جوعارى وقۋ ورىندارىنا دايارلاۋمەن شەكتەمەي, ولاردىڭ ومىردە ءوز جولىن تابۋىنا كومەكتەسۋگە تىرىسامىز. بۇل – ءبىزدىڭ نەگىزگى ميسسيامىز», دەيدى «Spectrum» مەكتەبىنىڭ باس اتقارۋشى ديرەكتورى ەرحان ابدۋللاەۆ.
ساراپشىلاردىڭ ايتۋىنشا, جەكەمەنشىك مەكتەپتەر ءاردايىم ساپالى ءبىلىم بەرەدى دەۋگە بولمايدى.
«مەكتەپتىڭ ساپاسى ولاردىڭ ينفراقۇرىلىمىنا, وقىتۋ ادىستەمەلەرىنە, مۇعالىمدەردىڭ بىلىكتىلىگىنە, وقۋ باعدارلامالارىنا تىكەلەي بايلانىستى. كەيبىر مەكتەپتەر جوعارى ناتيجەلەر كورسەتىپ, وقۋشىلاردى الەمدىك دەڭگەيدەگى ۋنيۆەرسيتەتتەرگە دايىنداپ جاتسا, باسقالارى ءبىلىم ساپاسىنا جەتكىلىكتى كوڭىل بولمەۋى مۇمكىن. اتا-انالار مەكتەپ تاڭداۋدا ونىڭ ناقتى ناتيجەلەرىنە, تۇلەكتەردىڭ جەتىستىكتەرىنە, وقۋ باعدارلامالارىنا, پەداگوگيكالىق قۇرامىنا ءمان بەرۋى كەرەك», دەيدى ءبىلىم سالاسىنىڭ ساراپشىسى التىنگۇل تايباساروۆا.
جەكەمەنشىك مەكتەپتە بالالارىن وقىتاتىن اتا-انالار اراسىندا جۇرگىزىلگەن ساۋالداما ناتيجەسىنە سايكەس, ولاردىڭ تاڭداۋىنا اسەر ەتكەن باستى سەبەپ – ءبىلىم ساپاسى. كوپتەگەن اتا-انا مەملەكەتتىك مەكتەپتەرمەن سالىستىرعاندا جەكەمەنشىك مەكتەپتەردىڭ وقۋ باعدارلامالارى مەن ادىستەمەلەرى الەمدىك ستاندارتتارعا ساي ەكەنىن اتاپ ءوتتى. مۇعالىمدەردىڭ بىلىكتىلىگى مەن وقۋشىلاردىڭ ناتيجەلەرى, حالىقارالىق ەمتيحاندارداعى جەتىستىكتەر دە ماڭىزدى ءرول اتقارادى. ودان كەيىن سىنىپتا بالا سانىنىڭ از بولۋى ەسكەرىلگەن. اتا-انالار كوبىنە بالالارىن سىني ويلاۋىن جاقسارتاتىن, يننوۆاتسياعا ءمان بەرەتىن, ەركىندىگىن شەكتەمەيتىن ورتادا بولعانىن قالايدى. كەيبىر اتا-انالار قۇندىلىقتارىنا سايكەس كەلەتىن مەكتەپتەردى ىزدەيدى. سونداي-اق بالالارىن جەكەمەنشىك مەكتەپكە بەرگەن اتا-انالار وقۋ اقىسىن بالانىڭ بولاشاعىنا ينۆەستيتسيا رەتىندە قاراستىراتىنىن اتاپ كورسەتكەن.
«Spectrum» مەكتەبىندە ءبىزدىڭ ەكى بالامىز ءبىلىم الادى. ۇلىمىز ءسالىم 8-سىنىپتا, قىزىم ءماريام دايىندىق توبىندا وقيدى. بىزگە مۇعالىمدەردىڭ اتا-انالارمەن تىعىز بايلانىس جاسايتىندىعى, مەكتەپتىڭ ساپاسى, ءبىلىم بەرۋدەگى ارتىقشىلىعى جالپى ايتقاندا, بارلىعى ۇنايدى, كوڭىلىمىزدەن شىعادى. وسى مەكتەپكە كەلگەلى بالالاردىڭ اعىلشىن ءتىلىن مەڭگەرۋ دەڭگەيى جاقساردى. سونداي-اق انا ءتىلىمىز – قازاق تىلىندە دە ەركىن سويلەيتىن بولدىق», دەيدى وقۋشىلاردىڭ اتا-اناسى ەرلان مەن اسەل.
